الموقف المصري | Egyptian Situation

– امبارح توفي الفنان عزت أبو عوف عن عمر 71 سنة، بعد ما قضى آخر شهر ونص من حياته في المستشفى لمشاكل صحية.

– عزت أبو عوف بدأ مشواره الفني بعد ما اتخرج من كلية الطب وعمل طبيب نساء، لكن حبه للموسيقى اللي اتعلمها من والده خلاه يتفرغ لها. وهو عنده 19 سنة، انضم لفرقة “Les petits chats/لوبوتيشا” مع كبار الموسيقيين زي عمر خورشيد وهاني شنودة وعمر خيرت.

– في السبعينات أسس فرقته الخاصة “4M” مع شقيقاته: مها ومنال وميرفت ومنى. واجهوا في الأول بعض المشاكل زي رفض الأسرة ذات الأصول الصعيدية دخول بناتهم في الغناء. واستمرت الفرقة 12 سنة بتقدم أغاني بتعبر عن جيل السبعينات والتمانينات اللي ارتبطوا بيها وما زالت علامة في ذاكرتهم.

– الفرقة قدمت أغاني قديمة ومعروفة زي الليلة الكبيرة، وتوبة، وقولي ولاتخبيش، بعد إعادة توزيع ألحانهم، وده كان مسبب لهم بعض المشاكل مع أصحاب الأغاني، اللي كانوا عايزين الأغاني تتقدم بالطريقة المعتادة.

– لكن كان أسلوبهم هو إعادة تقديم أغاني التراث الجميلة في مزيكا جديدة للأجيال الشابة، وده كان سبب كبير لنجاحهم، وتعتبر أهم مرحلة في عمر الفرقة بعد التعاون مع الشاعر الكبير صلاح جاهين. استمر النجاح ده لحد ما قرروا حل الفرقة في النهاية بعد زواج شقيقاته.

– استمرت أغاني “4M” لفترة طويلة تعرض في التلفزيون المصري، وكان ليهم شعبية كبيرة في العراق وعملوا فيه حفلات مميزة. الأغاني اللي قدمتها الفرقة زي: لا عجبه كده ولا كده، والمغنواتي، والولا ده، مع كلماتها اللي بتعكس البيئة المصرية، ومزيكتها المعاصرة، خلت ناس كتير ترتبط بيهم.

– بعد نهاية الفرقة قضى الفنان عزت أبو عوف فترة إحباط وملل، لحد ما المخرج خيري بشارة عرض عليه التمثيل في فيلم أيس كريم في جليم مع عمرو دياب، وده كان أول عمل يمثله ومكانش مرتاح للفكرة لأنه مفكرش في التمثيل قبل كده.

– لكن من التسعينيات، اشترك في مسلسلات كتير، زي: زيزينيا، هوانم جاردن سيتي، أوبرا عايدة، العمة نور، عباس الأبيض في اليوم الأسود. وأكتر من 34 فيلم. أشهرهم: بخيت وعديلة، أسرار البنات، طيور الظلام، اضحك الصورة تطلع حلوة، إسماعيلية رايح جاي.

– تولى رئاسة مهرجان القاهرة السينمائي الدولي من سنة 2006، ولمدة سبع دورات متتالية، وكتير نقاد وممثلين كانوا بيشهدوا بتميز أدائه، وتطور مستوى المهرجان وقت رئاسته ليه.

– عزت أبو عوف شارك لفترة المذيع عمرو أديب، في تقديم برنامج القاهرة اليوم، ودي كانت فرصة للتعرف على آرائه العامة الإيجابية بعيدا عن الفن.

– من الناحية اليياسية كان مؤمن بمبادئ ثورة يناير وداعم ليها جدا، وفي آخر دورة تحت رئاسته في مهرجان القاهرة السينمائي في 2012، أهدى الدورة لروح شهداء 25 يناير.

– قبل 30 يونيو 2013، ورغم إنه كان ضد حكم جماعة الإخوان، إلا إنه كان شايف الانتظار لحد معاد الانتخابات خلال 3 سنين، والتصويت ضدهم، أفضل طريق للتغيير. وكان متخوف إن 30 يونيو تجيب حد شبه مبارك ويقعد 30 سنة تاني (الفيديو في المصادر).

– عزت أبو عوف كان فنان متميز وقدم أدوار لا ينساها محب أو متابع للسينما والتلفزيون المصري، ومسيرته الفنية كانت مميزة وأسعدت كتير من المصريين.

– أسرة الموقف المصري بتقدم خالص العزاء لأسرة الفنان الراحل عزت أبو عوف، ولكل أصدقاءه ومحبيه وجمهوره.