الموقف المصري | Egyptian Situation

– يوم الأحد اللي فات أطلق الكاتب الصحفي ووكيل نقابة الصحفيين السابق خالد البلشي Khaled Elbalshy موقع صحفي جديد باسم “كاتب” بالتعاون مع الشبكة العربية لمعلومات حقوق الإنسان، وده كانت محاولة لفتح مجال لعمل اعلامي بصوت مختلف عن الصوت الواحد المفروض على الإعلام المصري الخاص والحكومي، وكانت أول المواضيع اللي بتتنشر على الموقع عن الأزمة الاقتصادية وقرار رفع اسعار البنزين، وتعريف بقصص معتقلين بقضايا رأي زي أسماء عبدالحميد اللي اتقبض عليها من المترو لما اعترضت على رفع أسعاره.

– خلال 9 ساعات كان عدد زوار الموقع أكثر من 10 الاف شخص، واكثر من 2300 مشارك لصفحة الموقع على الفيسبوك و1100 متابع على تويتر، دليل على مدى تقدير الناس للموقع ووجود جمهور بيدور على صحافة حقيقية ومختلفة.
– بعد إطلاق الموقع بأقل من 9 ساعات فوجئ متابعيه والعاملين بالموقع بحجبه داخل مصر لينضم لأكثر من 500 موقع محجوب بلا أي سند قانوني أو قضائي، حتى القانون الجديد اللي احنا معترضين عليه الخاص بالجريمة الالكترونية فيه اجراءات للحجب بأمر قضائي ومفيش اي اهتمام انها تتعمل!

– بالحجب ده غير اننا في قاع مؤشرات حرية الصحافة فاحنا خدنا رقم قياسي جديد، وهو أسرع حجب لموقع إعلامي وتخطينا بيه أرقام قياسية عملها نظام الرئيس التونسي زين العابدين بن علي بحجب موقع بعد مرور 18 ساعة على اطلاقه، والنظام السعودي بحجب موقع بعد مرور 15 ساعة على اطلاقه، وفي مصر حصلنا على المركز الأول بحجب موقع كاتب بعد مرور 9 ساعات فقط على اطلاق الموقع.
*****

– قلنا قبل كده إن الصحافة مفيدة لكل المجتمع مش قضية فئوية للصحفيين، مثلاً لولا الصحافة مكناش سمعنا عن المبيدات المسرطنة في عهد الوزير يوسف والي، وأقيل الوزير بسببها واتحاكم مساعديه، ولا كنا عرفنا عن قضايا فساد بملف الخصخصة، ولا حتى كنا عرفنا عن مصنع اللحوم الشهير اللي بينتج لانشون مسرطن، وده عمل فرق بكل بيت.

– يعني حرية الصحافة تخص كل مواطن ومواطنة، من أكبر قضية بالدولة لأصغر تفاصيل في البيت، والصحافة مش بس قادرة إنها تقفل مصنع فاسد، ولا تلاحق مسؤولين منحرفين، لكن كمان ممكن تشيل مسؤولين ورؤساء دول زي ما حصل بفضيحة ووتر جيت بأمريكا وتم عزل الرئيس نيكسون.
– ده غير ان دي فعلا “سمعة مصر” اللي طول الوقت بيقولو خايفين عليها والمعارضة بتشوهها، أي تشويه أكبر من ان ده تصنيفنا في كل الجهات الدولية المختصة بالصحافة وان ده اللي بيتنشر عننا وبيشوفه المستثمرين اللي جانب رئيسي ليهم هوا الاستقرار والأمان وسيادة القانون.
*****

صفحة الموقف المصري بتدعم موقع “كاتب” وكل المواقع المحجوبة والعاملين فيها، وبنتضامن معاهم ضد قرار الحجب اللي بقى جاهز ضد أي صوت حر غير مزيف، وبنتمنى نشوف بلدنا مصر وفيها حرية رأي وتعبير ومفيهاش مواقع محجوبة ولا صحفيين محبوسين.