الموقف المصري | Egyptian Situation

– الفيديو اللي قدامنا ده لمشاهد من هجوم قوات الشرطة على تشييع جنازة عويس الراوي، ابن قرية العوامية بالأقصر.

– حسب القصص المتداولة على صفحات أهالي القرية اللي حصل إن الشرطة راحت تفتش البيت لاعتقال شقيق عويس لإن حد بلغ انه شارك بالمظاهرات، الأسرة قالت انه غير موجود، الظابط ضرب والد عويس بالقلم، فعويس رد القلم للظابط، فطلع مسدسه وضربه بالرصاص فورا!

– منقدرش نتأكد ان القصة دي سليمة أو لا، وللأسف مفيش بيان من النيابة يحقق ويطلب فحص الطب الشرعي رغم ان حسم مسألة وجود رصاصة ميري أو لا أمر ممكن جدا، ولا فيه صحافة مستقلة تنقل عن شهود عيان .. لكن الواضح إن دي القصة المنتشرة في القرية وبسببها تحولت جنازة عويس لمظاهرة وهتافات واجهتها الشرطة بقنابل الغاز ومطاردة الناس وسط البيوت في مشاهد مؤسفة ومؤلمة.

– نفس المشهد ده شفناه قبل أقل من شهر في المنيب لما اتقتل إسلام الاسترالي، وظهر في الآخر ان الأهالي كان عندهم حق، والنيابة وجهت الاتهام رسميا لظابط و٣ أمناء شرطة.

– كل التضامن مع أهالي العوامية ومع كل مظلوم، ونتمنى يحصل تعامل سريع عاقل يسمع صوت الناس ويحاسب المخطيء، والأهم يحصل تعامل سياسي يراجع المسار الحالي بشكل شامل.