الموقف المصري | Egyptian Situation

– صفحة الموقف المصري بتعزي كل المصريين في سيد طه طلبة، اللي فقد حياته عشان دافع عن ست اتعرضت للتحرش قدامه.

– سيد طلبة، الشهير بسيد أبو دنيا، شاف شخص بيتحرش جسدياً بسيدة رايحة لمطعم جنبه في شارع حسان دياب بالبساتين الساعة 2 الظهر، راح وبعده عنها واشتبك معاه، لكن بعدين المتحرش رجعله وضربه بأكتر من طعنة في قلبه واتوفى علطول.

– بعض الأهالي قالو للصحفيين ده “مريض نفسي”، لكن شهادات تانية كانت مختلفة ومنها خال البطل اللي قال إن القاتل نقاش ومعروف بالمنطقة، وده معناه إنه رواية المرض النفسي في الأغلب محاولة من البعض لإنقاذ المتحرش والقاتل من العقاب.

– كتير من الناس ممكن يحصل قدامهم مواقف تحرش ويقرر إنه يسكت أو يتجاهل توفيرا للصداع والمشاكل، لكن سيد أخد اختيار تاني يليق بقيمته واحترامه لنفسه ولغيره وكان مصيره انه يتقتل بدم بارد في عز الظهر.

– البعض ركز على نقطة إنه مسلم وهي مسيحية، لكن دي زاوية منحبش نبص ليها هنا، ده مواطن اتدخل لحماية مواطنة ميعرفهاش، جريمة التحرش مش بتميز بين مسلمة ومسيحية، وموقف الجدعنة اللي عمله سيد مكانش هيفرق فيه دين الضحية.

– للأسف مصر فيها معدلات عالية للتحرش وأغلب الستات في مصر بتتعرض ليه بأشكاله المختلفة، ورغم تغليظ العقوبات القانونية، لكن لسه في مشاكل كتير بتواجه الستات اللي بتقرر تاخد المسار القانوني سواء في الإمساك بالمجرم لحين قدوم الشرطة، أو في إثبات التحرش، أو في تحرير الشرطة للمحاضر، ده غير حالة التستر اللي بتحصل من ناس كتير جداً على المتحرشين لدرجة التضامن إنهم يهربوهم لو الشرطة وصلت، وده يزيد أهمية الموقف اللي عمله سيد.

– ربنا يرحم سيد طه، ونتمنى من المسئولين أنه يعامل زي مبيتعامل شهداء الواجب من الجيش والشرطة، ويتم صرف معاش الشهداء لأسرته وبنته دنيا اللي كان بيعولها، ويتكرم اسمه رسمياً لأنه فعلاً يستحق التكريم.
*****