– امبارح النيابة العامة المصرية أصدرت بيان مشترك مع نيابة الجمهورية الإيطالية في روما ، حول نتائج التحقيقات في مقتل الطالب جوليو ريجيني.
– النهاردة حنشوف ايه آخر تطورات القضية؟ ومين الظباط الخمسة المصريين اللي الطرف الإيطالي تمسك باتهامهم؟ وايه اللي ممكن يحصل في الملف ده مستقبلا؟
*****
بيان النيابة العامة قال ايه؟
– الحقيقة البيان كان متناقض، وبيطرح أسئلة أكثر ما بيقدم معلومات عن التحقيقات واللي حصل فيها.
– أولا: البيان قال في أول نقطة أنه صادر بعد تعاون مشترك وتبادل معلومات تم بين الجانب المصري والإيطالي ، ولكن في بقية البيان بنشوف اختلاف تام لنتائج تحقيقات الطرفين، فين نتيجة التعاون ده؟!
– ثانيا: البيان قال انه النيابة الإيطالية أعلنت عن نيتها ”إنهاء التحقيقات في الواقعة بالاشتباه في 5 أفراد منتمية لأجهزة أمنية بتصرفات فردية منهم” وبالتالي إيطاليا هتقدم الأشخاص دول لمحاكمة غيابية في القضاء الإيطالي، لكن النيابة العامة المصرية تحفظت علي نتائج التحقيقات دي وقالت أنه في “تشكيل عصابي” ارتكب واقعة سرقة لمتعلقات ريجيني.
– ثالثا: النيابة العامة المصرية رغم انها قالت العصابة سرقت ريجيني، لكنها قالت برضه لا العصابة مش هيا اللي قتلته، ده مرتكب جريمة القتل “لا يزال مجهولا” .. طيب هتكملوا بحث عنه؟ لا النيابة قالت ان قرارها هوا إغلاق التحقيقات في الواقعة مؤقتا، مع “تكليف جهات البحث والتحري اتخاذ جميع الإجراءات اللازمة للوصول إلى مرتكب الجريمة”!
*****
مين الظباط الخمسة دول؟
– الجانب الإيطالي متمسك بنتائجه إن المسؤول المباشر عن قتل ريجيني هما ٥ من عناصر جهاز الأمن الوطني، والصحف الايطالية نشرت أسمائهم سابقا:
１- اللواء طارق صابر أحد كبار قيادات الأمن الوطني وقتها وخرج للتقاعد بعد قضية ريجيني في 2017.
２- الرائد شريف مجدي وده كان رئيس فريق المراقبة لريجيني.
３- العقيد هشام حلمي – ظابط الأمن الوطني المسؤول عن مكان ريجيني.
４- الظابط محمود نجم (لم يتم تحديد الرتبة)
５- آسر كمال (لم يتم تحديد الرتبة)
– الأدلة غير معلنة، لكنها تشمل مصادر سرية منها قصة اتسربت للصحف الايطالية عن ان ظابط مصري شارك في الواقعة كان بيحضر مؤتمر أمني في دولة أفريقية وكان بيحكي لشخص آخر عن اللي حصل ومكانش يعرف ان الظابط الأفريقي اللي جنبه بيفهم عربي وهوا اللي أبلغ الإيطاليين، ده غير إن الايطاليين فحصوا سجل مكالمات ريجيني، وتوصلوا للمخبر ممثل نقابة الباعة الجائلين اللي أبلغ عن ريجيني الشرطة، والإيطاليين لما اتقالهم أصل كاميرات المترو اتمسح محتواها طلبوا الحصول عليها وقالوا هنحاول بطرق تقنية نرجعها.
*****
إيه اللي هيحصل مع المتهمين الخمسة المصريين؟
– الجانب الإيطالي من المتوقع أنه هيكمل إجراءات المحاكمة الغيابية، ومن المتوقع تاخد وقت طويل لأنه هيتم اثارة مسائل إجرائية زي أن القانون الإيطالي بيطلب اخطارهم على عناوينهم والنيابة المصرية رفضت تمد الإيطالية بعناوين منازل الخمسة.
– بينما الجانب المصري قال أنه مش راضي عن التحقيقات دي وبالتالي مفيش نيه لتسليم الخمس أشخاص أو حتي محاكمتهم في مصر.
– وبالتالي الظباط الخمسة دول لو اتحكم عليهم ده مش هيضرهم خالص داخل مصر، لكن مش هيقدروا يسافروا للخارج لدول الاتحاد الأوروبي أو أي دولة بينها وبين إيطاليا اتفاقية تسليم.
– عائلة ريجيني ومحاميها طلعوا بيان للرد علي بيان النيابة العامة المصرية رفضوا فيه علي حد تعبيرهم ”تجرأ النائب العام المصري على”إبداء تحفظات” على عمل القضاة والمحققين لدينا، بل واعتبار الأدلة المجمعة غير كافية. لا يستجيبون لخطابات الإنابة القضائية ولا يمكنهم تقديم حتى خمسة عناوين لمراسلتها، ولكن يسمحون لأنفسهم بالحكم على إطار من الأدلة والإثباتات من مكتب المدعي العام الإيطالي، ويصرون على إعادة اعطائنا تلك الأكاذيب التي لا تخلو من دماء خمسة أبرياء فقدوا حياتهم بزعم انهم قتلوا جوليو.”
– بيان عائلة ريجيني بيفكرنا بسؤال مهم إيه مصير التحقيقات المصرية في مقتل 5 مواطنين مصريين، واتهام الخمسة دول بأنهم قتلوا ريجيني وبعد كدة التراجع عن ده والكلام الحالي لا دول سرقوه بس عشان متعلقاته الشرطة لقتها عندهم!
*****
أسئلة مهمة
– السؤال الأهم في القضية هو ايه سبب إصرار الجانب المصري علي عدم التعاون مع الجانب الإيطالي؟ وايه سبب عدم الاعتراف بأنه اللي حصل (خطأ فردي غير مسؤل عنه أي جهة رسمية) ومحاكمة المقصرين داخل مصر وسهل ياخدو أحكام مخففة وظروف سجن ممتازة وعفو كمان!
وايه تأثير عدم التعاون ده علي سمعة مصر وعلى مصالحها كدولة؟
– سؤال مهم أيضا هو ايه الثمن مقابل حماية الخمس أفراد دول؟
احنا عندنا علاقات اقتصادية وسياسية وشراكات طويلة المدي في ملفات مهمة مع الاتحاد الأوروبي والجانب الإيطالي يمكن أهمها ملف الهجرة غير الشرعية، مصر حتقدم تنازلات ايه للجانب الإيطالي في مقابل عدم محاكمة الخمس متهمين أو محاكمتهم غيابيا وعدم المطالبة الجادة بتسليمهم؟
– شوفنا جزء من الثمن ده اتدفع في صفقة سلاح تاريخية بين مصر وإيطاليا اشترت سلاح بقيمة 9 مليار يورو من إيطاليا وهي صفقة تاريخية لأنه إيطاليا مش معروف عنها أنها دولة مصدرة للأسلحة بالحجم ده.
– كمان احنا دلوقتي في انتظار دفع باقي التمن، وزي ما السعودية دفعت وهتدفع تمن قتل خاشقجي، احنا للأسف هندفع سواء التمن ده اجراءات ضد الجانب المصري من الأطراف الإيطالية الراغبة بمعاقبة الفاعلين، أو العكس هندفع للأطراف الإيطالية اللي مستعدة تساعد في الطرمخة، سواء تنازلات اقتصادية في ملف الغاز أو عن طريق صفقات سلاح إيطالي أو غيرها
– السلطة المصرية عملت كل المخالفات القانونية اللي ممكن نتخيلها في القضية من البداية ولحد دلوقتي، رفضت الاعتراف بالمسؤولية عن قتل ريجيني، تلفيق التهم وقتل 5 أبرياء بدون محاسبة في تصفية خارج القانون تمثل جريمة تانية محدش فعليا اهتم بأي محاسبة ليها في مصر.
– أخيرا القصة دي بتخلينا نسأل سؤال خيالي جدا في نظر البعض، وهو ماذا لو جوليو كان مواطن مصري اتقتل على ايد ظباط مصريين؟ هل كانت هتستمر التحقيقات ل 3 سنين؟ وهل الحكومة هتسمع لشكاوي وضغوط أسرته! الأسئلة دي اجاباتها حاليا معروفة، لكن هنفضل بنحاول ونتكلم لحد ما تبقى اجابات الاسئلة ده شيء مختلف وواقع جديد بنعيشه.
المصادر
