– معرض القاهرة الدولي للكتاب هيستقبل جمهوره بداية من يوم الخميس 1 يوليو، وحتى يوم 15 من نفس الشهر، بعد ما تم تأجيل موعده اللي عادة كان بيكون نهاية شهر يناير، بسبب الإجراءات الاحترازية لمواجهة فيروس كورونا.
– دخول المعرض هيكون بتسجيل مسبق هذا العام، في محاولة لتقليل الزحام والحفاظ على إجراءات التباعد الاجتماعي.
****
كيفية التسجيل:
– تقدر تدخل على موقع المعرض من خلال اللينك ده: https://cairobookfair.gebo.gov.eg/home
– بعدها تختار “حجز تذكرة” وتحدد اليوم اللي هتروح فيه، وتسجل بياناتك الشخصية:الاسم- رقم الهاتف- البريد الإلكترونى- العمر- الجنسية- النوع.
– بعد التسجيل، هتوصلك التذكرة في رسالة على تطبيق واتس آب، وعلى الإيميل، فيها رقم بوابة الدخول وتاريخ الزيارة.
*****
إجراءات التأمين
– عدد الزوار لن يتجاوز 100 ألف زائر في اليوم. المعرض كان بيستقبل أكتر من ضعف العدد ده يوميا(من 3 إلى 4 مليون زائر خلال أسبوعين، يعني أكتر من 200 ألف في اليوم).
– فيه حد أقصى للطاقة الاستيعابية لكل قاعة عرض، ومسافات كافية بين أجنحة العارضين، حسب ما أعلنت وزارة الثقافة.
– عمل المعرض سيمتد من الساعة 10 صباحا، للساعة 10 مساء بدل الساعة 7 مساءا.
– الفعاليات الثقافية، زي الندوات وحفلات التوقيع هتكون كلها أون لاين عن طريق المنصة الإلكترونية للمعرض.
– عدد 100 ألف زائر يوميا يضع تحدي أمام المنظمين للحفاظ على المسافات الآمنة بين الزوار، خصوصا إن مساحة قاعات المعرض 40 ألف متر مربع، المساحات المستغلة منها حوالي 18 ألف متر مربع، يعني الحفاظ على مسافة متر بين كل زائر أمر صعب شوية، إلا لو كل زائر هيقعد ساعتين تلاتة ويمشي.
-هيئة النقل العام بتوفر أتوبيسات بتتحرك من أماكن مختلفة، وبتوصل للمعرض، من عبدالمنعم رياض ودوران شبرا والنزهة الجديدة، والأميرية والجيزة وصقر قريش والمظلات، بالإضافة للمواصلات اللي بتعدي بشكل اعتيادي من أمام المعرض، واللي كتير منها بيتحرك من ميدان ميدان رمسيس والميادين الرئيسية.
****
– تقارير كتير بتقول إن الإقبال على القراءة والتعلم زاد خلال فترات الإغلاق اللي فرض بسبب كورونا، لما اتوفر للناس أوقات أكتر، البعض استغلها لتطوير ذاته ومعرفته. طبعا انتهت فترة الإغلاق، لكن أملنا إنه تكون الفترات دي شجعت ناس كتير على تخصيص أوقات للقراءة، وأضاف شرائح عمرية جديدة لفئات القراء، سواء كان عبر الكتب المطبوعة أو الإلكترونية أو حتى المسموعة.
– في العادة بنشجع أكبر قدر ممكن من الناس على زيارة المعرض وشراء ما يناسبهم من كتب، لكن في ظل ظروف كورونا، بندعوا اللي قرر يروح يلتزم بالإجراءات الوقائية والتباعد الاجتماعي، وبالنسبة للي قرر إنه مش هيروح فيه خيار شراء الكتب اللي تحتاجوها من خلال خدمات التوصيل أو التسوق الإلكتروني (ممكن تعملوا ده من خلال موقع معرض الكتاب)، أو حتى زيارة فروع المكتبات القريبة منكم، واللي بالتأكيد بتعمل خصومات معقولة على الأسعار بمناسبة المعرض.
– أيضا الندوات اللي هينظمها المعرض عبر موقعه الإلكتروني بيكون فيها حاجات مفيـدة، ممكن تتابعوها وتحضروا اللي يعجبكم منها.
– القراءة هي أهم أسباب للتغيير للأفضل في المجتمعات، وظاهرة زيادة الإقبال من الشباب على الكتابة والقراءة من بعد ثورة يناير بتأكد على الفكرة دي، مهما كان في مصر من تضييق على حرية البحث والتفكير لكن استمرار الحركة ده كويس جداً.
