فريق صفحة الموقف المصري بيعزي أسرة ومحبي الفنان الكبير الراحل حسن حسني، اللي توفى بأزمة قلبية مفاجئة عن عمر ٨٩ سنة قدم خلالها مئات الأعمال الفنية.
– الفنان حسن حسني من مواليد ١٩٣١، وبدأ في المسرح وبعدها انتقل للسينما ظهر في أفلام لسعاد حسني أميرة حبي أنا سنة ١٩٧٤، والكرنك ١٩٧٥، وانتقل للتلفزيون كان أول مسلسل يعرفه الجمهور بيه هوا “أبنائي الأعزاء شكرا” مع الفنان عبدالمنعم مدبولي.
– وشارك بعدها في أعمال كتير معروفة زي رأفت الهجان وبوابة الحلواني ودماء على الأسفلت، شارك أحمد زكي ونور الشريف وعادل إمام وغيرهم.
– في ١٩٩٣ أخد جائزة أحسن ممثل بمهرجان الاسكندرية السينمائي عن دوره بفيلم فارس المدينة من اخراج محمد خان.
– مع ظهور موجة النجوم الشباب الجدد فاجيء حسن حسني متابعيه بابداعه في أدوار الكوميديا، وأخد ألقاب “تميمة الحظ” و”القشاش” وغيرها بسبب كتر مشاركاته وروحه الجميلة مع الشباب.
– نفتكر بالمرحلة دي أدوار كتير جدا، مثلا مع كريم عبدالعزيز في الباشا تلميذ، ومع محمد سعد في اللمبي واللي بالي بالك وكتكوت، ومع أحمد السقا في أفريكانو، ومع أحمد عيد في ليلة سقوط بغداد، ومع هاني رمزي في محامي خلع وغبي منه فيه، ومع الراحل علاء ولي الدين في الناظر وعبود على الحدود.
– الفنان حسن حسني اتعرف عنه التركيز في الفن وبس، وكان نادر جدا في الحوارات القليلة اللي عملها انه يتكلم عن أي حاجة بره شغله اللي بيحبه.
*****
– في ٢٠١٣ اتوفت بنته رشا بعد معاناة مع السرطان، وده أثر جدا عليه وظهوره بقى أقل بكتير جدا من وقتها.
– آخر ظهور ليه كان دوره بمسلسلة سلطانة المعز في رمضان الماضي.
– من أواخر مرات ظهوره على الجمهور كان وقت تكريمه في الدورة الأربعين لمهرجان القاهرة السينمائي سنة ٢٠١٨ وكان مبسوط جدا ومتأثر جدا.
– كل دعائنا للفنان الراحل، وعزائنا لمحبيه، ونتمنى دايما نفتكر ونقدر اللي بنحبهم سواء شخصيات حوالينا في عائلاتنا أو شخصيات عامة أثناء حياتهم وقبل وفاتهم.