– قبل أيام مجلس الوزراء نشر بيان عن حصاد عمل منظومة الشكاوى الإلكترونية الحكومية الموحدة سنة 2019 .. بالتأكيد شيء إيجابي تطوير منظومة العمل الحكومي، ونتمنى يكون للموضوع أثر إيجابي فعلا على المواطنين.
عشان كده بنسأل أعضاء الصفحة هل سمعتو عن المنظومة؟ واللي جربها هل كانت مفيدة؟ ونتمنى ده يساعد في شفافية التقييم وفي تطوير الأفكار.
– المنظومة اتأسست في يوليو 2017، بقرار من رئيس الجمهورية، لتلقى جميع شكاوى المواطنين للجهات الحكومية والرد عليها إلكترونيًا.
– الشكاوى بيتم استقبالها سواء على الموقع الالكتروني: أضغط
هناأو برسايل على الواتس آب على الأرقام دي: 01555516528- 01555520444
*****
– حسب التقرير اللي اتسلم لمجلس الوزراء خلال العام الأخير، المنظومة استقبلت 640 ألف شكوى، وده عدد أكبر من الشكاوي سنة 2018 بنسبة 50%.
– اللي تم مراجعته من شكاوى السنة الأخيرة كان 638 ألف شكوى اتحسم منها 493 ألف شكوى، وتم حفظ 135 ألف، لأسباب زي التكرار، عدم الاختصاص، عدم صحة بيانات ومحتويات الشكوى، أو زوال أسبابها.
– 72% من الشكاوى في 2019، كانت متعلقة بالمواضيع دي: التموين، الإسكان والمرافق، التأمينات والمعاشات والتضامن الاجتماعي، القوى العاملة والتشغيل، التعليم، والصحة.
– نص الشكاوي تقريباً كانت من سكان القاهرة والاسكندرية، بنسبة 47%، في حين وصلت شكاوى سكان الدلتا 34%، والصعيد 14%، والمحافظات الحدودية ومحافظات القناة وصلوا 5%.
– أما الأحياء اللي وصلت منها أكبر عدد من الشكاوى، فكانت المنتزه وشرق بمحافظة الإسكندرية، والهرم بمحافظة الجيزة ومدينة نصر بمحافظة القاهرة ومركز المنصورة بمحافظة الدقهلية.
– موضوعات الشكاوى كانت متنوعة، لكن كان منها على سبيل المثال، الاستبعاد من منظومة الدعم، أو الإبلاغ عن أماكن يتواجد بها أشخاص بلا مأوي، أو المطالبة بتنفيذ قرارات إزالة مباني مخالفة، أو طلب تسهيل إجراءات صرف معاشات، أو طلب المساعدة في إصدار قرارات علاج على نفقة الدولة والتأمين الصحي، وغيرها.
*****
– كلامنا وتبادلنا التجارب هو وسيلة مهمة للرقابة والمشاركة المجتمعية، وكمان نتمنى لو القائمين على المشروع بيتابعوا ردود أفعال المواطنين ومدى رضاهم عن الخدمة أكيد ده هيساهم في تطوير التجربة وتقديمها بشكل أفضل لصالحنا كلنا.
– احكو عن تجاربكم مع المنظومة:
*إيه المشاكل اللي لجأتم لحلها عبر المنظومة؟
*وايه الرد اللي جالكم؟
*واستغرق إد إيه من الوقت؟
*وهل كان الحل مرضي ليكم ولا لا؟
*وفي حالة حفظ أي شكوى اتقدمتوا بيها، هل تم ابلاغكم عن السبب؟
*إيه اللي محتاجينه عشان المنظومة دي وغيرها من الخدمات الالكترونية تكون افضل؟