الموقف المصري | Egyptian Situation

أسرة صفحة الموقف المصري بتقدم العزاء لأسرة العالم الكبير الدكتور عادل محمود، ولكل المصريين، ومش بنبالغ لو قلنا وللبشرية كلها بسبب انجازاته اللي أنقذت الملايين.
– كتير من الشخصيات المؤثرة في العالم نعوا د.عادل، زي التغريدة المرفقة لبيل جيتس وهو بيقول إن “العالم فقد أحد أعظم صناع التطعيمات في عصرنا”
*****

إيه قصة د.عادل؟
– د.عادل اتولد فى القاهرة في 24 أغسطس 1941 لأب يعمل مهندس زراعي، مات وهوا عنده عشر سنين بسبب التهاب رئوي، وأم لم تكمل تعليمها بسبب رفض أخوها في الوقت ده انها تدخل كليه الطب.
– درس في كلية الطب جامعة القاهرة، وتخرج فى سنة 1963.
– بعد هزيمة يونيو 1967 حصلت موجة من هجرة الشباب المصري، وفي الوقت ده هاجر د.عادل سنة 1968 إلى لندن اللي درس فيها وأخد دكتوراة من كلية لندن للصحة وطب المناطق الحارة.
– بعد كده انتقل إلى لأمريكا وكمل شغله البحثي في جامعة كيس ويسترن ريزيرف Case Western Reserve ، اترقى في مناصب مختلفة، وترأس قسم الطب في الجامعة في الفترة من 1987 إلى 1998.
– شغل منصب رئيس الجمعية الدولية للأمراض المعدية من 1990 إلي 1992، وعمل مستشارا لأكبر مؤسسات وشركات الأبحاث الدوائية فى العالم، وكمان استغل كمستشار لمنظمة الصحة العالمية.
– عمل كرئيس لشركة ميرك أحد أكبر واقدم شركات الأدوية العالمية من 1998 ل 2006، وأثناء شغله حقق انجازاته الشهيرة .. طور لقاح (تطعيم) ضد” فيروس الورم الحليمي البشري – hpv ” المسبب لسرطان عنق الرحم، وهو أحد اخطر الأمراض اللى كانت بتهدد حياة الأمهات حوالين العالم، كمان طور لقاح تاني يمنع عدوى فيروس الروتا – Rota virus، وهو فيروس بييجي الأطفال الرضع بيسبب الموت.
– كمان ساهم فى تطوير عدد من اللقاحات لمكافحة أمراض الحصبة، النّكاف، الحصبة الألمانية، جديري الماء، القوباء المنطقية.
– بعد تقاعده فى عام 2006 تفرغ للتدريس فى جامعة برينستون واشتغل محاضر فى قسم البيولوجيا الجزئية فى الجامعة.
– كمان اشتغل في مجال تاني هوا السياسات الصحية اللي كتب فيها أبحاث مهمة، واشتغل كأستاذ للسياسات الصحية فى كلية ودرو ويلسون للسياسات العامة والدولية.
– شارك الدكتور عادل مع زمايله في السعي لإيجاد تمويل عالمي لمكافحة فيروس الايبولا اللى ظهر فى غرب افريقيا فى عام 2014.
*****

– البروفسير عادل وغيره من أمثلة كتير للمصريين اللي قدروا يكونوا في أعلى الأماكن على مستوى العالم، هو تأكيد على أنه الظروف المحيطة ليها دور كبير في نجاح الشخص مش أقل من الموهبة والاجتهاد الشخصيين.
– توفير البيئة المناسبة والامكانات، وزيادة الانفاق على البحث العلمي فى البلد دي، كان ممكن يحافظ على الكفاءات دي، لكن عوامل كتير منعت ده بداية من البيروقراطية وسوء الادارة وحتى غياب الإرادة السياسية للاهتمام بالبحث العلمي .. بينما نشوف أعلى جهات الدولة رحبت بمهرج بيعمل أدوية وهمة لعلاج الإيدز وفيرس سي ولحد النهاردة محدش اتحاسب!
– أو على الأقل بعد ما سافروا ونجحوا بره ليه محصلش تواصل للاستفادة منهم، واحد زي د.عادل ليه محدش فكر يستشيره في مجال السياسات الصحية؟
– رحل العالم الجليل فى صمت بدون أن يحصل على التقدير من بلده الأم، لكن عزائنا انه حصل على التقدير من العالم كله، ربنا يرحمه ويجزيه الخير بقدر ما أفاد البشرية بعلمه وساعد فى إنقاذ حياة الملايين.