– النهاردة رابع يوم بعد مقتل عويس الراوي في العوامية بالأقصر، ولسه مفيش أي بيان رسمي من أي جهة لا الداخلية ولا النيابة عن اللي حصل.
– حافظ أبوسعدة، عضو المجلس القومي لحقوق الإنسان، قال إن النيابة بتحقق مع الظابط المتهم، وأمرت بحبسه ٤ أيام على ذمة التحقيق، لكن الكلام ده مظهرش في أي بيان أو بالصحافة.
– حسب تقرير نشره موقع مدى مصر المنطقة محاطة بتواجد أمني مكثف، ومحدش بيدخل أو يخرج منها، والقرية مقبوض على 14-18 من أبناءها.
– حسب شاهد عيان تواجد قرب مكان الواقعة الظابط أطلق 4 رصاصات على عويس، منها واحدة أصابته في الرأس وهيا سبب وفاته.
– الأهالي غاضبين جدا خاصة ان عويس كان موظف في مستشفى الأقصر وناس كتير تعرفه، شخص ملوش أي علاقة بالسياسة (مع إن العمل السياسي السلمي بحد ذاته مش تهمة ولا عيب)، ومحترم وسمعته كويسة، وأب لطفلين وزوجته حامل في الثالث.
– الحادثة فكرت الأهالي بقصة مقتل طلعت شبيب في نوفمبر 2015 على يد الشرطة في العوامية برضه، واتقتل من التعذيب في القسم، وانتهت القضية بالحكم على ظابط بالسجن المشدد 7 سنوات، 3 سنوات لخمس أمناء شرطة، وكان محامي الأهالي هوا خالد علي.
– لما نتكلم وندافع عن حق عويس إحنا بندافع عن حقنا كلنا .. حق كل مواطن مصري انه ميبقاش مستباح ودمه رخيص قدام رجال السلطة اللي مفروض يطبقوا القانون مش ينتهكوه طول الوقت، زي ما شفنا قتل إسلام الاسترالي في المنيب وغيره كتير.
*****
المصادر
