– أعلنت هيئة الأرصاد المصرية إن درجات الحرارة الأسبوع ده هتكون عالية وهتبلغ ذروتها انهردة الخميس، وده موجة شديدة الحرارة على الطقس في مصر بتوصل فيها درجة الحرارة في الظل لأكتر من 45 درجة مئوية.
– هيئة الأرصاد حذرت المواطنين من الخروج امبارح الاربعاء والنهاردة الخميس بشكل أكبر، بسبب صعوبة الطقس واحتمالات التعرض للإغماءات وضربات الشمس، وللسبب ده بعض القطاعات الحكومية والجامعات والأعمال الخاصة قررت تدي موظفيها أجازة.
– بشكل عام في الظروف اللي زي دي المفترض إنه الحكومة تبدأ تاخد احتياطاتها، خصوصاً وإنه الطقس ده مش مفاجئ وهيئة الأرصاد أعلنت عنه من أيام، زي إنه الدفاع المدني يرفع حالة الطوارئ عشان أي حرايق لاقدر الله ممكن تحصل نتيجة الحرارة الكبيرة ده، غير كمان تواجد الإسعاف في الطرق والميادين الرئيسية بشكل مسبق، عشان لاقدر الله برضه أي إصابة من ضربة شمس تلاقي إسعاف سريع.
– كمان بدل ما كل وزارة أو جامعة أو شركة تبلغ موظفينها إنهم ميجوش حسب رغبة المسؤل، إنه يتاخد قرار موحد حكومي من مجلس الوزراء بإعطاء أجازة عامة لكل الموظفين يوم كذا، وده مفروض له سند قانوني، لأن قانون العمل المصري بيدي حق للعمال الحصول على إجازة رسمية إذا كان نزولهم إلى العمل يعرضهم للأخطار الصحية وبما يحفظ السلامة والصحة والمهنية لهم، ورغم ان القانون الحالي مش بينص على ان من الحالات دي ارتفاع درجات الحرارة أو انخفاضها بشكل غير طبيعي، لكن ده مفروض انه ينطبق عليه حالات الأخطار.
– وبالمناسبة كمان قوانين العمل الدولية بتنص على منح العمال أجازة بمرتب في حال تجاوز درجة الحرارة 50 درجة مئوية، ودول زي الكويت، العراق، الامارات بتطبق ده على مواطنيها.
– مهم نفتكر كمان في أعمال بعينها خطر جداً في درجات الحرارة المرتفعة ده وللأسف أعمال زي نظافة الشوارع والبناء ودول معرضين أكتر للخطر والواجب إنهم ميشتغلوش في ظروف زي ده، وللأسف معظمهم هيكون مضطر للشغل لأنه إما مفيش أجازة رسمي أو إنهم قطاع خاص أو عمال باليومية ملهمش حقوق، وده شيء الجهات الرسمية مفروض تمنعه، واحنا كمواطنين دورنا نتعامل باحترام وانسانية مع الفئات الأضعف والأفقر ونساعد بما نستطيع.
*****
على المدى الطويل فيه نقاط تانية مهمة:
١- البنية التحتية اللي مهم تبقى بتضع في الاعتبار ارتفاع درجات الحرارة زي ما بيحصل في الخليج عشان تناسب التغير الحالي.
٢- الاهتمام بزيادة زراعة الأشجار في الشوارع عامل مهم جدا في تلطيف الجو، وللأسف بنشوف العكس بيحصل وقطع الأشجار مستمر بمختلف الحجج والأسباب.
٣- للأسف زيادة سعر الكهربا مؤخرا ولحد رفع الدعم عن الكهربا كاملا في 2022 حسب الخطة، يخالف اللي مفروض يحصل طالما أصبحنا من الدول اللي صيفها درجة حرارته فوق ال40 .. لكن على الأقل التكييفات والمراوح وأمثالها من وسائل التبريد لو مش هيتم دعمها، فعلى الأقل تتشال من عليها الضرائب الأساسية وضرائب القيمة المضافة لأنها معادتش سلع رفاهية بل ممكن تنقذ حياة انسان.
٥- قوانين العمل مفروض تتغير لنصوص واضحة لو درجة الحرارة زادت عن مستوى معين يكون متاح للموظف الغياب بأجر كامل
٦- وأخيرا، دورنا كبلد نامية في مواجهة الاحتباس الحراري والتغيرات المناخية، سواء بنفسنا أو بالضغط على الدول المؤثرة الكبرى، وده اتكلمنا عنه في بوست سابق.
*****
– كأفراد الأطباء بينصحوا دايماً بتجنب التعرض المباشر لأشعة الشمس في وقت زي ده، وشرب كتير من السوائل عشان تعوض المياه اللي هيفقدها الجسم، لكن في حالة الصوم فالوضع أكثر خطورة على الجسم وللسبب ده فاحنا بنشارك هيئة الأرصاد في تحذيراتها وبنأكد على ان كل واحد مننا ميخرجش النهارده إلا في حالة الضرورة القصوى ويكون واخد احتياطاته، وربنا يحفظ كل المصريين..
*****
