الموقف المصري | Egyptian Situation

ناس كتير بعتتلنا وعلقت في الصفحة بأسئلة عن جدوى التصويت بلا، ومش جايز الأحسن نقاطع .. هنناقش هنا كل الأسئلة المطروحة، خاصة فكرة المقاطعة، وبنؤكد من البداية إن مهم احترام أي اختيار سياسي حر لأي مواطن مصري.
*****

إيه الفايدة لو هما كده كده هيزوروها؟

– التزوير بيبقى أصعب بالمشاركة مش المقاطعة، لو اللجان فاضية هيبقى سهل يتملي الورق ويتمضي مكان الغايبين، بوجودك على الأقل هتحمي صوتك الشخصي من التزوير.

– التزوير على مستوى اللجان مش حاجة محسومة، دايما فيه ناس شرفاء، وكمان بالتأكيد قطاع مش قليل من القضاة رافضين التعديلات دي أًصلاً لأنها أخدت من صلاحياتهم، ومش هيشاركوا بالتزوير فيها.

– رغم إن التزوير في الأرقام النهائية وارد لأنها خارج أي رقابة، لكن ساعتها كفاية إننا وصلنا صوتنا للسلطة نفسها اللي عندها الأرقام الحقيقية، وهيوصل للرئيس ومن حوله صوت الشعب واضح وصريح، وده ممكن يخليهم يحاولو يغيروا ولو أمور محدودة بالمستقبل.

– لما ملايين المصريين يعملو (فعل) مهما كان بسيط، وهوا انه ينزل من بيته، ويختار (لا)، دي في حد ذاتها خطوة إيجابية ممكن تفرق ولو مع عدد قليل منهم إنه يواصل النشاط والاهتمام السياسي.
*****

بس كده هياخدوا لقطة اللجان الزحمة؟ مش وارد المقاطعة هيا اللي تحرجهم باللجان الفاضية؟

– جربناها ومنفعتش.. من سنة واحدة كل قوى المعارضة دعت للمقاطعة، ومكانش فيه أي مرشحين أصلاً إلا موسى مصطفى موسى مؤيد الرئيس، ومع كده عادي جابو ناس تعمل زحمة وترقص قدام اللجان، وصوروهم وذاعوا صورهم، واحنا كنا نشرنا فيديو ازاي كانت تيجي عربية تنزلهم قدام اللجان مخصوص عشان الدور ده.

– عايز تحرجهم قدام مين بالظبط؟ هل أي طرف داخلي أو خارجي ممكن ياخد فعل بسبب صور للجان فاضية؟

– مصر فيها أكتر من 10 آلاف لجنة فبشكل عام صور للجنة زحمة أو فاضية ملوش دلالة علمية أو احصائية.
*****

هل التصويت بيدي شرعية للنظام؟

– تاني: جربناها ومنفعتش! مفيش أي أثر لكل مرة حصلت فيها المحاولة دي وآخرها انتخابات الرئاسة 2018.

– كلمة “الشرعية” دي ليها مفهومين نظري وعملي، والاتنين مش فارق فيهم المشاركة أو المقاطعة.

بصورة نظرية التعديلات دي غير شرعية أخلاقيا وسياسيا ودستوريا، وهتفضل كده.

بصورة عملية الشرعية أخدها النظام بالفعل، الشرعية الداخلية ثابتة بموجب السيطرة على مؤسسات الدولة، من أول قدرة الرئيس إنه يعين أو يفصل أو يصدر أمر لأصغر موظف، ولحد الولاء من مؤسسات الجيش والشرطة والقضاء.

والشرعية الخارجية ثابتة كل دول العالم تعترف بالنظام الحالي، وتم استقبال الرئيس السيسي بكل العواصم العالمية، واستقبل زيارات على أعلى مستوى، وقال خطابات بالأمم المتحدة..الخ، ومحدش بالعالم غير موقفه عشان التعديلات.

– مفيش وسيلة تثبت أصلاً إنه حصلت مقاطعة مادمت مش متأكد من النزاهة، ومفيش حرية إعلام.

– المقاطعة مفروض تكون فعل إيجابي، يعني قرار من الناس وخطوة بمسار سياسي، لكن واقعيا كده هتؤدي بس لترسيخ اعتياد الناس على السلبية وانه مبيعملش حاجة وقاعد في البيت وخلاص.
*****

هل التصويت بلا خطر على الناس وممكن يتقبض عليهم؟

– مفيش حد في الدنيا يقدر يشوفك وانتا ورا الستارة بتعلم على اختيارك ثم تحطه في الصندوق.

– محصلش قبل كده بأي انتخابات او استفتاءات مهما بلغ التلاعب أو التهديد إنه اتكشف أصحاب الأوراق، ده بالعكس البعض كان بيكتب شتايم أو شعارات على الورق ومتعرفش مين هوا.
*****

هل المشاركة بالتصويت بلا موقف موحد من المعارضة؟

لحد دلوقتي لسه مش كل الأطراف المعارضة أعلنت مواقفها، لكن واضح توجه من غالبيتها لذلك.

الحركة المدنية الديمقراطية (تحالف أحزاب وشخصيات عامة) أعلن دعوته للتصويت بلا، وهو نفس اختيار حركة الاشتراكيين الثوريين.
*****

إيه اللي أقدر أعمله لدعم الحملة؟

– مش كفاية تروح لوحدك، دراسات التسويق قالت إن أفضل دعاية هيا كلمة شخصية من حد تعرفه .. كلم أهلك وأصحابك ومعارفك وزمايلك في الشغل، خلي ليك هدف شخصي انك تقنع على الأقل خمسة انهم يصوتوا بلا. حاول تفكر في ١٠ من اصحابك وقرايبك وأهلك تبدأ تكلمهم من دلوقتي وتفضل متابع معاهم لغاية ما تعرف انهم نزلوا وصوتوا بلا للتعديلات.

– احنا كتير ولازم نصدق إننا كتير وإن صوتنا هيفرق جداً حتى لو بعدين مش دلوقتي، وإنه لازم نوصل رسالة إن مش مصر كلها موافقة على التعديل زي ما بيروجوا في إعلام الدولة والإعلام المسيطر عليه من أجهزة الأمن.
******

في النهاية بنؤكد تاني احترمنا للخيار الحر لكل مصري، بما فيه المقاطعين، وكمان اللي هيصوتو بنعم لو ده رأيهم بحسن نية مش مصلحة برضه احنا نحترمه، ومشكلتنا عمرها ماكانت أي ختيار سياسي لكن هيا ضمانات النزاهة والفرص المتساوية.
*****

بنجدد دعوتنا لكل واحد يعمل اللي يقدر عليه، يتكلم مع اللي حواليه، يغير صورة البروفايل أو أي نشاط إيجابي يحس انه آمن ويقدر يعمله.