الموقف المصري | Egyptian Situation

– صفحة الموقف المصري بتبارك للمصرية سارة عصام فوزها بالحذاء الذهبي من نادي ستوك سيتي للكرة القدم للسيدات، وده إنجاز رياضي كبير على مستوى كرة القدم للسيدات في مصر.

– سارة هي أول لاعبة كرة قدم مصرية في الدوري الإنجليزي لكرة قدم السيدات، وده شيء محصلش قبل كده في مصر لأنه اللعبة نفسها على المستوى النسائي مفيهاش حجم مشاركة عالي جوة مصر.

– اللاعبة سارة في الموسم ده، أحرزت 12 هدف في 12 مباراة، وحصلت على لقب أفضل لاعبة في مباراتين منهم، وساعدت فريقها على الوصول للمركز الثالث في “دوري الشمال” وهوا مجموعة من قسم الدرجة التالتة للدوري الانجليزي النسائي.

– بيتقالها كتير انه رحلتها شبه رحلة محمد صلاح، خصوصا انها بدأت تلعب في ستوك سيتي وفي نفس الوقت اللي صلاح انضم فيه لنادي ليفربول، وبتقول إنها بتفرح لما زميلاتها في النادي بيقولوا عنها “مو سارة” وبتحس بالفخر إنها بتلعب في الدوري الانجليزي زي مصريين تانيين في الرجال.

– اجتهاد سارة واضح من زمان، لما بدأت مشوارها مع ناشئات نادي دجلة وعمرها 16 سنة، وبعدها صعدت للفريق الأول للنادي، ومن خلاله شاركت مع المنتخب المصري في 20 مباراة دولية.
– سارة كان حلمها تلعب في الدوري الانجليزي، لكن أسرتها كانوا متخوفين من الخطوة وعايزينها تكمل دراستها، فاتجهت لدراسة الهندسة في انجلترا، ومن هناك بدأت تعمل اختبارات في أكتر من نادي انجليزي، زي ديربي كاونتي، وبرمنجهام، وسندرلاند، لحد ما انضمت لستوك سيتي في 2017، وبتلعب في نفس الوقت اللي بتدرس فيه وقدرت تتفوق وتوصل لمستويات ممتازة لحد ما خدت الجايزة اللي بنتكلم عنها

– بنكرر التهنئة لسارة، ونتمنى لها مزيد من النجاح، ولكل المصريين اللي بيجتهدوا وبيطوروا نفسهم في كل المجالات.