– امبارح الجرايد نشرت خبر كارثي وهوا ان وكيل وزارة الصحة بالشرقية، عمل مرور مفاجيء بنفسه على مستشفي ديرب نجم المركزي، وأمر بإخلاء طرف طبيب ونقله، مع إحالته للتحقيق بالشؤون القانونية للمديرية!
– إيه الجريمة اللي عملها؟
الجريمة انه نشر فيديو «يدعي فيه عدم توافر مستلزمات طبية وقائية بالمستشفي، مخالفاً للواقع، مما آثار بعض البلبلة، والقلق داخل الوسط الطبي ولدي المواطنين بالمحافظة»!!
– الفيديو اللي قدامنا الدكتور فيه بيتكلم بكل ذوق، ومغلطش في أي حد، وحتى مش بيشكي ولا بينتقد، كل اللي بيقوله بس يا جماعة احنا عندنا حالات اشتباه ومحتاجين ماسكات إن٩٥ (وواضح انه مش لابس النوع ده) وجاونات اللي هيا الملابس الواقية، وياريت حد من شركات الادوية يجيبلي ع المستشفى وأنا هشتري على حسابي.
– بدل ما وكيل الوزارة يلبي طلب الطبيب بسرعة، أو يوضحله الصورة لو افترضنا انه فعلا فيه حاجة غايبة عنه أو حصل سوء فهم أو سوء إدارة، لإن ساعات فعلا تكون الحاجة متوافرة لكن متخرجش من المخازن بسبب موظفين أو إداريين، لكن اللي حصل هوا العقاب الشديد للدكتور فورا.
– إحنا شفنا سابقا مثلا نموذج إيجابي مختلف للتعامل مع الدكتور أحمد كمال من مستشفى بولاق اللي صور فيديو بيشكي فيه، وتاني يوم صور فيديو يشكر فيه وكيل الوزارة اللي اتعاون معاهم ويقول انه تم عمل اللازم معاه هوا وزمايله.
– شفنا كمان إزاي شهادات العاملين بمعهد القلب هيا اللي فضحت الوضع وانقذت الطاقم والعيانين من كارثة استمرار العمل رغم ظهور اصابات مؤكدة.
*****
– بعد اللي حصل مع طبيب ديرب نجم إيه الرسالة اللي توصل لكل مواطن بيشوف حواليه حاجة غلط ويفكر يعلن؟
و ايه الرسالة اللي بتوصل تحديدا للفريق الطبي اللي عمالين نسمع شعارات انه جيش مصر الأبيض؟
– وهل ده تصرف خاطيء من الدكتور هشام شوقي مسعود وكيل الوزارة وممكن نشوف محاسبته زي محاسبة مدير معهد القلب، ولا دي سياسة وزارة الصحة ووراها قرار أمني بالتعامل ده؟
– محتاجين نشوف تغيير حقيقي في الأفعال مش الشعارات قبل فوات الأوان!