الموقف المصري | Egyptian Situation

برغم إن السنادى بتحل ذكرى تحرير سيناء فى وقت صعب، فيه عدد كبير من الشباب مقبوض عليهم من البيوت والقهاوي والشوارع عشان عبرو عن رأيهم برفض ما يعتبروه تفريط فى جزء غالى من تراب سيناء بجزيرتيّ صنافير وتيران، وبرغم إن سيناء تتألم بفعل الإرهاب، وأيضاً بفعل الأخطاء الضخمة في أسلوب التعامل معاه، وبفعل التهميش وتعطل التنميه المستمر لعشرات السنين رغم تكرار اعلان المشاريع والميزانيات.
لكن كل ده لن يمنعنا، بل يجعل من الواجب علينا، إننا نفكر نفسنا بمعنى ٢٥ أبريل.
نفتكر كل اللى ضحو من أجل سيناء من الجنود والظباط والمواطنين الأبطال من أهل سيناء الكرام من البدو والحضر، نفتكر الشيخ سالم الهرش، والشيخ حسن خلف، والشيخه فرحانه وغيرهم من أبطال سيناء اللى هييجى يوم علينا نكرم بطولاتهم بما يليق بعظمتها، ونعيد سيرتهم في المدارس للأجيال.
ونفتكر الشهيد إبراهيم الرفاعى أمير الشهداء، والجنرال الذهبى عبدالمنعم رياض اللى استشهد على خط النار الأول وسط جنوده ليضرب لنا المثل عن معنى القائد الحقيقى، والفريق سعد الدين الشاذلى، وعبدالعاطى صائد الدبابات، وسيد زكريا ابن محافظة الاقصر أسد سيناء، وغيرهم وغيرهم.
نفتكر معنى الأرض اللي حاربنا عشانها بالسلاح والدم، وكمان حاربنا بالدبلوماسية والقانون عشان كيلومتر واحد منها (طابا) .. ونفتكر إن سيناء ٦% من كامل تراب مصر يعنى أكبر من مساحة الدلتا المصريه بكل محافظتها ٣ مرات، سيناء فيها ٦٧٠ كيلو من السواحل البحريه لم تستغل بعد ٣٤ سنه من التحرير، وفيها كنوز من الخير والثروات الاقتصادية والفرص الاستثمارية، في انتظار أولاد مصر اللي هيخلوا خيرها لأهلها.
نفتكر إن الإرهاب والتهريب والانفجارات والفقر والمرض مش هيا الأفكار اللي مفروض تيجي في بالنا لما نفتكر سيناء، لكن سيناء مفروض تكون صورة الخير والجمال والسلام والازدهار الاقتصادي.

****

فريق صفحة الموقف المصرى يتقدم بالتهنئة لكل المصريين بمناسبة ذكرى تحرير سيناء، وبنفكركم هنا إننا قريبا زي ما وعدنا هننشر حلقات ملف سيناء ويشمل معلومات وكشف حساب على الصعيد الأمنى والسياسى والاجتماعى والاقتصادى. فريق من خبراء الصفحة من الباحثين والسياسيين والعاملين في مؤسسات حكومية بيشتغلوا على الملف، منهم ال سافر للقاء أهلنا في سيناء ومنهم ال قابل مسؤولين في الدولة مسؤولين عن ملف سيناء علشان نفهم كل المشاكل ونفكر في الحلول والبديل للي بيحصل.

تحيه الى ٥٠٠ ألف مصرى عايش في سيناء، ومتمسك بالارض مهما كانت الظروف.
تحيه الى كل عسكري وظابط قادر يفهم رسالته ودوره، وبيحارب الإرهاب في سيناء بكل بطولة، وفي نفس الوقت مأخدش ده حجة لظلم الناس وانتهاك حقوقهم وحرمات بيوتهم وأهلهم.
تحيه للشهيد المجهول ابن الارض الطيبه اللى اتنحلت بيادته على رمل سيناء وهو بيحافظ عليها لينا ولاجيال بعدنا.
وتحية لكل مصري قدر يتحدى الخوف عشان يعمل ما هو مقتنع إنه بيفيد بلده بيه، تحية للي بيشتغل في سيناء وكمل في مكانه عشان يفيد أهل بلده، وتحية لكل الشباب اللي في السجون لأنهم قالو كلمة حق للحفاظ على حقهم في تقرير مصير أرضهم، وتحية للي هينزلو النهاردة يعبروا عن تمسكهم بجزء غالي من أرض مصر.

****
نتعاهد إننا هنعيش لآخر يوم في عمرنا عشان تيجي علينا ذكرى تحرير سيناء في ظروف مختلفة تماماً عن الوضع الحالي، هنحتفل بيوم فيها كل المصريين عايشين بأمان وإحترام، وفيه مفيش شباب بيتقبض عليهم عشوائيا، ولا بيسيل دم جنودنا بسيناء، وفيه أهالينا السيناوية عايشين في أمان، وأرض سيناء بتتعمر وتتنمى بسواعد أهلها وخيرها يعم على كامل مصر.
نتعاهد إننا زي ما حرر آبائنا سيناء من المحتل، إحنا نحررها كمان من أعدائها الحاليين كلهم: الظلم والتهميش والإهمال والفساد والتطرف والإرهاب، ونتعاهد إننا هنحاسب اللى فرط فى الامانة، وكل مسئول كان سبب إن أهل سيناء بعد ٣٤ سنه من التحرير بيعيشو بالأسابيع أو أكتر بدون أي خدمات أساسية، زى المياه والكهرباء، وكان سبب إنها تتحول لمنطقة هروب وطرد، بدل كونها منطقة جذب وفرص عمل للمصريين اللي هيبقو أول حائط صد ضد أطماع المحتل.
وإحنا على العهد والوعد، عمرنا ما نفرط فى حبه رمل شربت نقطه دم مصريه مهما طال زمن .. صباح الخير يا سيناء يا جنه الله فى أرضه، صباح الخير يا أبناء الأرض الطيبة..

****