تجديد منزل وزير الدفاع الفريق السيسي بالحلمية

امبارح حاولنا نلاقي أدلة على كلام الفنان والمقاول #محمد_علي بإننا نطابق المواقع على التواريخ اللي قالها، باستخدام برنامج Google Earth Pro اللي بيوفر أرشيف من صور الأقمار الصناعية، وشفنا معاكم قصر وفيلات الهايكستيب والمعمورة.
النهاردة كررنا نفس الطريقة.

الصورة الأولى دي لمراحل تطور بناء مدخل مقابر القوات المسلحة على طريق الـ NA باتحاه محور المشير.
في 22 يوليو 2015 المكان صحرا.
فجأة في 2 أغسطس المكان خلية نحل، عربيات وومعدات كتير جدا بالموقع!
في 29 أغسطس بسرعة خارقة قدامنا الشكل النهائي خلصان، الشارع اترصف بالكامل، والبوابة العملاقة الفخمة اللي صورها بتتنشر من امبارح خلصت، وكمان النجيلة قدامها اتزرعت .. وفي باقي الصورة تحت اللي مش باينة هنا لدواعي المساحة (هننشر بزاوية أبعد في أول تعليق) هتشوفو ان الشارع الداخلي ده مكمل لمسافة جوا، وبينتهي ببوابة ضخمة داخلية مطابقة للبوابة الخارجية!
وكمان هتشوفو حصلت انشاءات جديدة في أول صف مقابر بعد البوابة الداخلية، لكن منقدرش نؤكد دي مقبرة جديدة وللا مبنى له غرض آخر.
كل الأعمال دي حصلت في كام يوم بس، اللي هيا بالظبط الأيام اللي اتكلم عنها محمد علي، هل دي صدفة؟!
وحسب رواية محمد علي إن السيدة والدة الرئيس السيسي توفيت إلى رحمة الله قبل افتتاح مشروع قناة السويس الجديدة (6 أغسطس 2015) فتم تأجيل الإعلان لحين الانتهاء من حفل افتاح المشروع ومن تجهيز منطقة المقابر. تم الاعلان رسميا في 17 أغسطس 2015.
اللي يخصنا هنا إن محمد علي بيقول ان الشغل عشان تخلص بالحجم والسرعة دي اتصرف عليه 2 مليون و300 ألف جنيه!
الإحداثيات وكل واحد يدخل يشوف بنفسه:
30° 1’20.64″N
31°21’12.79″E

****

في الصورة التانية مقر استراحة وزير الدفاع بحلمية الزيتون، لما راجعنا الصور بالتواريخ وطابقناها على العنوان المعروف ان استراحة المشير في آخر شارع متفرع من ميدان ابن الحكم، لقينا المواصفات على الأرجح تنطبق على المبنى ده تحديدا.
المبنى ده فضل شكله ثابت من أقدم صورة دقيقة متاحة سنة 2000 (الأرشيف يرجع لسنة 1972 لكن الصور الأقدم مش واضحة).
محمد علي حكى إنه تم تكليفه بتجديد المبنى فور تولي الفريق السيسي وزارة الدفاع، وده حصل في يوليو 2012، وان المشير السيسي زار المكان أكتر من مرة يعاينه مع أسرته، بما فيها وقت احداث الاتحادية يعني ديسمبر 2012.
في الصور قدامنا 15 سبتمبر 2012 المبنى القديم موجود.
1 يناير 2013 المبنى القديم اتهد بالفعل واتبنى مكانه مبنى آخر وأعمال بناء جارية بالمنطقة حوله.
10 مايو 2013 المبنى خلصان تماما بحديقته وحمام السباحة وكله، وبرضه بنفس طريقة السرعة الكبيرة ان الهدم والبناء والتشطيب كله خلص في كام شهر بس.
حسب كلام محمد علي الكلفة كان مفروض تكون حوالي 25 مليون، ووصلت بالتعديلات والإضافات اللي طلبتها أسرة الرئيس إلى 60 مليون جنيه.

الإحداثيات:
30° 7’0.77″N
31°19’37.31″E

****

بنقول “على الأرجح” لأن التأكيد اليقيني 100% مش دورنا، ده دور جهات التحقيق المستقلة، لكن هيا مين؟؟
النائب العام وقيادات الهيئات القضائية بما فيها النقض والدستورية كلهم يختارهم الرئيس بعد التعديلات الدستورية.
كل الأجهزة الرقابية الرئيس يعين رؤسائها بمزاجه أو يعزلهم بمزاجه.
المستشار هشام جنينة، رئيس الجهاز المركزي للمحاسبات، لما عمل شغله وقال عندي تقرير بالمستندات عن حجم الفساد – وأغلبه يتناول تخصيصات الأراضي وأعمال البناء زي قصص محمد علي – الرئيس غير القانون وعزله، وبعدها اتسجن!
أعضاء مجلس النواب كلنا عارفين الأجهزة الأمنية بتديرهم ازاي، وشفنا القبض على أعضاء أحزاب فكرو بس يترشحوا.
مفيش عندنا انتخابات محليات أًصلا من 2008، ومن قبلها كانت مزورة وأعضائها بلا صلاحيات.
وانتخابات الرئاسة شفنا كل المرشحين اتمنعوا أو اتسجنوا، لحد مهزلة إن الرئيس السيسي يترشح لوحده قدام مرشح يؤيده، وبعدها عدل الدستور عشان يمدد رئاسته حتى 2030!
والصحفيين طبعا ولا حد يقدر يفكر يصور في الأماكن دي أو يدور على مصادر أكيد متوافرة بآلاف العاملين بالمنشآت دي، لكن الإعلام كله تقريبا مملوك لشركات المخابرات، ده غير الصحفيين المسجنوني.
هيا دي خلاصة القضية، مش محمد على حرامي ولا بطل ولا أي حاجة تانية.
والبلد عمرها ما هتتخلص من الفساد، وعمر الشعب ما هيكون واثق في اللي بيسمعه، إلا لما تكون دولة ديمقراطية حقيقية، فصل يبن السلطات وجهات رقابية وقضائية مستقلة، وانتخابات محليات وبرلمان ورئاسة نزيهة، أي حاجة تاني هنفضل نشوف كل يوم محمد علي جديد.
***

رابط بوست تحليلي عن ما جاء بفيديوهات أسرار محمد علي – Mohamed Ali Secrets ونقاش هاديء للأسئلة الشائعة:
https://www.facebook.com/…/a.75908…/2011484465618107/…

***
فيديوهات سابقة لمحمد علي:

Journalist O