دعوة لتوثيق مخالفات الانتخابات.. لإن التصويت مش بالعافية!

– رغم رأينا المعروف في الانتخابات دي، لكننا بنحترم جداً الخيار الحر لأي مصري .. أي مصري بكامل ارادته ياخد أي خيار سياسي ده فوق راسنا من فوق مادام ده قراره وقناعته، وحقه علينا الاحترام الكامل والنقاش بهدوء مهما كان الاختلاف.
– لكن حصاد أول يوم تصويت مكانش كده، كان استكمال لمسيرة إجبار المرشحين على عدم الترشح، ودلوقتي بنشوف حالات إجبار الناخبين على الانتخاب!

بعض الوقائع وصل للصفحة وبعضها اتنشر علناً:

– من أكتر المشاهد فجاجة فديو انتشر امبارح من مدرسة كلا الباب الجديدة – مركز السنطة محافظة الغربية، ناظر المدرسة ومعاه ممثل من الإدارة التعليمية جامعين المدرسين والمدرسات لإلزامهم بالتصويت، ووزعوا كروت كل واحد لازم يرجعه عليه بصمته بالحبر، اللي يصوت ياخد مزايا حكومية هيا يومين أجازة، أما اللي مش هيصوت هيتم عقابه، يتحرم من الأجازة، وكارته هيتسلم للإدارة وهيروح لأجهزة الدولة.

– جاتلنا شهادة من أحد لجان دائرة الساحل بشبرا، عن حشد موظفين شركات مصر للتأمين والقاهرة للأدوية، شركات حكومية، في أتوبيساتهم الخاصة الساعة 12 الظهر، وده مش معاد خروج الموظفين، ومشغلين لهم أغاني تسلم الايادي.

– إدارة الازهر التعليمية بمحافظة القليوبية طلعت أمر إداري للعاملين بمنع الاجازات، والزام كل موظف ومدرس باحضار مجموعة للتصويت، وتسجيل أسمائهم والتأكد من تصويتهم بالحبر الفسفوري.

– طريقة حشد سيئة جداً في بعض قرى محافظة أسيوط بترديد إشاعات للسيدات الغلابة عن الغاء معاش تكافل وكرامة الحكومي، اللي بيسموه “معاش السيسي”، في حالة عدم التصويت للسيسي بشكل كبير.

– محافظة البحيرة السيدة نادية عبده طلعت تصريح عن ان القرى الأكثر تصويتاً في الانتخابات، هتشهد حل مشاكل المياه والصرف الصحي! كده بدون أي خجل يتقال بصراحة ان الانفاق الحكومي اللي من جيب كل مصري هيتصنف سياسيا!! كارثة ومفيش حد حس بخطورة تصريح زي ده واستنكره.

– لو كنا فعلاً في دولة فيها الحد الادنى من احترام مواطنيها مكانش ممكن نشوف مشاهد مهينة زي دي بتهدر إرادة وكرامة الإنسان المصري.

****

– صفحة الموقف المصري بتدعوكم لتوثيق كل الوقائع والحكايات المشابهة، اكتبوا شهاداتكم أو أنشروا الصور والفيديوهات في تعليقات على البوست ده.
– اللي خايف يكتب علماً ابعتولنا على انبوكس الصفحة واحنا هننشره.
– زي ما قلنا اللي رايح بمزاجه هوا حر، لكن لو كانت الصورة المطلوبة هيا انه يظهر اقبال مزيف مستخدم فيه الاجبار الحكومي والأمني، يبقى دورنا هوا اننا نقدم الصورة الحقيقية، في ظل منع أي صوت مختلف عن وسائل الإعلام.

– الصورة من فيديو مدرسة السنطة بالغربية والناظر بيشاور بالكروت اللي إجبارياً لازم المصوتين يبصموا عليها ويرجعوها تروح للإدارة التعليمية.