– نهاية شهر أغسطس اللي فات فقد أهالي قرية تلبانة في المنصورة 11 من أبنائهم بسبب غرق مركب للهجرة غير الشرعية كانت رايحة من ليبيا لإيطاليا.
– خالص العزاء لكل من فقد عزيز من أهالينا في القرية، ربنا يرحمهم ويصبر ذويهم، ويطمنا على المفقودين.
– مراكب الموت أو مراكب الهجرة غير الشرعية هي حدث متكرر في مصر من زمن طويل للأسف، وغالبا ما بنلاقي انتقادات مستمرة من الإعلام للشباب اللي بيلجأوا للهجرة غير الشرعية، ودي معالجة قاصرة في وجهة نظرنا للأزمة لأنها بتخلو من التساؤل عن الأسباب الدافعة لده.
– النهاردة هنحاول نبص على السياق الأوسع شوية لمشكلة الهجرة غير الشرعية، ونطرح وجهة نظرنا في الحلول اللي ممكن توقف الظاهرة دي بعيدا عن ضيق الحلول الأمنية المتعلقة بضبط الحدود فقط، لأنه من الواضح أنها غير ناجحة على المدى الطويل حتى لو قللت معدلات الهجرة غير الشرعية على المدى المنظور.
ليه ده بيحصل في تلبانة وأماكن تانية كتير؟
– اللي حصل في تلبانة متكرر في أكثر من مكان في مصر وخاصة في ريف الوجه البحري لعدد من الأسباب أهمها غياب التنمية في المناطق الريفية في مصر، وبالتالي غياب فرص العمل في الأماكن دي.
– ريف الوجه البحري معدل الفقر فيه بحسب آخر بحث للدخل والإنفاق 22.5 % في حين أنه معدل الفقر في حضر الوجه البحري نسبة الفقر فيه حوالي 14% تقريبا.
– بس برضه معدل الفقر مش عامل وحيد لأنه الفقر في الوجه القبلي في الحضر وفي الريف أعلى من كده بكثير، بالتالي هنا بتتداخل العوامل الديموغرافية زي أنه في ناس سافرت قبل كده لإيطاليا والدول الأوروبية من المناطق دي بالتالي ده بيخلي في قصص نجاح حصلت من ناس قدرت تسافر وبالتالي فيه إقبال من الشباب في المناطق دي على السفر لأوروبا بطرق شرعية وغير شرعية.
– العامل التاني المهم هو أنه الريف مفيهوش فرص عمل لا بالكمية الكافية ولا بالجودة الكافية، ومش زي ما بنسمع دعوات بتقول روحوا اشتغلوا في حياة كريمة، لأنه بالطبع الشغل المتقطع في المقاولات مع الشركات اللي شغالة في حياة كريمة بـ200 أو 100 جنيه في اليوم مش زي الشغل في أوروبا أو بديل كافي لشاب في الريف.
– عامل مهم آخر هو التعليم، معظم اللي بيتجهوا للهجرة غير الشرعية بيكونوا من متوسطي التعليم (معاهم دبلوم) أو مكملوش مراحل تعليمية وبيدورا على فرص شغل أفضل في أوروبا لأنه حتى العمالة الخدمية غير الماهرة في أوروبا في حد أدنى للأجور ليها حوالي 5-8 يورو في الساعة حسب البلد وطبيعة الشغل.
– الأسباب اللي فاتت لخصتها كميا دراسة عملها برنامج الأمم المتحدة الإنمائي في 2019 عن أسباب الهجرة من جنوب المتوسط، وفي الدراسة دي لقوا أنه 60% من اللي بيهاجروا هجرة غير شرعية بيهاجروا عشان يشتغلوا ويبعتوا فلوس لأهاليهم، و18 % بيهاجروا عشان أقارب ليهم أو أسر بره، و8% عشان التعليم، 7 % عشان متعلقة بالحريات في بلدانهم.
– برضه وبحسب نفس الدراسة فأكثر من ربع المهاجرين اللي اشتكوا من نظام الحكم أو انعدام الأمن في بلدانهم الأصلية كدافع ثانوي. كذلك 77% اشتكوا أيضا من القيود السياسية وضيق هامش حرية الرأي في وطنهم.
– طبعا في مصر فيه عوامل هتكون بتساهم بنسبة مختلفة عن الدراسة اللي اتعملت على الهجرة غير الشرعية بشكل عام من إفريقيا، لكن أكيد العوامل دي كلها هتكون حاضرة.
– بنأكد إنه مفيش أي عاقل ممكن يوافق أو يشجع على خطوة زي الهجرة غير الشرعية بالطرق المعتادة اللي بنشوفها دي، لكن المطلوب مش توجيه اللوم للشباب فقط لأن دا حالة تهرب من المسؤولية، لكن لابد من محاولة فهم الأبعاد المختلفة للظاهرة وأسبابها ونتائجها عشان نحاول نوجد حل جذري ينقذ أرواح أولادنا.
– مصر جزء من ترتيب أمني مهم في جنوب المتوسط بيشمل دول زي مصر وليبيا والجزائر وتونس والمغرب، الاتحاد الأوروبي اتفق معاهم على حماية الشواطئ لتقليل تدفق الهجرة غير الشرعية، ومصر بشكل كبير قدرت تعمل دور مهم في حماية الشواطئ الأوروبية من تدفق الهجرة غير الشرعية.
– ده ممكن يفسر جزئيا أنه من الشواطئ المصرية الموضوع قل، لكن انطلاق المراكب ما زال مستمر من ليبيا بسبب ضعف السيطرة الأمنية. لكن الظاهرة لم تنتهي من مصر لأنه الحل الأمني ليها غير كاف لوحده.
– بحسب وزيرة التضامن الاجتماعي فأعداد المهاجرين زادت في الفترة من 2011- 2013 ثم بدأت في التناقص، في 2017 غرق أكثر من 1773 فردًا ثم قل في 2018 إلى 785 فردا.
– بالتالي الظاهرة ما زالت موجودة ومحتاجة علاج أكبر من الحل الأمني، والعلاج متمثل بالأساس في الحاجات دي من وجهة نظرنا:
1- علاج تشوهات التنمية في مصر اللي بتخلي في تركز في الوظائف ذات الأجور الجيدة في العاصمة والمدن الكبيرة، وتخلي مفيش وظائف بأجور جيدة في مدن الدلتا والصعيد.
2- علاج ده مش هيكون بتوليد وظائف في قطاعات منخفضة الأجور وبتعتمد على العمالة الموسمية زي المقاولات، بل بتعليم فني يخلي أصحاب التعليم المتوسط قادرين يشتغلوا في مصانع بتدي أجور كويسة في شغل مستقر وبيئة عمل لائقة.
3- بالتالي إحنا محتاجين نضاعف الاستثمار في الصناعة وخاصة في المناطق اللي فيها معدلات هجرة غير شرعية مرتفعة عشان نستوعب فائض العمالة اللي بيهرب دائما للهجرة غير الشرعية كحل أخير.
4- ولحد ما الحاجات دي تتعمل لازم يكون في رقابة أفضل من الداخلية على السماسرة اللي بيستغلوا الشباب دول ويدفعوهم للموت، لأن لازم نتحرك أسرع مش بعد ما المصيبة تحصل.
مجدداً كل التعازي لأهالي الشباب اللي ماتوا واللي لو كان قدامهم طريق بديل مكنوش راحوا للمغامرة اللي بتسبب في موتهم بنفسهم، مفيش عاقل ممكن يركب مركب متهالك ويحاول يعبر به البحر المتوسط إلا لو كان يائس من الحياة في بلده، وبيدور على حياة أفضل في مكان تاني.