– بنعيد وبنهني كل المصريين والعرب والأمة الإسلامية بعيد الأضحى المبارك، أعاده الله على الجميع باليمن والبركات.
– في مناسبة سعيدة زي دي وإجازة جميلة – كانت هتبقى أجمل طبعا للفئة الأكبر من موظفين مصر لو طلع الخميس إجازة 
– حابين نأكد على دور الدولة المفترض في توفير عدد كافي من المجازر بكل حي ومنطقة سكنية، وإن ده هوا اللي هيساعد كتير في تنظيم وتحسين ظروف ذبح الأضاحي، وانتشار فضلات ودماء الأضاحي في الشوارع.
– بنتمنى عيد سعيد للأطفال المصريين، ينبسطوا ويقضوا وقت جميل فيه مع أسرهم، وياخدوا عديات ويلعبوا، وميتضحكش عليهم بـ” ده عيد اللحمة”.. وبنتمنى كتير من الأسر المصرية تتوقف عن إشراك الأطفال في عمليات ذبح الأضاحي، الأمر اللي أكيد بيأثر سلبا على نفسية بعض الأطفال في العمر ده.
– نتمنى لستات مصر أجازة سعيدة، يقدروا يتفسحوا ويخرجوا فيها بدون ما يتعرضوا لمضايقات. ونتمنى الشرطة تقوم بدورها في حمايتهم من ظاهرة التحرش في الأعياد والمناسبات، وده يكون كمان مسؤولية اجتماعية وواجب على كل الناس.
– عيد أضحى سعيد على الجميع، وبنتمنى للجميع أيام عيد سعيدة مع الفتة، وهما بيتفرجوا على مسرحية العيال كبرت للمرة المليون 