النهاردة قبل ساعات تم القبض على شاب اسمه أحمد محيي الدين، دكتور صيدلي، وقف لوحده رافع يافطة في ميدان التحرير.
– أحمد بث فيديوهات لايف على صفحته على الفيس بوك، اللي تم قفلها دلوقتي، أولها كان في عربيته وهوا في الطريق وبيكلم كل المصريين الي سامعين صوته “أنا مش لوحدي مش كده؟”.
التاني كان في الميدان قبل القبض عليه، التالت كان بعد القبض عليه وهوا جوا عربية الترحيلات اتكلم بالانجيزي وبالعربي.
وقال “انا عارف اني هتنفخ، لكن بالله عليكو لو اتنفخت عشانكو متنسونيش”.
– حسب قانون التظاهر المظاهرة هيا “تجمع من عشرة أشخاص”، وبالتالي احمد معملش أي مخالفة قانونية دي مش مظاهرة ولا “فعل فاضح في الطريق العام”، ولا “عرقلة مرور” ولا أي تهمة، حتى مكانش بيهتف أصلا كان واقف ساكت.
– مهما كان رأي حد في تصرف أحمد، وهل دي الوسيلة الأفضل ولا لا، فالأكيد إن احمد عمل كده عشان عايز يوصل رسالة.
وبنقوله رسالتك وصلت يا أحمد، وانتا مش لوحدك، ومش هننساك، ملايين المصريين أكيد دلوقتي وهما بيشوفوك حاسين ان صوتك هوا صوتهم، ومشاعرك هيا مشاعرهم.
بنتمنى احمد يخرج سالم بأسرع وقت، ونتمنى أي عمل سلمي من أي نوع يعمله أي مواطن يكون خطوة صغيرة في طريق اصلاح بلدنا اللي كلنا نتمنى نشوف حالها أحسن.
رسالة أحمد محيي الدين اللي اتقبض عليه في ميدان التحرير
![](https://almawkefalmasry.com/wp-content/uploads/2022/02/ميدان-التحرير.jpeg)