الموقف المصري | Egyptian Situation

قبل قليل قررت النيابة العسكرية حبس المستشار هشام جنينة 15 يوم على ذمة التحقيق، بعد القبض عليه بسبب تصريحاته حول ان الفريق عنان أخبره أنه يملك أدلة حول أحداث المرحلة الانتقالية، وبعدها صدر بيان المتحدث العسكري ضده.

– الحقيقة ان تصريحات المستشار كانت غير موفقة سياسياً – وخبرته السياسية غير واسعة بحكم تاريخه المهني – خاصة إنه الفريق عنان نفسه كان اختياره ألا يعلن ذلك، وانه واضح انه لم يتم اتخاذ القرار جماعياً من الحملة التي تشمل د.حازم حسني اللي لم ينطق بكلمة، ومحامي عنان اللي استنكر التصريحات.
وأيضاً لإنه سياسياً النوع ده من الأدوات ملوش إلا طريقتين لاستخدامه، إما يتم نشره علناً فوراً، وإما يتم التفاوض عليه سراً.
– لكن على الجانب التاني مهم جداً نفكر ليه المستشار جنينة اتكلم دلوقتي بالكلام ده بعد صمت طويل؟! وليه يعمل كده رغم مخالفته لطبيعته وهو لا شاب ثائر ولا مندفع، بالعكس ده كان ظابط أمن دولة أصلاً، ثم مستشار بالقضاء، ثم رئيس أهم جهاز رقابي مصري.
– الإجابة هي في الصورة اللي اتكلم بيها .. كان بيتكلم وآثار محاولة الاغتيال على وجهه .. ده واحد كان هيتخطف أو يتقتل قرب بيته، ثم الدولة تلاعبت ليتحول الاعتداء السياسي إلى مجرد حادث جنائي! وزوجته وبنته تعرضوا للاهانات والتهديد، وقبلها بنت اتفصلت من عملها.
وده حصل رغم انه كان ساكت من وقت القبض على الفريق عنان .. فين تبقى مساحة الهدوء بعد كده؟ وماذا يبقى من الثقة بالقانون والمؤسسات؟ وماذا يبقى من الحذر إذا كان وهوا ساكت كان ممكن يتقتل.
الخيار الوحيد التاني قدامه كان انه يستسلم ويؤيد، وده ضد طبيعته كرجل شجاع ومخلص لما يقتنع به، وإلا كان زمانه من الأول خالص استمر في منصبه المرموق ينعم بفلوسه ومزاياه.
*****

هل المستشار جنينة هاجم القوات المسلحة فعلا؟ً
– المشكلة ان كتير من المواقع والأشخاص نقلوا تصريحات المستشار جنينة بدون دقة كافية، هوا في النص الحرفي لكلامه مقالش إطلاقا كلمة “القوات المسلحة” أو “الجيش” أبداً .. مقالش حاجة أكتر من ان فيه معلومات جديدة تكشف حقائق بوقائع محاولة اغتيال عمر سليمان، أحداث ماسبيرو، أحداث محمد محمود.
وزي ما قال الفقيه الدستوري د.نور فرحات: “هذه التصريحات لم تتحدث عن الدولة من قريب أو بعيد ولم تتعرض للدور المجيد للقوات المسلحة في مكافحة الإرهاب، وإنما تحدثت بطريقة مجهلة ومعماه وذكر المستشار جنينة أن مسألة التحقيقات في هذا الملف مهمة، فقد يكون مقصودا جماعات أخري أو أشخاص لا نعرفهم، أو ملابسات خافية”.
ليه المتحدث العسكري يصدر بيان والقوات المسلحة تزيد من دخولها السياسي المباشرة رغم أنها لم تُذكر على الإطلاق؟!
وللا ده اعتراف ضمني بمين الطرف المسؤول ومحاولة لحمايته؟
– طيب لو صدقنا ان الموضوع حرص شديد على تطبيق القانون، ليه ميتفتحش تحقيق جاد جايز نشوف الأدلة دي فعلا .. بل اللي أقل من كده بكتير ليه لم يتم معاملة واقعة محاولة اغتيال المستشار جنينة بنفس الجدية؟ بل تم الافراج عن الفاعلين ودفن الموضوع!
*****

إيه اللي وصلنا ليه حالياً في واقعة الاعتداء؟
• المستشار جنينة قال في تحقيقات النيابة انه كان ماشي بعربيته فوقفت قدامه عربية مرسيدس سوداء ومن وراه عربية فيرنا، ونزلوا ليه مباشرة سألوه انت المستشار هشام جنينة، ولما قال أيوه حاولوا يخطفوه، لكنه قاوم وأنقذ حياته حزام العربية وملابسه الثقيلة وعشان كده كل الضرب في جانب وجهه وجسمه الشمال.
• بعدها تحولت محاولة الخطف لمحاولة اغتيال حسب قوله، طلعوا الأسلحة البيضاء وبقو بيقولو “احنا هنا عشان نموتك”.
• المستشار قال في النيابة إن اللي هاجموه هما ال 3 اشخاص المتهمين و2 مجهولين معاهم اختفوا تماماً.
• الداخلية كانت متعنتة لما جت قوة منالفسم، رفضوا نقله للمستشفى الا بعد حضور الاسعاف، ولما جت الاسعاف قالوا لا لما نخلص تحقيقات الاول، وكانت النتيجة ان الراجل تعرض للإغماء اكتر من مرة بسبب النزيف طيلة 3 ساعات، وبعدها اتعمم على الإعلام رواية دي مجرد خناقة عادية.
• قاضي المعارضات بمحكمة جنح القاهرة الجديدة قرر يوم التلات إخلاء سبيل المتهمين بكفالة 500 جنيه لكل واحد، واستمر اتهامهم بضرب جنينه باسلحة بيضاء. النيابة طعنت على القرار، لكن اخلى سبيلهم فعلا بعد ما طعن النيابة اترفض.
*****

مين هما المتهمين؟
• زي ما ظهر بالوثائق اللي نشرها موقع القاهرة 24 وموقع المصري اليوم، دي مش أول مرة يظهر فيها “شرنوخ” أحد المعتدين في قصة شبيهة بالظبط!
• سنة 2016 شرنوخ اتهم الرائد فهمي بهجت بانه صدمه بعربيته وهو سايق موتوسيكل، لكن المحكمة برأت بهجت بعد المعاينة ما كشفت ان الموتوسيكل سليم وعربية بهجت مافيش عليها آثار تصادم، واتوجهت ليه تهمة البلاغ الكاذب .. وده بالمناسبة نفس الوضع حالياً مفيش أي أثر تصادم على سيارة المستشار جنينة.
• بهجت كان ناشط بائتلاف ضباط الشرطة اللي اتكون بعد الثورة، وكان ليهم مواقف محترمة برفض الاعتداء على المحامين أو تعذيب المواطنين في الأقسام. اللي حصل أنه فوجئ ببلاغ يتهمه انه صدم شرنوخ، بعد 3 ساعات بس من بلاغ قدمه في قسم عابدين ضد وزير الداخلية، عشان الوزارة حاولت تلفق له تهمة ادارة شبكة دعارة، لانه ناشط في ائتلاف ضباط الشرطة.
• برضه الأستاذ جمال عبدالرحيم، سكرتير نقابة الصحفيين، قال إن شرنوخ ده كان ضمن البلطجية اللي كانوا برفقة أفراد الداخلية لحصار نقابة الصحفيين ومنع دخولها السنة اللي فاتت أثناء التظاهر ضد اتفاقية تيران وصنافير.

• اكتر من شخص كتبوا على صفحتهم على فيس بوك ان شرنوخ كان مأجر قهوة في منطقة البورصة في وسط البلد، وهو واحد من بلطجية معروفين بالاعتداء على المواطنين المعارضين أوقات الانتخابات، وانه من قبل الثورة كمان كان من رجالة فتحي سرور.
• رغم كل الشهادات والوثائق، تم الافراج عنه بكفالة 500 جنيه .. بينما شاب رفع يافطة ممكن يتسجن سنوات!
*****

– اللي بيقولو إنهم متضايقين جداً من تصريحات المستشار جنينة، محتاجين يراجعوا نفسهم لو ده أقل من غضبهم من الاعتداء عليه اللي كان ممكن ينتهي باختفاؤه أو موته..
لو ده أقل من غضبهم عن التنازل عن تيران وصنافير اللي هوا قال انه كان بيحسن الظن بالرئيس السيسي لحد وقتها..

لو ده أقل من غضبهم من كل التلاعب اللي حصل بانتخابات الرئاسة منذ قال الرئيس انه مش هيسمح لمن اعتبرهم فاسدين “يقربوا من الكرسي”.. لو ده أقل من غضبهم من الإهانة اللي نالت كل مصري حتى اللي بيؤيدو السيسي باعتبار كل المصريين بلا قيمة أو رأي أو اعتبار.
عشان كل الأسباب دي تكلم المستشار جنينة.