العالم كله بيتابع أخبار وباء فيروس كورونا (كوفيد19) اللي وصل أكتر من 100 دولة، باجمالي أكتر من 182000 إصابة مؤكدة و 7000 وفاة حسب آخر ارقام النهاردة. هنتابع معاكم آخر التطورات في مصر والاجراءات الحكومية ونعيد تذكركم بطرق الوقاية الفردية.
*****
إيه الوضع الحالي في مصر؟
– بعد آخر تحديث من وزارة الصحة المصرية امبارح العدد عندنا في مصر بقى اجمالي 166 إصابة، و4 حالات وفاة منهم سائح ألماني و3 مصريين.
– الاصابات الجديدة امبارح كانت 40 حالة، منهم 8 راجعين من العمرة.
– وزيرة الصحة أعلنت وضع 300 أسرة في محافظة الدقهلية في العزل داخل منازلهم.
– من بين المصابين 7 طلاب، و26 ثبت شفائهم بشكل كامل، والباقين بيخضعو للرعاية الطبية.
– وزيرة الصحة قالت ان اكبر تركز للحالات كان في 3 محافظات هي المنيا والدقهلية ودمياط.
*****
ايه القرارات الحكومية اللي صدرت؟ ايه أثرها؟
لحد دلوقتي صدرت مجموعة من القرارات الايجابية بتقول انه بقى عندنا شعور رسمي بجدية وخطورة الموضوع:
١- الرئيس السيسي أصدر قرار بتعليق الدراسة من يوم السبت اللي فات لمدة أسبوعين، بالإضافة لعلاوة 7% للموظفين وتخصيص 100 مليار جنيه لمواجهة أزمة الكورونا.
ومجلس الوزراء امبارح الاتنين أخد قرارات اضافية ايجابية:
٢- قرار بتعليق جميع الرحلات بالمطارات المصرية من وإلى مصر بداية من يوم 19 مارس وحتى 31 مارس.
٣- إغلاق المراكز التعليمية والسناتر الخاصة وصالات الجيم والمراكز الرياضية، وقاعات الأفراح والمناسبات، وإغلاق الأسواق الشعبية في عدة محافظات، إغلاق المقاهي والكافيهات ومصادرة الشيشة.
٤- تخفيض عدد العاملين في أجهزة الدولة والمصالح الحكومية، وتعليق أي فعاليات جماهيرية، وإلغاء التوقيع بالبصمة.
٥- تطهير جميع المباني الحكومية للوزارات والمحافظات والإدارات المختلفة، وكذلك وسائل النقل الجماعي في القاهرة، وتطهير وتعقيم المدارس في مختلف المحافظات، وكذلك الفنادق والمنشآت السياحية.
٦- إخلاء عدة مدن جامعية من الطلاب لمدة 15 يومًا.
٧- قصر زيارة المرضى بالمستشفيات على شخصين يوميًا.
٨- منع إقامة أي مناسبات عزاء أو عقد قران في المساجد وملحقاتها، وإغلاق الأضرحة، وعدم فتح المساجد إلا في أوقات الصلاة وأن تكون مدة خطبة الجمعة 15 دقيقة فقط، وهيئة كبار علماء الأزهر قالت انه يجوز الغاء صلاة الجمعة وباقي صلوات الجماعة بسبب الخوف من الوباء.
٩- محاكم النقض ومجلس الدولة اللي علقو جلساتهم لمدة اسبوعين، وهيئة كبار العلماء قالت إنه يحوز إلغاء صلاة الجمعة وباقي الصلوات في المساجد بسبب الخوف من الوباء.
١٠- البنك المركزي أصدر قرارات ممتازة زي تخفيض سعر الفائدة 3% عشان التضخم وأسعار السلع ميزيدش، كمان تم استثناء السلع الاستراتيجية الأساسية زي (الرز، الفول، العدس) من الغطاء النقدي، تأجيل مواعيد أقساط قروض الشركات لمدة 6 شهور، وزيادة الحد الأقصى للسحب اليومي من البنوك.
*****
– الاجراءات دي ايجابية جدا، ونتمنى بالتعاون مع الجهود الفردية عند كل واحد فينا متضطرش الحكومة تاخد اجراءات أشد زي دول اخرى، زي إيطاليا اللي هي تاني أكثر بلد تأثرت بكورونا وفيها تم فرض إغلاق كامل أقرب لحظر تجول مفيش أي حاجة مفتوحة إلا محلات الأكل والمستشفيات والصيدليات والمصانع والشركات المرتبطة بأنشطتهم.
– كمان الدول العربية عملت اجراءات كتير زي السعودية قررت اغلاق الحرمين بعد صلاة العشاء، وتعليق شعائر العمرة، وقفلت المطاف والمسعى بين الصفا والمروة، وقفت رحلات الطيران الدولي لمدة أسبوعين، والكويت اللي قررت وقف صلاة الجمعة، وطلبت من الناس يصلوا في بيوتهم، وإيران اللي فيها تالت أكبر نسبة مصابين ووفيات بعد الصين وإيطاليا، خدت اجراءات مشابهة.
لكن الاجراءات الحكومية لسه ممكن يكون فيها أحسن:
١- محتاجين إعلان رسمي عن خطة المضاعفة السريعة لقدرة المستشفيات، وخصوصا غرف العناية المركزة واجهزة التنفس الصناعي زي ما دول تانية بتعمل .. في أسبانيا قررو اخضاع كل المستشفيات الخاصة بالكامل لوزارة الصحة، وفي بريطانيا رئيس الوزراء قال انه وجه الشركات تنتج بأقصى طاقة وبلا حد أقصى اجهزة تنفس صناعي.
٢- احنا بالفعل عندنا عجز كبير في اطباء وزارة الصحة اتكلمنا عنه سابقا، هل عندنا خطة سريعة لتعويض الفارق في حال الطواريء سواء بالتعاقد مع اطباء بالقطاع الخاص أو حتى جذب اطباء مصريين من العاملين بالخليج خاصة بعد الأزمة هناك؟
هل الـ ١٠٠ مليار جنيه اللي أعلن الرئيس تخصيصهم هيروحو في الاتجاه ده؟
هل هيتم مشاركة الشعب والبرلمان في معرفة طرق تدبير المبلغ وأوجه صرفه؟
٣- اجراءات اقتصادية عاجلة بعضها بدأ وبعضها لسه محتاجينه، سواء عشان القطاعات اللي اتضررت بشكل مباشر زي السياحة والطيران، أو بشكل عام لمواجهة الركود المتوقع خاصة بالمنشآت الصغيرة والمتوسطة، ده غير انه مطلوب الناس كلها تقعد في البيت .. في فرنسا اتوقف دفع الايجارات والفواتير، واكتر من دولة خفضت الضرائب، لدرجة بعض الدول فيها مطالبات حاليا بافكار زي “الدخل الأدنى الموحد” فلوس لكل الناس لتلبية الاحتياجات الادنى بدون الاضطرار للشغل.
٤-بالطبع مادامت منع أي تجمعات من الاولويات يبقى الافراج عن السجناء من الاولويات، سواء سجناء الرأي اللي الأصل انهم مكانوش يتسجنوا أصلا، او الجنائيين خاصة ذوي الاحكام الصغيرة واللي لا يمثلوا خطورة ممكن تتاخد اجراءات للافراج المبكر او على الاقل الافراج المؤقت زي ما حصل في إيران.
*****
– المخيف في الفيروس إنه لسه ملوش علاج وبينتشر بسرعة جدا، وبالتالي رغم انه شيء مطمئن ان نسب الوفيات محدودة 3.4٪ من الاصابات المؤكدة، وخاصة عند صغار السن بيخفوا، لكن مهم جدا التركيز في الوقاية عشان نحمي انفسنا وآبائنا وأمهاتنا.
– على مستوى العالم لحد امبارح كانت الارقام اكتر من 170 الف، منهم حوالي 6 الاف و500 شخص ماتوا، وحوالي 6 آلاف حالتهم خطيرة، و 77 ألف تم شفائهم بشكل كامل، و85 ألف مصاب حالتهم مستقرة وإصابتهم خفيفة.
*****
إيه أهم طرق الوقاية؟
– أهم خطوة هي غسل الايدين بدقة لان الفيروس ده بيعيش لفترات طويلة على الأسطح، الافضل لو الغسيل بمطهر كحولي، ولو مش متوفر ممكن الصابون اللي فيه نسب عالية من الكحول زي ديتول ولايف بوي، او برضه المياه والصابون العادي جدا بدقة لمدة ٢٠ ثانية هيكون كافي.
– تجنب لمس الوجه أو الفم والأنف والعين باليد غير المغسولة.
– تجنب السلام باليد على الآخرين والأحضان والقبلات.
– الرذاذ مصدر أساسي لنقل العدوى، لو مصاب بعطس أو زكام البس كمامة أو حط كم التي شيرت على وشك وانت بتعطس، وحافظ على مسافة كافية من كل اللي حواليك، وبلاش لمس أي أسطح.
– الطلبة اللي خدوا اجازة من الدراسة، وكذلك الأمهات، ضروري انهم يقعدو البيوت ويقللوا اختلاطهم بالناس . الهدف من الاجازة هو منع التجمعات الكبيرة، عشان كدا هتلاقي فيه دول زي النمسا منعت التجمعات لأكتر من 5 أشخاص، وبالمعنى ده لازم تجنب الأماكن اللي فيها ناس كتير زي النوادي الرياضية، السينما والجيم ومراكز الدروس الخصوصية، والمولات ومحلات السوبر ماركت الكبيرة والقهاوي والكافيهات وغيرها.
– بالمجمل محدش ينزل من بيته إلا لسبب ضروري لا يمكن الاستغناء عنه . متنسوش أبدا ان فترة الحضانة طويلة ووارد ميكونش ظاهر أي أعراض على شخص يحمل فيروس نشيط وعمال ينشره.
– بلاش أنانية وهجوم غير مبرر أو منطقي على السلع، اشتري اللي انت محتاجه فعلاً عشان متأذيش غيرك اللي محتاج برضه أكل وشرب، ورئيس الوزراء أكد أكتر من مرة إن مخزون السلع الموجود يكفي مصر لشهور طويلة، الهجوم ده هيبقى سبب في الزحمة وممكن انتشار عدوى لو في حد مريض موجود، وممكن يسبب زيادة في أسعار بعض السلع.
– لو انت مدخن لازم توقف التدخين في العموم، لكن مع حالة الكورونا فالموضوع ده خطر لأنه فيروس بيصيب الرئة والجهاز التنفسي، وكل يوم متشربش فيه سجاير ولا شيشة بيساهم أكتر في عدم إصابتك أو في زيادة قدرتك على مواجهة الفيروس.
– حاول بقدر الإمكان إن أكلك يبقى صحي وفيه خضار وفاكهة، فيتامين C مفيد جداً فياريت قدر الامكان بلا مبالغة نكتر من البرتقان واللمون والكيوي والجوافة والفراولة.
– لو ظهرت عليك أي علامات مرضية وشاكك انك مصاب بالفيروس، ما تروحش مستشفى عشان احتمال انك تنشر المرض، واطلب رقم 105 وهيوجهوك تتصرف ازاي.
– شرب المياة بالكمية الصحية (١.٥ الى ٢ لتر وتزيد في حالة الحمل والرضاعة) يوميا شئ ايجابي بشكل عام للمناعة.
نتمنى المرحلة الصعبة دي تعدي بأمان علينا وعلى بلادنا، بجهود كل واحد فينا وتعاوننا كلنا.
*****
