– النهاردة بتمر السنة التالتة وما زال طبيب الأسنان، وعضو البرلمان السابق، وكيل مؤسسي حزب العدل سابقا مصطفى النجار مختفي.
– أسرة مصطفى وأطفاله وأصدقاؤه ناشدوا كل الجهات الرسمية، ولحد النهاردة بعد قرب تلات سنوات محدش قام بواجبه لكشف مصيره، وبعد قرب 3 سنين من الاختفاء مفيش بايدنا غير إننا نعيد التذكير بمصطفى وقصته، ونعيد مطالبة المسؤولين بتحمل مسؤوليتهم.
*****
– دكتور مصطفى كان أحد الناشطين في حملة البرادعي قبل الثورة وبعدها الثورة شارك في تأسيس حزب العدل، ونزل إنتخابات البرلمان سنة 2012، ونجح بعدد أصوات ضخم وصل 133 ألف صوت، بفارق 34 ألف صوت عن منافسه مرشح قائمة الحرية والعدالة.
– يعني ده واحد أيا كان الاتفاق أو الاختلاف معاه طول عمره بيشتغل في إطار قانوني وسلمي، عشان شايف إنه لازم يحصل تغيير، وإنه بلده تستاهل طريقة حكم أفضل.
– بعد 2013 ابتعد تماماً مصطفى عن العمل السياسي، لدرجة انه بعد فترة توقف عن الكتابة على الفيس بوك أو المقالات، وبقى متفرغ لشغله الطبي ولأنشطة خيرية كان بيعملها زي مشاركته في قوافل طبية مجانية.
– مصطفى كان متهم في القضية العجيبة اللي اسمها “إهانة القضاء” اللي فيها اتوجهت اتهامات لشخصيات كتير جدا بما فيها مؤيدين زي توفيق عكاشة وعبدالحليم قنديل وغيرهم، أغلبهم بسبب التعليق على الحكم الأول الصادر على مبارك ورجاله، وده رغم إن مصطفى وقتها كان نائب في البرلمان ومفروض محمي بحصانته البرلمانية!
– مصطفى كان دايما بيدعوا للتعامل الهادئ والحوار وللحلول الوسط إلى حد أنه مثلا كان من شباب نادرين أثناء الثورة قابلوا عمر سليمان، وحصل وقتها انتقادات ونقاشات على الموقف ده.
*****
إيه اللي حصل لمصطفى؟
– حسب رواية زوجة مصطفى النجار قالت انها تلقت يوم 10 أكتوبر 2018 مكالمة تليفونية من شخص مجهول على خط البيت الأرضي اللي رقمه مش معروف إلا لمصطفى وعدد قليل من الناس، أبلغها إن مصطفى اتقبض عليه.
– زوجة د.مصطفى قالت إن آخر مكالمة بينهم قبلها بأيام قالها فيها إنه في أسوان في أجازة بيرتاح شوية قبل جلسة النقض.
– زوجة مصطفى بتقول انه كان متأكد ان النقض هيتقبل في قضيته وكان ناوي يحضر الجلسة، لكن طبعا محضرش بعد اختفاؤه .. و للأسف النقض حكمت بتثبيت أحكام الحبس على كل المتهمين، يعني مصطفى دلوقتي مطلوب للحبس 3 سنوات.
– بعض المواقع نشرت معلومات غير مؤكدة ان مصطفى كان بيحاول يعبر الحدود إلى السودان وإن حرس الحدود قبض عليه ضمن القافلة، ووصلت معلومات بدون تأكيد برضه لأسرة الدكتور مصطفى ولمحاميه أ نجاد البرعي بوجوده في معسكر الأمن المركزي بمدينة أسوان، واتقدم بلاغات للنائب العام ولنيابة أسوان من غير أي رد.
– يوم 13 أكتوبر، نشرت صفحة مصطفى النجار بوست كتبه بنفسه قبل اختفاؤه، يفيد بأنه لم يهرب وان البوست هيتنشر في حالة القبض عليه قبل جلسة قضية إهانة القضاء، قال في بدايته “عزيزي القارئ إذا كان باستطاعتك قراءة هذا المقال الأن فهذا يعنى أن كاتبه قد صار خلف الأسوار“.
– البعض تخوف من إن قصة السودان دي تكون حقيقة، ويكون مصطفى تعرض لأذى جسدي أثناء محاولة العبور، أو اتقبض عليه من الأمن السوداني، لكن برضه مفيش أي دليل على الكلام ده.
– المؤسسات الرسمية أنكرت احتجاز مصطفى النجار على لسان ضياء رشوان رئيس الهيئة العامة للاستعلامات أكتر من مرة، ورغم اننا شفنا كتير من وقائع إنكار الأجهزة الأمنية لاحتجازها بعض المواطنين وبعدها يظهروا كمتهمين في قضايا، إلا إنه طول مدة اختفاء د مصطفى النجار بتسبب قلق شديد على سلامته.
*****
– كل الاحتمالات واردة، وفي كل الاحتمالات الدولة مسؤولة عن (المواطن) ده .. إذا كان مصطفى فعلا محتجز فدي جريمة، وإذا كان فعلاً هربان بإرادته يبقى برضه واجب الداخلية القبض على أي “هارب من تنفيذ حكم قضائي”، وإذا كان تعرض لأذى فواجب الدولة حمايته أو كشف مصيره .. مش منطقي كل جهات الدولة تقول منعرفش مكانه وملناش دعوة!
– ده كمان يشكك في كفاءة الأجهزة الأمنية، لو مثلا فيه إرهابي خطير مطلوب هربان، هيتقال منعرفش مكانه وملناش دعوة وخلاص؟!
– صفحة الموقف المصري بتشارك أهل وأصدقاء ومحبي مصطفى النجار المطالبة بالكشف عن مكانه واللي حصله.
المصادر
