– النهارده مع غروب الشمس (حوالي الساعة 5 مساءا بتوقيت القاهرة) هتنطلق احتفالية في شكل موكب ملكي لنقل 22 مومياء من المتحف المصري بالتحرير إلى متحف الحضارة بالفسطاط.
– خط سير الموكب هيكون من متحف التحرير، وهيطوف حوالين الميدان، وبعدين هتكون المحطة التانية “ميدان سيمون بوليفار”، وبعدين المحطة التالتة الاتجاه إلى كورنيش النيل حتى السيدة زينب، وبعدين المحطة الرابعة الاتجاه إلي مصر القديمة حتى مدينة الفسطاط لحد ما توصل مقرها في متحف الحضارة.
– الموكب هيستمر لمدة ساعة تقريبا، وعند وصوله من المفترض هيكون في استقبالهم الرئيس السيسي، وبمشاركة الأمين العام لمنظمة السياحة العالمية وشخصيات فنية ورياضية وثقافية.
– مئات من وسائل الإعلام العالمية هتغطي الحدث وهيكون فرصة ترويجية للسياحة بشكل جيد جداً، خاصة إن فكرة النقل لمتحف الحضارة مش كل الآثار الفرعونية في المتحف الكبير الجديد فقط من أهدافها تسليط الضوء على المتاحف والمنطقة الأثرية المجاورة في مصر القديمة والفسطاط اللي مش بنفس شهرة منطقة الهرم، دا غير الرمزية الحضارية والتاريخية للخطوة.
– الموضوع لم يخلو من جدل في بعض النقاط، زي مسألة اختيار الفنانين اللي كان فيها كلام سخيف من ناس رافضين وجود هند صبري، رغم إنها معاها الجنسية المصرية ومتجوزة مصري، وفوق كدة عظمة مصر دايما انها تستوعب المميزين من خارجها و”يتمصروا” فيها زي كتير من رواد الفن والأدب، لكن اصابتها بالكورونا وقفت النقاش ده.
ده غير مسألة عدم السماح بالمشاركة الشعبية بأماكن مرور الموكب تحت حجة المخاوف الأمنية.
– بنشكر كل المساهمين في الفكرة والعمل عليها، وبندعو كل المصريين لمتابعة الحدث، ونتمنى إنه يخرج بأفضل صورة مشرفة لبلدنا، ويكون مردوده إيجابي ويعود علينا كلنا.