الموقف المصري | Egyptian Situation

اللي شايفينه في الصورة ده المهندس أحمد بدوي، اللي وقف لوحده وهوا ماسك لافتة ضد التعديلات الدستورية في التجمع الخامس في تاني يوم للاستفتاء فاتقبض عليه من وقتها، رغم انه معملش أي مخالفة قانونية، دي مش مظاهرة أو تجمهر أو تعطيل مرور، ومفروض انه عادي دي يافطة واحدة قصاد العدد الرهيب من لافتات الدعاية ل (نعم)!
-المهندس أحمد مش الوحيد اللي اتقبض عليه بأيام الاستفتاء، كمان تقبص على أمين العمل الجماهيري بحزب الدستور أمير عيسى، لما حاول تصوير مخالفات أمام لجنة الاستفتاء بقليوب.
– كمان اتقبض على الصحفية عبير الصفتي عضوة حزب العيش والحرية، اللي رفضت محاولة الشرطة إجبارها على التصويت في الاستفتاء، أثناء ركوبها ميكروباص من القاهرة لبلدها كفر الدوار، وكمان اتقبض على شاب رابع اسمه محمد عبدالقوي.

– الأربعة فضلوا مختفين قسريا حوالي أسبوع محدش يعرف عنهم أي حاجة، وبعدين ظهروا قدام نيابة أمن الدولة العليا، اللي قررت حبسهم ٢٥ يوم على ذمة قصية جديدة بالتهم الغريبة المكررة زي “تهديد أمن وسلامة المجتمع”.
*****

– قصة المهندس بدوي عن الدكتور أحمد محيي اللي رفع لوحده يافطة في ميدان التحرير مكتوب فيها “إرحل يا سيسي” بعد حادثة القطر قبل شهرين وهو مسجون من ساعتها.

– كل ده بيحصل في ظل استمرار حبس أعضاء حزبي الدستور والكرامة اللي اتقبض عليهم قبل الاستفتاء.

– في يناير اتقبض على 5 أعضاء بحزب الكرامة، بعد يوم واحد من محاصرة مقر الحزب باحتفالية ثورة يناير وجمع بيانات الحاضرين اللي كان منهم الشباب دول، وأحدهم خالد بسيوني طالب الثانوية العامة المهدد ان السنة تضيع عليه.

– وفي فبراير اللي فات مع الإعلان عن التعديلات، تم القبض على 4 من أعضاء حزب الدستور، هم جمال فاضل، وهلال المصري وأحمد الرسام (أمين الإعلام بالحزب) ورمضان محمد، وتم اتهامهم بمساندة جماعة ارهابية على تحقيق اهدافها!

– في الخطاب الأخير للرئيس السيسي، قال إنه سعيد بنتيجة الاستفتاء، وبالنص قال: “بغض النظر عن النتيجة، مفيش في الوجود اللي إحنا فيه ده حاجة عليها إجماع كامل، ففيه ناس هتقول آه ونقبلها وناس هتقول لأ ونقبلها” وقال كمان ان استمراره او عدم استمراره بمنصبه هيكون بناء على رغبة المصريين بالانتخابات.
– لكن زي ما احنا شايفين ده بعيد تماما عن الواقع، وإذا كان ده اللي بيحصل لأعضاء وقيادات الأحزاب اللي بتشتغل بشكل قانوني رسمي وسلمي، الدولة بتحاربها وتتهم أعضائها بالانضمام لجماعة ارهابية، فايه اللي بيحصل للمعارضين خارج الأحزاب أو أي مواطن؟ وازاي بعدين يقولو مفيش بديل والاحزاب عضويتها قليلة ومش واصلة للناس؟
كل التحية والتضامن مع جدع بيضحي عشان بلده تكون أفضل، ونتمنى يتغير الوضع ده على يد العمل الجماعي من كل مصري ايجابي.
*****