– من ساعات أعلن الاتحاد الأفريقي بعد اجتماع للجنته التنفيذية في العاصمة السنغالية داكار، عن فوز مصر بتنظيم كأس الأمم الأفريقية سنة 2019 بعد سحب تنظيم البطولة من الكاميرون وعدم جاهزية جنوب أفريقيا.
– حصلت مصر على 16 صوت مقابل صوت وحيد لجنوب أفريقيا وصوت ممتنع، وبالتالي البطولة هتقام في مصر شهر يونيو القادم.
– رغم انه مصر مكانتش مستعدة أصلاً للبطولة، ومن شهرين بس تم إعلان سحب التنظيم من الكاميرون، لكن تنظيم بطولة بالحجم ده هيشارك فيها 24 منتخب هيبقى مفيد جداً على المستوى الرياضي والاقتصادي والسياحي.
– المنظومة الرياضية في مصر مليانة مشاكل بقالها سنين، سواء من لعب المباريات بدون جمهور ما عدا الماتشات اللي بيتم إجبار مصر على استضافة جمهور، زي ماتشات المنتخب او ماتشات الأندية في أفريقيا، وده مأثر جداً على قيمة المسابقة المحلية سواء على المستوى الفني للأندية المصرية أو حتى المستوى الإعلامي والترويجي.
– كمان في مشاكل كبيرة مع روابط والتراس الأندية الجماهيرية، واللي اتقبض على مجموعات كتير منهم وبقا في معتقلين للزمالك وللأهلي ومنهم اللي بيقضي شهور في السجون بدون أي سبب منطقي، في حين مثلاً انه جمهور الفيصلي الاردني عمل شغب حقيقي في اسكندرية واعتدو على افراد شرطة وكسروا الاستاد وخرجوا في أقل من 24 ساعة بدون ضمانات!!
– بتنظيم البطولة ده مصر هتبقى مجبرة بشكل كامل على حضور الجماهير لكل الملاعب بكل طاقتها، ونتمنى إنه ده يعني رجوع الجماهير بشكل كامل للمسابقات المحلية، واللي يقدر يأمن مسابقة بالحجم ده لمدة شهر يقدر ينظم المسابقة المحلية بحضور جماهيري.
– إلى جانب ده في مشاكل تانية تنظيمية زي جودة أرضية الملاعب وانتظام جدول الماتشات اللي بيتعمل بطريقة غير احترافية بالمرة وأزمات البث التلفزيوني وجودة التصوير ونقل المباريات، وده كلها أشياء مردودها سيء جداً على المنظومة وعلى نجاحها.
– بالتأكيد كلنا ثقة انه مصر هتنظم بطولة بشكل جيد، لكن نتمنى انها تبقى فرصة لتصحيح كتير من الأوضاع السلبية داخل المنظومة الرياضية في مصر، وهتنعكس على الرياضة بشكل إيجابي جداً.
– على المستوى الاقتصادي، فالبطولات الكبيرة من النوع ده بتبقى فرصة نموذجية للترويج للسياحة وإنعاشها، والدول بتتنافس على استضافة البطولات الكبيرة وبتصرف ملايين الدولارات عليها عشان الحركة الاقتصادية والسياحية اللي بتنشط خلال فترة البطولة.
– مشهد كمان مهم جداً حصل النهارده، وهو تواجد نجم الكرة التاريخي محمد أبو تريكة Abou Trika في مقر الاتحاد الأفريقي، ودعمه للملف المصري ودعوته للتصويت لتنظيم مصر للبطولة واجتماعه مع بعثة الاتحاد المصري لكرة القدم وأكد مساندته للملف المصري.
– وبرغم إنه أبو تريكة موضوع على قوائم ترقب الوصول بسبب إدراجه في قوائم الإرهاب، ومقدرش يحضر حتى عزاء والده، وتم التحفظ على أمواله، لكن بالرغم من ده فصل ما بين خصومته السياسية مع السلطة الحالية اللي بتنكل بيه هوا شخصياً، وما بين بلده ومصلحتها رياضياً واقتصادياً من استضافة البطولة، وكتب تويتة خاصة بده، وده موقف في قمة النبل والرقي لازم نشكره عليه..
– وأخيراً احنا بالتأكيد سعداء بالخبر ده وبنتمنى تنظيم بطولة ناجحة على كل المستويات، وأكيد عاوزين محمد صلاح Mohamed Salah يرفع الكاس في النهائي 
دعواتكم.. 
