– قبل ساعات تسلم الممثل المصري رامي يوسف جايزة الجولدن جلوب لأفضل ممثل في مسلسل تلفزيوني كوميدي، عن دوره في المسلسل الأمريكي المسمى باسمه “رامي”، اللي بدأ يتعرض في أبريل الماضي.
– رامي هو ممثل مصري أمريكي، اتولد في أمريكا سنة 1991 لأسرة مصرية عايشة في نيويورك. بدأ رحلته الفنية وهو صغير في بداية الألفينات، من خلال كوميديا الستاند أب (عروض فردية كوميدية على المسرح)، وشارك في مسلسل Mr robot مع المصري الأمريكي رامي مالك. كمان شارك في فيلم الأنيميشن “Hump” بالأداء الصوتي لشخصية عمر.
– بدأت أنظار صناع السينما في هوليود تتلفت ليه بشكل أكبر سنة 2017، لما شارك في البرنامج الشهير The Late Show مع ستيفن كولبير، اللي بيتعرض على قناة CBS، وكانت من أشهر وأنجح مشاركاته، وأدى بعدها أدوار في أعمال مختلفة.
– قصة مسلسل “رامي” مستوحاه من تجربة وحياة رامي يوسف، اللي كمان قام بتأليف المسلسل وإنتاجه وإخراجه، بالإضافة لدور البطولة اللي خد بيه الجايزة.
– بيحكي بشكل كوميدي عن شاب مسلم اسمه “رامي حسن”، مولود في نيوجيرسي لأب مصري وأم فلسطينية، بيحاول يحقق توازن بين كونه مصري مسلم وأمريكي، وبيفتخر بتراثه وجذوره الإسلامية، ومش عايز يتخلى عن عاداته، وفي نفس الوقت عايز يكون منفتح على المجتمع الأمريكي العلماني، وعايش في صراع طول الوقت بين الرغبتين دول.
– المسلسل بيعرض شكل الحياة اليومية اللي بيعيشها المسلمين في أمريكا، والأسئلة والقضايا الخاصة بمجتمعهم، وكمان من أهدافه تغيير النظرة النمطية عن العرب والمسلمين اللي عايشين هناك، ويمحي الخوف المرتبط بربطهم بالإرهاب في ظل الأحداث الدائمة القادمة من الشرق الأوسط في نشرات الأخبار، وجايز عشان كده بدأ كلمته بعد اعلان فوزه بانه قال “الله أكبر” اللي عادة بتدي انطباع سلبي أمريكيا لأنهم بيسمعوها مع العمليات الإرهابية.
– على عكس بعض الأعمال التانية اللي بتعرض اندماج أبناء المهاجرين في أمريكا عن طريق التخلي الكامل عن ثقافتهم والتحول لنسخ من الأمريكيين، مسلسل رامي ضمن أحداثه عودته لمصر عشان يقوى ارتباطه بيها، وفي حلقتين من المسلسل اتصوروا في مصر.
– كمان فيه عرب آخرين شاركوا في البطولة، زي الفلسطينية هيام عباس اللي قامت بدور والدته، وعمرو واكد اللي مثل دور والده.
– أول ما تم إعلان فوز رامي اشتغلت موسيقى من تأليف الفنان هاني شنودة، هيا مقطوعة عنوانها “لونجا 79” قدمها مع فرقة المصريين، وبعدين بقت هيا موسيقى برنامج الكاميرا في الملعب اللي كان بيتذاع في التسعينات، ودي اشارة ايجابية للتقدير المستحق لفنان مهم وليه ابداعات موسيقية كتير.
– مسلسل رامي كان من الأعمال المرشحة لجائزة جوثام للأفلام المستقلة، فئة “المسلسل الخارق – النسخة القصيرة”، ورامي يوسف نفسه مرشح حاليا ليكون أفضل ممثل في مسلسل كوميدي، في جائزة اختيار النقاد للتلفزيون، عن دوره في نفس المسلسل.
– نجاح المسلسل وإشادة النقاد بيه، دفعت شبكة HBO، للتعاقد مع رامي، لصنع برنامج كوميدي جديد هيتصور في نيويورك.
– جايزة جولدن جلوب اللي حصل عليها رامي النهارده، من اهم الجوايز في مجال التلفزيون والسينما، بتقدمها رابطة هوليوود للصحافة الأجنبية بداية من سنة 1944، وتعتبر من أهم المؤشرات على حظوظ الفنانين في جايزة الأوسكار.
– رامي يوسف مش أول مصري يفوز بالجولدن جلوب، رامي مالك خد الجايزة السنة اللي فاتت عن دوره في فيلم بوهيميان رابسودي اللي حصل كمان على الاوسكار لنفس الدور، كمان اترشح 3 مرات ليها عن دوره بمسلسل Mr robot لكن ماحالفوش الحظ.
وطبعا مننساش تاريخيا الفنان الكبير الراحل عمر الشريف اللي حصل على الجايزة 3 مرات.
– صناعة السينما والمسلسلات مش رفاهية، دي حاليا بتمثل مصدر دخل قومي بمليارات الدولارات بشكل مباشر عبر أرباحها والعاملين بها، أو بشكل غير مباشر عبر السياحة والقوى الناعمة. ونتمنى نشوف في مصر مراجعة جادة لمجمل السياسات المتعلقة بالمجال ده خاصة ان بلدنا عندها بالفعل بنية تحتية قوية في الانتاج الفني بالنسبة لمنطقتنا العربية.
– كل التوفيق لرامي في أعماله القادمة، وللشباب المصريين المجتهدين عموما في كل المجالات داخل وخارج مصر.