– فريق صفحة الموقف المصري بيقدم خالص التعازي في وفاة الكاتب الكبير الدكتور نبيل فاروق، بنتمنى ليه الرحمة والمغفرة، وكل التعازي الصادقة لأهله ومحبيه وقراء أعماله اللي إحنا منهم.
– الدكتور نبيل كان فعلا هوا “رجل المستحيل” الحقيقي بفضل غزارة انتاجه، وتعدد المواضيع اللي كتب فيها وكان من أوائل اللي قدموها للقراء الشباب المصريين والعرب.
– على رأس أعماله طبعا السلسلة الأشهر “رجل المستحيل” اللي بتتكلم عن شخصية أدهم صبري اللي قدم بيها بطل مصري وعربي زي ما بالخارج صنعوا شخصيات زي جيمس بوند، وسلسلة “ملف المستقبل” للخيال العلمي، ده غير “كوكتيل 2000″ و”حرب الجواسيس” و”زووم”، وكتابته الرومانسية في “زهور”، وغيرها كتير، بالاضافة لأعماله الاذاعية والتلفزيونية (مسلسل العميل ١٠٠١).
– كتابات نبيل فاروق، ومعاها في نفس المرحلة كتابات الأديب الراحل أحمد خالد توفيق كانت بتشكل وعي جيل مصري كامل في مرحلة المراهقة وبداية الشباب، بسبب محتواها الثري بالمعلومات والأفكار، والأسلوب الشيق والمثير، في وقت مكانش فيه انترنت ولا اتصال بالعالم الخارجي، ووقت رحيلهم شفنا كمية الشباب المبدعين بمختلف المجالات اللي اتكلموا عن تأثرهم بيهم وفضل اللي اتعلموه منهم.
ورغم ان بعض القراء بقى عندهم اختلافات سياسية أو اختلافات ببعض الآراء لكن محدش يقدر ينكر الفضل والقيمة الحقيقة اللي قدمها د.نبيل.
– نتمنى مشروع د.نبيل ود.أحمد يجد المزيد من التقدير الحكومي والأهلي، ونشوف استكمال للبناء على التواصل مع المرحلة العمرية دي اللي بتواجه نقص شديد في المحتوى الثقافي المقدم ليها بما يناسبها.
– ربنا يرحم الدكتور نبيل فاروق، اللي أثر في الجيل ده بأكمله، ويرزق أهله ومحبيه الصبر والسلوان.