الموقف المصري | Egyptian Situation

الشهر اللي فات اتحكم على رئيسة كوريا الجنوبية بارك غوين هاي بالسجن 24 سنة، بعد ما كان تم عزلها من منصبها بسبب فضيحة فساد فجرتها الصحافة وتسببت بمظاهرات واسعة.
وده حصل رغم النجاح الاقتصادي في كوريا الجنوبية، ورغم انها بتواجه خطر أمن قومي من كوريا الشمالية، ورغم ان الرئيسة والدها يعتبره كثير من الكوريين زعيم تاريخي، كل ده ممنعش انه يتم عزلها وسجنها كمان.
*****

مين هي رئيسة كوريا الجنوبية؟
– بارك هي أول امرأة ترأس إحدى دول شمال شرق أسيا، صنفتها مجلة فوربس في المركز الـ11 لأقوى مائة سيدة في العالم.
– والدها باك تشونغ رئيس كوريا الجنوبية السابق كان استولى على السلطة بعد انقلاب عسكري سنة 1961 قال ان سببه الرئيسي هو محاربة المد الشيوعي، ولاحقاً تم اغتياله سنة 1979 من رئيس مخابراته وجه مكانه حاكم عسكري آخر، لحد ما أسفر نضال الأحزاب والحركات السياسية وضغوط دولية عن تعديل دستوري سنة 1987 سمح لأول مرة بانتخاب الشعب المباشر للرئيس وده كان تاريخ التحول الديموقراطي هناك.
– كتير من الكوريين بينظروا باعتزاز لوالد بارك، يتذكروه كبطل رفعت سياساته الصناعية البلاد من الدمار بعد الحرب الكورية 1950 وأنقذ الملايين من الفقر وبعهده بدأت كوريا مسار صناعة السيارات والالكترونيات بعد صعود مؤسسات زي هيونداي وسامسونغ.
– في سبتمبر 2012 بارك أثناء ترشحها للانتخابات أعلنت اعتذاراً علنياً عن انتهاكات والدها لحقوق الانسان، وفازت بالرئاسة في فبراير 2013.
*****

إيه اللي حصل بالظبط؟
– في نوفمبر 2016 فجرت وسائل إعلام كورية فضيحة فساد تورطت فيها تشون سون سيل، وهي ابنة زعيم طائفة دينية في كوريا الجنوبية، وهي الصديقة المقربة لبارك من قبل ما تبقى رئيسة، ونتيجة لصداقتهم القوية استخدمت ده في ممارسة نفوذ وفساد.
– كانت أهم الوقائع هي ان صديقة الرئيسة أجبرت مجموعة من رجال الاعمال ومديرين شركات عملاقة زي سامسونج على ملايين الدولارات كتبرعات لمؤسسات بتشرف عليها في مقابل بعض الامتيازات الحكومية، والمصدر اللي كشف ده للصحافة هو صاحب أحد شركات الملابس اللي كان على علاقة صداقة مع تشوي وحصل بينهم خلاف دفعه لفضح الموضوع.
– وكمان أمور أخرى بتدل على ممارسة تشوي لأعمال رسمية زي كتابة الخطابات السياسية للرئيسة، وهي معندهاش أي صفة رسمية عشان تقوم بالعمل ده.

– بناء على تحقيقات صحفية كشفت معلومات عن الموضوع القضاء اتحرك، وتم القبض على صديقة الرئيسة بارك، والرئيسة ظهرت في التلفزيون الرسمي تقر بمسؤوليتها وتعتذر عن اللي عملته صديقتها وعملت تغييرات وزارية.
– لكن الشعب رفض واعتبروا ان هيا كمان كانت عارفة ومتورطة، وخرج الملايين في مظاهرات بالعاصمة للمطالبة برحيلها.
– البرلمان الكوري وجه للرئيسة 16 اتهام باساءة استخدام السلطة وتلقي الرشاوي وتسريب أسرار الدولة، ورغم إنكار كل اتهامات الفساد، تم طرح التصويت في البرلمان على عزلها، وفي أقل من شهر تم التصويت بأغلبية النواب على القرار، وأيدت المحكمة الدستورية وقالت ان بارك انتهكت الدستور والقانون بفترة حكمها، وانه قرار العزل بمثابة حماية للدستور اللي بيكفل حق قرار عزل الرؤساء ومحاكمتهم.

– وفي نهاية مارس 2017 تم التحقيق القضائي مع الرئبسة بارك واتهامها باستغلال النفوذ وتلقي الرشاوي، وتم سجنها لغاية ما التحقيقات تخلص ويتم اجراء انتخابات جديدة.
– وأخيرا في 6 ابريل 2018 تم الحكم عليها بالسجن لمدة 24 سنة ودفع 17 مليون دولار غرامة.
*****

– نقدر من القصة دي نشوف مشهد فيه عناصر كتير غايبة جداً عننا.
– نقدر نشوف دولة متقدمة وناجحة اقتصادياً بالفعل، لكن ده ميخليهومش يطمنوا ويسلموا ثقة مفتوحة للي بيحكم، بالعكس ده يخليهم طول الوقت عندهم حرص ورقابة أكتر .. خاصة إنهم تاريخيا مكانوش كده طول عمرهم، دول عاشوا عقود طويلة تحت حكم دكتاتوري.
– نقدر نشوف صحافة حرة بتعمل دورها الرقابي لصالح الشعب لدرجة انها تقدر تنشر فضيحة فساد يتورط فيها الرئيس نفسه .. دور الصحافة ده بيساعد الدولة جداً في كشف الفساد والقصور وتخلي المعنيين سواء شعب أو نخب حاكمة يواجهوا الخلل ده.
– نقدر نشوف برلمان منتخب بنزاهة، بيمارس دوره في تمثيل صوت الناس الحقيقي عبر التشريع والمراقبة والمحاسبة السياسية، ده بيفيد جداً الدول في مكافحة الفساد، وفي الاستغلال الأمثل للموارد الاقتصادية وتحقيق ديمقراطية حقيقية فيها سيادة قانون على جميع المواطنين مهما كانت مناصبهم السياسية أو وضعهم الاجتماعي.
– نقدر نشوف مواطنين اتحركوا للضغط السياسي رغم ان البلد ديموقراطية وكان ممكن يسيبوها للنواب مثلا، لكن الناس اتحركت بأقصى طاقتها للدفاع عن حقها.
– ونشوف كمان قضاء اتحرك وعمل واجبه بانحياز وحيد للدستور والقانون.
– نتمنى في يوم غير بعيد نشوف ده في بلادنا، دي العناصر السياسية العامة اللي بوجودها بتتدار الدول بكفاءة أفضل وعبرها بيتم حل المشاكل التفصيلية المختلفة.
*****

– الصورة من المظاهرات في العاصمة سيول للمطالبة بعزل الرئيسة.