الموقف المصري | Egyptian Situation

– كتير من المصريين لما بيسافرو بره من أول الحاجات اللي بيلاحظوها فرق سرعة الإنترنت، والحقيقة ده مش رفاهية إطلاقا، ده بقى عنصر مهم لاقتصاد البلد ككل، أو لشغل قطاع كبير من الأفراد.

– في البوست ده هنعرض لكم نتائج مؤشر سرعة الإنترنت في العالم، ونناقش إيه تأثير ده على الاقتصاد؟ وايه اللي ممكن يتعمل عشان يتحسن الوضع؟
*****

مصر فين في المؤشر العالمي لسرعة الإنترنت؟

– حسب أرقام نوفمبر 2018 بالنسبة لسرعة الوصلات المنزلية، فمصر في المركز رقم 121 بين 126 دولة شملها التقرير.
– وبالمقارنة بالدول العربية في التقرير مصر في المركز 12 من 16 دولة .. وبالمناسبة مادام دايما المسؤولين عندنا بيحبو سيرة سوريا والعراق، فالعراق سابقنا (المركز 88 عالميا) وكمان سوريا (المركز 115 عالميا)!

– فيما يخص سرعة إنترنت الهاتف مصر جت في المركز ال89 عالميا بين 123 دولة، وبرضه سوريا سابقانا لكن المرادي الحمدلله العراق ورانا في دي!

– كمان مصر هي رقم 11 من 16 دولة عربية شملهم المؤشر، حتى سوريا اللي فيها حرب أهلية جاية قبلنا في سرعة الإنترنت.

– فيما يتعلق ببقية نتائج الدول العربية فالإمارات وقطر هما الأسرع في المؤشرين.
*****

إيه سبب وجودنا في المراكز المتأخرة دي؟

– عشان نفهم ده محتاجين نعرف شوية أرقام عن استخدام الإنترنت في مصر، في البداية احنا عندنا 42% من المصريين بيستخدموا الإنترنت بحسب أرقام وزارة الاتصالات الرسمية وهي نسبة أقل من المتوسط الإقليمي في منطقة الشرق الأوسط اللي بتوصل ل 52 %.

– معظم المصريين بيدخلوا للإنترنت بالموبايل مش باستخدام الخطوط الأرضية، في نهاية 2017 كان 6.9 % فقط من المصريين بيستخدموا خطوط الأرضي عشان يدخلوا على الانترنت بينما الباقي بيعتمد على شبكات المحمول اللي بقت مكلفة جدا في الفترة الأخيرة.

– المصرية للاتصالات، الشركة الحكومية الأكبر هي اللي بتمتلك كل البنية التحتية للإنترنت في مصر، وبتسيطر على 75 % تقريبا من وصلات الإنترنت المنزلية، بينما باقي الشركات بتستخدم البنية التحتية (الكابلات) الخاصة بيها، وهي اللي في ايدها تدي تراخيص أو تمنع أي شركة من الدخول للسوق .. يعني ببساطة سوق الإنترنت في مصر سوق احتكاري.

– وكمان أسعار الإنترنت زادت تاني لما اتطبقت عليه ضريبة القيمة المضافة مكان ضريبة المبيعات، يعني 14% بدل 10%، غير كمان تطبيق سياسة “الاستخدام العادل” الللي بتحط حدود ليك حسب الباقة ولو هتزود ادفع أكتر.
– الاحتكار الرسمي والزيادات الضريبية بتخلي تكلفة الإنترنت مرتفعة لما تقارنها بالدخول.

– نقطة تانية مهمة جدا هنا يجب الإشارة ليها وهو أنه جزء من الأزمة هوا حرص الدولة على مركزية الإنترنت الشديدة، وده طبعا لأنه بيسهل علي الحكومة مراقبة الإنترنت وحجب المواقع.

– في المقابل الخدمة نفسها جودتها أقل حتى لو هتدفع، بسبب سوء البنية التحتية، على سبيل المثال أغلب مصر متغطي بأسلاك نحاس مش فايبر، ده غير مشاكل السنترالات القديمة .. يعني ممكن تدفع الكلفة كلها وبرضه متاخدش السرعة اللي متعاقد عليها، أو الإنترنت يقطع، ونضطر نقفل ونفتح الرواتر عشرين مرة في مكالمات خدمة العملاء 

– عشان كل ده ظهرت حملة إلكترونية باسم “ثورة الإنترنت”، وكانت الصفحة بتنشر معلومات ومقارنات مهمة جدا عن سرعة الإنترنت وأسعاره ومقارنتها بالعالم، لكن من 2015 إلى 2017 مؤسس الصفحة الشاب المحترم أحمد عبدالنبي Ahmed Abd El-Naby اتعرض هوا وعيلته لضغوط كبيرة واتقبض عليه وفي النهاية الصفحة اتقفلت.

– ضمن التهم اللي اتوجهت لأحمد عبدالنبي “إشاعة أخبار كاذبة” .. ده واضح فعلا!
*****

ايه أهمية انه يكون عندنا إنترنت سريع ؟

– لو بصينا نظرة سريعة على مؤشر سرعة الإنترنت اللي هتلاقوه في التعليقات، هنلاقي أنه معظم الدول المتقدمة واللي بتحقق معدلات نمو اقتصادي فيها إنترنت سريع.

– بشكل مباشر إحنا في عصر بتدخل فيه البرمجة في كل حاجة، وشركات كتير بتشتغل بنظام “Outsourcing”، وسرعة الإنترنت عامل مهم جدا في ده، وبعض الشركات الدولية ممكن تختار شركائها بالمجال على أساس عناصر منها سرعة الإنترنت واستمراريته.

– غير انه بقى عندنا وظائف كاملة بتعتمد على الإنترنت، زي المترجمين والمصممين والصحفيين وغيرهم.

– بالإضافة أنه إتاحة الإنترنت لأكبر عدد من السكان بيسهل عمليات التعلم وتطوير المهارات، وبالتالي تطوير سوق العمل .. وحرص الشباب المصري على تبادل روابط الكورسات والتعليم الذاتي تأكيد تاني على كذب اتهامه بالكسل والسلبية.
*****

ايه الحلول؟

– زيادة الاستثمار الحكومي في البنية التحتية للإنترنت، وده مش أقل أهمية من البنية التحتية (الأسمنتية) زي الطرق والكباري والمدن الجديدة اللي بيحبو يركزو عليها.

– السماح للقطاع الخاص بالمنافسة العادلة، بما فيها انه يعمل بنفسه بنيته التحتية، وبالتالي المستخدم هيبقى متاح قدامه أكتر من اختيار.

– فيه حلول تانية “فنية” بيطرحها متخصصين، مثلا ممكن الحكومة تتوسع في استخدام “الشبكات المتداخلة اللاسلكية” وهي تقنية فعالة في بناء شبكة إنترنت عالية الكفاءة بتكلفة منخفضة مقارنة مع تكاليف تمديد شبكة الفايبر اللي بتحتاج لبنية تحتية تقيلة.

– كمان في تقنية تانية اسمها ” المساحات البيضاء ” white spaces وده أقرب لفكرة شبكة الواي فاي، لكن بتشتغل على مساحات جغرافية كبيرة وبتقلل من فكرة ضرورة عمل بنية تحتية من الأسلاك وغيره .. مثلاً الفلبين لما ضربها الإعصار في 2013 شركة مايكروسوفت طبقت التقنية دي عشان توفر الإنترنت وبالفعل ساهمت في إنقاذ مئات من البشر اللي قدرو يعملوا اتصالات من سكايب مع أكتر من 5 آلاف فرد إنقاذ، وكمان تم اعتمادها من جامعة غرب فيرجينيا WHU وقدرت توفر الإنترنت جوه مواصلاتها بسرعة ممتازة لأكتر من 15 ألف طالب.

– وقبل كده، بداية الحل إنه يكون فيه شعور بوجود مشكلة أصلاً، محتاجين تطوير للفكر الحكومي ناحية القضية دي اللي واضح انه لسه بيتعامل معاها انها رفاهية مش أولوية.
*****