عزاء واجب لأهالي ضحايا ومصابي قطاري سوهاج

– تتقدم أسرة صفحة الموقف المصري بخالص العزاء والمواساة لأسر ضحايا ومصابي حادث قطاري سوهاج اليوم.

– وزارة الصحة المصرية أعلنت قبل قليل ارتفاع عدد الضحايا إلى مصرع 32 شخص بالاضافة إلى 91 مصاب.

– هيئة السكك الحديدية المصرية بحسب بيان رسمي بتقول إن مجهولين استخدموا مكابح الطوارئ مما تسبب في توقف القطار الأول في الحادث، وإن القطار التاني اصطدم بالأول من الخلف، لكن بدون أي توضيح ليه القطار التاني محدش بلغه إن اللي قدامه وقف.

– النيابة العامة أصدرت بيان بيقول انها وحدها المسؤولة عن إصدار أي معلومات ومش أي جهات أخرى، في إشارة ناس كتير فهمتها انها موجهة ضد بيان الهيئة.

– رد الفعل الأولي من الحكومة كان عن طريق رئيس الوزراء اللي كلف وزيري الصحة والنقل الانتقال إلى موقع الحادثة لتقديم الدعم اللازم، وبيان من وزارة النقل بيقول إنه تم تشكيل لجنة فنية للتحقيق، وكمان بيان من الرئاسة بيتوعد بحساب “كل من تسبب في هذا الحادث الأليم بإهمال أو بفساد أو بسواه، دون استثناء ولا تلكؤ ولا مماطلة”.

– للأسف الشديد دا مش أول نعي ولا عزاء نكتبه في الصفحة عن مأساة السكة الحديد في مصر، وأكتر من مرة الكوارث تكون جاية تحديدا من قطارات الصعيد اللي بيستخدمها الفئات الأفقر، مش أول مرة، ورغم كدة يبدو إن كل الفوران اللي بيبقى بعد كل حادثة بيروح لحاله بعدها. فيه أسئلة كتير مشروعة هنتكلم فيها مع بعض في بوست منفصل لاحقاً.

– ربنا يرحم الضحايا ويصبر ذويهم ويشفى كل المصابين، ويعين المصريين على تحمل كل هذا الكم من الإهمال اللي بيعصف بأرواحهم، ونشوف نهاية لمسلسل المآسي المستمر.