الموقف المصري | Egyptian Situation

في بداية الشهر الحالي بدأت الحملة القومية 100 مليون صحة، واللي بتستهدف القضاء على فيروس سي، والكشف المبكر عن الأمراض غير المعدية زي (الضغط، والسكر، والقلب، والسمنة)، وكل الفحوصات دي مجانا، وكمان علاج فيرس سي هيتصرف بالمجان.

– إذا كنا طول الوقت بننتقد عدم منح التعليم والصحة الأولوية المطلوبة، فأكيد لما تحصل خطوة ايجابية زي دي تستحق الاشادة والتقدير لكل القائمين عليها من أكبر مسؤول لأصغر فني واقف بيساعد الناس، ونتمنى نجاحها لصالح كل المصريين.
***

صفحة الموقف المصري بتدعوكم للمشاركة، أولاً للاستفادة من الكشف والعلاج عشان صحة كل واحد فينا، وثانياً لأن ده دورنا كمواطنين في المشاركة والرقابة.
روحوا واكشفوا وشاركونا تجاربكم هنا في التعليقات.
لو انت مواطن احكيلنا:
– هل كان سهل الوصول لمكان تقديم الخدمة؟
– هل كان أداء مقدمي الخدمة من أطباء واداريين كويس؟
– هل تم الالتزام بكونه مجاني ولا حد طلب منك فلوس؟
– هل المكان كان مجهز والامكانات متوافرة؟
– هل الحملة قدرت تغطي الفئات الأفقر أو الأبعد لو بنتكلم عن قرى أو أماكن نائية؟
– لو لاقدر الله ظهر ان عندك أحد الأمراض ايه التعامل اللي تم معاك بعدها؟

ولو انت طبيب أو إداري احكيلنا برضه:
– هل تم توفير المواد التدريبية المناسبة قبل الحملة؟
– هل فيه متابعة للاحصاءات اللي بتنتج عن الحملة؟
– هل كل الامكانات اللي محتاجينها متوافرة؟
– ايه مدى تجاوب المواطنين معاكم؟

****
إزاي أوصل للحملة؟
– ممكن تدخل موقع الحملة: www.stophcv.eg ومنه تعرف أقرب مركز ليك، أو تتصل على الخط الساخن: (15335)، ده بعد التأكد من ان محافظتك في المرحلة دي من الحملة.

***
امتى ييجي دور محافظتي؟
– المرحلة الأولي بدأت في 9 محافظات وهتستمر في أكتوبر ونوفمبر: بورسعيد، والإسكندرية، وجنوب سيناء، ومطروح، والبحيرة، ودمياط، والقليوبية، والفيوم، وأسيوط.
– المرحلة الثانية بين ديسمبر 2018 وفبراير 2019، وفيها 11 محافظة: شمال سيناء والبحر الأحمر والقاهرة والإسماعيلية والسويس وكفر الشيخ والمنوفية وبنى سويف وسوهاج وأسوان والأقصر.
وأخيرا المرحلة الثالثة، في مارس وإبريل 2019، وبتضم 7 محافظات: الوادى الجديد والجيزة والغربية والدقهلية والشرقية والمنيا وقنا.

****
معلومات عن الحملة :
– الحملة بيشارك فيها أكتر من 5484 فرد متقسمين كفرق عمل، كل فريق فيه طبيب، ممرض، مدخل بيانات، وبيشتغلوا بشكل ورديات، وده في أكتر من 1400 مقر منها مراكز الشباب.
– الحملة استكمال لجهود الحكومة من 2014 لعلاج الفيروس واللي أشدنا بيها في بوست سابق بعد اشادة منظمة الصحة العالمية. الحملة هي الأكبر من نوعها لأنها بتستهدف حوالي 50 مليون مواطن المسجلين في قوائم الانتخابات (فوق 18 سنة)، وبيتم بالتوازي معاها حملة للمسح بين أطفال المدارس.
– الحملة فيها نقطة إيجابية مهمة وهي الكشف عن الاصابة بالأمراض غير السارية (غير المعدية) زي السمنه والسكر وأمراض القلب والأوعية الدموية واللي بتشكل 70 % من أسباب الوفاة للمصريين، والأهم انه ده يتم توثيقه في قاعدة بيانات للمرضى وتبقى خطوة مفيدة جداً في تطبيق قانون التأمين الصحي الشامل بتوثيق سجل مرضي لكل مواطن.
– كنا نتمنى الاعلانات عن الحملة تكون أكبر وكمان تتجاوز الاعلام التقليدي والسوشيال ميديا، وتستخدم وسائل أقرب للناس المهمشة زي الجوامع والكنايس في القرى، أو شخصيات محلية ذات مصداقية، لأن الوصول للناس اللي مش هتدخل موقع الانترنت او تتصل على الرقم هوا أهم تحدي، علما بان الوزيرة قالت “اللي مش هييجي هنروحله”، وأدينا هنشوف عملياً ايه خطة الوزارة للجانب ده.
– وزير الصحة السابق كان قال ان مصر سنويا بيزيد فيها 150 ألف حالة فيرس سي جديدة، ورغم مجهودات توفير العلاج، لكن كان دايما ناقص جانب المسح واكتشاف الحالات الحديثة أو المجهولة، وده اللي نتمنى الحملة الحالية تنجح فيه ونشوف مصر فعلا بدون فيرس سي، وعشان كده بكرر الدعوة للمشاركة ولكتابة تجاربكم.