– يوم الجمعة اللي فات، فيلم مصري قصير اسمه توك توك للمخرج محمد خضر فاز بجائزة أفضل فيلم روائي قصير في مهرجان “بان أفريكان” في مدينة لوس أنجلوس الأمريكية، وده يؤهل الفيلم للمنافسة في الأوسكار.
– دي المشاركة التانية للفيلم في مهرجان مؤهل للأوسكار بعد مهرجان “كليفلاند”، ويعرض الفيلم الآن في مهرجان “دربان” السينمائي الدولي في جنوب إفريقيا، واللي بيقام في الفترة من 22 يوليو، وحتى 1 أغسطس.
– ده حصل بعد أيام من فوز الفيلم المصري “ريش” بالجائزة الكبرى لأسبوع النقاد في مهرجان كان، هنتعرف في السطور الجاية على قصص وأبطال الفيلمين.
****
توكتوك.. حكاية آلاف المصريات الغارمات
-فيلم توك توك مستوحى من قصة حقيقية، عن شابة اسمها ولاء، بتحاول توفير دخل لعائلتها بعد ما زوجها هاجر برا البلد بطريقة غير شرعية. الظروف المعيشية الصعبة، ومسؤليتها عن أبنائها، وعلاج أمها المريضة بورم في المخ، أجبروها على العمل كسائقة توكتوك.
– ولاء بتقابل كتير من المشاكل، زي العنف والتحرش وسيطرة الذكور على سوق التكاتك، وبتحاول تتغلب على الظروف دي، وينتهى بها الحال في السجن بعد ما أصبحت من الغارمات، لما عجزت عن تسديد ديونها.
– مخرج الفيلم محمد خضر بيقول إنه عرف قصة ولاء خلال اجتماع مع جمعية مصر الخير، كانو ا بيناقشوا فيه أوضاع الستات اللي الجمعية بتساعدهم، لكن القصة علقت في ذهنه، واختار هو وفريق العمل انهم يحكو قصتها من خلال فيلم قصير.
– الفيلم فاز أيضا بجائزة مهرجان فاتن حمامة في لندن كأحسن فيلم وأحسن تصوير.
– الفيلم من إنتاج رامي يعقوب، وشيرين علاء ومحمد خضر وشاركه في التأليف شريف عبدالهادي وهو من بطولة الهام وجدي، وأشرف مهدي، ومحمد خميس، وندى اكرم، وعمر راشد، وماري جرجس ومنتج فني يحيى الغريب، موسيقى تصويرية سيف الدين هلال، ومن إخراج وتصوير ومونتاج محمد خضر.
****
ريش.. حكاية الأم المعيلة
– فيلم ريش هو أول فيلم طويل للمخرج عمر الزهيري، وفاز بالجائزة الكبرى في مسابقة أسبوع النقاد الرسمية من مهرجان كان السينمائي واللي أقيم في الفترة من 7 وحتى 15 يوليو.
– دي المرة التانية لفيلم مصري يفوز بجائزة ضمن مهرجان كان، بعد أن حصل فيلم “ستاشر” للمخرج سامح علاء على السعفة الذهبية لأفضل فيلم قصير في العام الماضي.
– ريش هو أول فيلم مصري يفوز بالجائزة دي، وهو واحد من فيلمين عربيين دخلوا المنافسة في المسابقة، اللي بتضم سبعة أفلام.
– قصة فيلم ريش بتتناول أوضاع المرأة المعيلة، وبعض المشكلات الاجتماعية والاقتصادية بالنقد الساخر. وهو من إنتاج مصري فرنسي هولندي يوناني مشترك، وساهم في إنتاجه من مصر المنتج والمخرج محمد حفظي.
– الفيلم بيقدم صورة ممزوجة من الواقع والخيال، بيحكى قصة أم كانت معتمدة بشكل كامل على زوجها، وبتلاقي نفسها فجأة مسؤولة بشكل كامل عن أسرة المكونة من 3 أطفال، بعد ما الأب اتحول لدجاجة بالخطأ على يد ساحر جابه يسلي ولاده في عيد ميلاد ابنه الكبير.
– بتقرر الأم تعيش مع الدجاجة على أمل انها تتحول تاني ويرجع زوجها. بتنزل تشتغل في بيئة معادية للستات، وبتواجه قسوة الحياة وتحرش من صديق الزوج، لحد ما الزوج بيرجع للواقع مرة تانية لكنه رجع مشلول، وبيضيف عبء جديد على المرأة اللي بتشتغل وترعى أطفال منهم طفل رضيع، وزوج غير قادر على الحركة.
– فيلم ريش دا يعتبر أول فيلم طويل لمخرجه عمر الزهيري، وشارك في التأليف مع أحمد عامر، وهو من إنتاج أكثر من جهة منها جولييت لوبوتر وبيير مناهيم من خلال شركة “ستل موفنغ” (STILL MOVING) في فرنسا، ومصر من خلال شركة فيلم كلينك والمنتج محمد حفظي، هولندا واليونان، “لاغوني فيلم برودكشن” (Lagoonie Film Productions) للمنتجة شاهيناز العقاد.
-أسرة الموقف المصري بتبارك لصناع الفيلمين على النجاح اللي حققوه، واللي متوقع يحققوه الفترة الجاية، وتتمنى التوفيق لكل مصري مجتهد أيا كان مجاله.