– صفحة الموقف المصري بتقدم خالص التعازي للشعب اللبناني الشقيق في كل ضحايا حادث انفجار امبارح اللي وصل حتى الآن 135 قتيل و5000 مصاب حسب وزارة الصحة اللبنانية، وكل تضامننا ودعواتنا بالشفاء والسلامة لالاف المصابين والمفقودين في الحادث الأليم ده.
– في البوست ده هنتكلم عن المعلومات المتاحة عن أسباب الانفجار وآثاره، وردود الأفعال في مصر.
*****
إيه اللي حصل؟
– امبارح في عصر اليوم حصل انفجار ضخم جداً في ميناء بيروت، الانفجار ده حرفياً أصاب كل أحياء مدينة بيروت بدرجات مختلفة، في الدايرة الأقرب بيوت اتهدمت وعربيات اتحرقت، وبعدها البيوت الأقل تضرراً واجهاتها اتكسرت وأجزاء منها طارت، وحرفياً اتحولت بيروت لمدينة منكوبة بتعاني من دمار كبير.
– ومن وقت ما حصل الانفجار ده وظهرت أسباب كتيرة، البعض توقع إنه بسبب قصف إسرائيلي، وربط ده بالتوترات الأخيرة بين إسرائيل وحزب الله، والبعض تصور إنها قنابل أو أسلحة داخل الميناء أدت للانفجار ده.
– لكن بمرور الوقت وبحسب التصريحات الرسمية اللبنانية، اتضح إنه السبب هو انفجار في مستودع ومخزن فيه كميات كبيرة تصل ل 2700 طن من مادة نترات الأمونيوم وهي مادة شديدة الانفجار والخطورة، وتمت مصادرة الكمية دي من إحدى السفن في 2015، ومع ذلك متمش التخلص منها طول السنين دي.
– لسه مش واضح إيه سبب وصول النار للمخزن، فيه شهادات مختلفة إن البداية كانت حريق عادي، ورواية تانية إنهم عمال كانوا بيلحموا باب المخزن نفسه، غير روايات بتضيف احتمال التعمد أو القصف أو غيرها، لكن مفيش أدلة واضحة على ده حتى الآن.
– طبعاً شيء مرعب القدر ده من الإهمال في الأرواح اللي يخلي مستودع متفجرات بالخطورة دي يتساب لمدة سنوات بدون ما يحصل تخزينه بشكل آمن وبعيد عن المدينة، خصوصاً مع وجود حوادث عالمية شبيهة بسبب نفس المادة، زي في فرنسا والصين وأمريكا، وراح ضحيتها المئات.
– آثار الانفجار موقفتش عند الإصابات والوفيات والمفقودين اللي محدش عرف مصيرهم حتى الآن، المستشفيات اللبنانية وضعها صعب جدا، 4 مستشفيات خرجت من الخدمة تماما، والمستشفيات شغالة بدون كهرباء وعلى أنوار الموبايلات.
– كمان الانفجار طال مخازن رئيسية في الميناء للقمح والأدوية، وده بالاضافة لتزاحم السكان النهاردة على المحلات الباقية، أدى لمخاوف كبيرة من نقص الامدادات للعاصمة، في ظل أزمة اقتصادية صعبة جدا موجودة من الأصل.
*****
إيه ردود الأفعال لحد دلوقتي مصريا وعالميا؟
– على المستوى الرسمي المصري، مصر بدأت بالفعل إرسال طائرتين مساعدات طبية عاجلة للأشقاء في لبنان.
– الدكتور ياسر علوي، السفير المصري في لبنان، أعلن في بيان قبل ساعات ان مصر تسلمت قائمة بالمستلزمات في لبنان، وهتبدأ جسر جوي لنقل الأدوية والامدادات، وكمان طواقم طبية مصرية هيتم إرسالها، وده بتعاون بين الجهات الحكومية، والأزهر ومؤسسات المجتمع المدني حسب البيان.
– أحد المؤسسات دي مؤسسة مرسال المحترمة اللي قدمت دعم كبير وإنقاذ كبير لمواطنين مصريين وقت أزمة الكورونا بتوفير أماكن علاج ليهم، بدأت من الصبح في جمع تبرعات للأشقاء في لبنان وتواصلوا مع سفارتنا المصرية هناك.
– أيضا اانهاردة صباحاً السفير المصري في لبنان قام بزيارة المستشفى العسكري المصري في طرابلس، واللي تم فتحها لاستقبال المصابين، وهيا موجودة في بيروت من وقت حرب 2006.
– شيخ الأزهر أصدر بيان بيعلن فيه إرسال قافلة إنقاذ من الأزهر للشعب اللبناني، وقال إنها مش مجاملة ده واجب شرعي وإنساني على الدول العربية، والقافلة دي بتضم نخبة من أفضل أطباء جامعة الأزهر.
– كمان في تصريحات عن جسر جوي من الاحتياجات الأساسية هينطلق من مصر للبنان وده شيء عظيم جداً ونفتخر بيه الحقيقة.
– دول تانية كتير أعلنت عن تقديمها الدعم، عربياً الأردن والكويت وقطر والإمارات وغيرهم، ودوليا روسيا وقبرص وفرنسا والسويد، تشمل أطقم طبية ومساعدات دوائية وغذائية وطائرات هيلكوبتر للإطفاء.
– سياسيا الرئيس الفرنسي ماكرون أعلن إنه هيزور بيروت بكرة “الخميس”، وده تحرك لسه لم يعلن مثيل ليه أي مسؤول سياسي عربي.
*****
– شفنا للأسف خطاب بيحاول يستغل الأزمة سياسيا في مصر من ناس بتقول عشان تعرفوا قيمة الرئيس السيسي والحكم اللي انتو فيه، وده تكرار لخطاب شبيه اتقال عن ظروف سوريا والعراق. ده أولاً خطاب غير أخلاقي انك في لحظة أزمة زي دي تشاور على أصحاب المصيبة كإنهم مثل وعبرة، وثانياً ده خطاب سياسيا غير سليم لإن النظام اللبناني هوا بالعكس نموذج للي بيعمله غياب الديمقراطية الحقيقية والشفافية والمحاسبة، وده كان سبب خروج الشعب للشارع، مش العكس.
– وكمان إحنا في مصر حصل عندنا كوارث كتير بسبب العامل البشري، زي انفجار خزانات مواد كيميائية تابعة لشركة هليوبوليس قرب مطار القاهرة قبل سنتين، وزي حادث محطة رمسيس وغيرها من حوادث القطارات، وغيرها كتير.
– لبنان أصلاً فيها أزمة كبيرة كانت سبب اطلاق مظاهرات الثورة اللبنانية السنة اللي فاتت، واللي غطيناها في صفحتنا، لما الشباب خرج يهتف ضد الطائفية والفساد.
– حسب خبير بجامعة جون هوبكنز لبنان السنادي احتل المركز الثالث عالميا في معدل التضخم بعد فنزويلا وزمبابوي، ووصل المعدل في لبنان إلى 363%.
– الليرة فقدت أكتر من 80% من قيمتها، ومفيش نقد أجنبي في البلد اللي عايش على الإعانات من فترة، حكومة تسيير أعمال هي اللي موجودة وأعلنت إفلاس لبنان وعجزها عن سداد أي ديون، ونتيجة لده فاللبنانيين بياخدوا مرتباتهم وفلوسهم من البنوك بالتقسيط وبالعملة اللبنانية حتى اللي عنده حساب دولاري، وشفنا قبل الكورونا فديوهات كتيرة لتكسير وتخريب بنوك بسبب رفضها تسليم فلوس للناس.
– البنك الدولي توقع وصول نسبة السكان تحت خط الفقر إلى 75% في العام القادم، بالإضافة لارتفاع كبير جداً في أسعار المواد الغذائية، وفشل كبير في الخدمات الحكومية زي الكهرباء وجمع القمامة وغيرها، والسبب الرئيسي هوا نظام تقاسم السلطة طائفيا اللي بيحكم لبنان من وقت الحرب الأهلية، وزاد الوضع بسبب عقوبات أمريكية بسبب شراكة حزب الله في الحكومة واتهامات للحزب انه يستغل الميناء والمطار لصالح إيران وبشار الأسد، والوضع ده كان سبب الثورة اللي وقفت عملياً بسبب فيروس كورونا، ومن وقتها والبلد بتموت بالبطيء.
– الفشل والفساد والإهمال لما بيمسكوا في بلد وبيتمكنوا من الحكم بتكون النتايج كارثية دايماً على المواطنين، مهما كانت قوة الدولة دي حجم مواردها، الفساد زيه زي الإرهاب بيقتل وبيدمر دول ومجتمعات، وممكن إهمال وفساد وسوء إدارة يوصلوا بلد إنه تدمر أهم مدينة فيه، بس لمجرد إنه في مسؤولين مبيشوفوش شغلهم، فالنتيجة بتكون المشاهد المأساوية دي.
– بنكرر كل التعازي للشعب اللبناني في الوفيات، وكل التضامن والتعاطف والحب لإخواتنا وأشقائنا اللبنانيين، ونتمنى إنه الأزمة دي تنتهي وتعدي بسلام.
*****
المصادر
