– امبارح المستشار نادر سعد الدين، المتحدث باسم مجلس الوزراء، قال إن المظاهرات اللي خرجت في أطفيح الأسبوع الماضي كانت سببها مواطنين خرجوا لأن عندهم “مطالب فئوية تخصهم”، ترتبط بتعطل انتاج الطوب بالمنطقة، والحكومة استجابت لهم.
– قبل يومين النائب العام أصدر بيان رسمي بأنه أمر بإخلاء سبيل ٦٨ طفل من المتهمين في القضية ٨٨٠ لعام ٢٠٢٠ أمن الدولة العليا، المتهمين “بالمشاركة في أحداث الشغب بالفترة الأخيرة”.
– كده بشكل رسمي بيتم نفي الكلام السخيف اللي حصل حول إن مفيش مظاهرات أصلا، أو إن كل اللي فيها إخوان.
– المفوضية المصرية للحقوق والحريات أعلنت توثيق أسماء ٥١٠ معتقل في ٢٧ محافظة، منهم ٦٨ قاصر هما اللي أطلق النائب العام سراحهم.
– اللغط اللي حصل ومحاولات نفي انه حصلت مظاهرات أساسا بيقول كتير عن دور الإعلام في مصر، وبيقول حاجات تانية كثيرة بين السطور .. هنشوف مع بعض ايه اللي حصل؟ فين أبرز الأماكن اللي حصل فيها مظاهرات؟ ايه أبرز أسبابها؟ وازاي كان تعامل الحكومة مع الموضوع؟ وإيه أثر المظاهرات دي سياسيا؟
*****
ايه اللي حصل؟
– المقاول والفنان محمد علي أطلق الدعوة في الذكرى الأولى لمظاهرات ٢٠ سبتمبر الماضي، ودعا لتظاهرات في مصر كلها لإسقاط الرئيس السيسي.
– لكن الاستجابة السنادي مكانتش في القاهرة والمدن زي السنة اللي فاتت وأغلب المظاهرات من وقت الثورة، لكن المظاهرات خرجت في القرى، وتركزت في أرياف وأطراف الجيزة والشرقية والمنيا بشكل خاص.
– من القرى اللي شهدت مظاهرات كبيرة هي البليدة – مركز العياط واللي استشهد فيها الشاب سامي وفقي بشير، بالإضافة لقري تانية زي الكداية وصول في مركز أطفيح، قرى تانية زي أم دينار والمنصورية في الجيزة برضه.
– شفنا كمان فيديوهات لمظاهرات في بني مزار بالمنيا، قرية البورايك في سوهاج، ومنشأة العماري في الأقصر، قرية ميت أبو غالب في دمياط، وفي غرب سهيل في أسوان وغيرها من القري.
*****
– القدرة على اننا نعرف بالتفصيل أسباب كل منطقة صعب بسبب ان التعتيم الإعلامي كبير، لكن الواضح أنه التظاهر في القرى كان مدفوع بموضوع التصالح في مخالفات البناء، بحكم إن دي مناطق مخالفات البناء على أراضي زراعية، واللي ملاكها مش كبار المضاربين بالعقارات في المدن، لكن ناس غلابة بنو بيوتهم الشخصية.
– المتحدث باسم رئاسة الوزراء وضح بالتفصيل السبب ورا مظاهرات أطفيح، وهو ان المنطقة معتمدة على مصانع الطوب الطفلي وده معادش مطلوب حاليا (بحكم إن مشاريع الدولة بتستخدم طوب أسمنتي، وبحكم قرار وقف البناء)، وكان الحل هوا ان الهيئة الهندسية تعهدت بشراء انتاج المصانع بالمنطقة.
المستشار نادر سعد قال كمان “الدولة تستجيب للمطالب المشروعة، وهو ما يعكسه قرار الهيئة الهندسية للقوات المسلحة ووزارة الإسكان بشراء الإنتاج، وقرار الدكتور مصطفى مدبولي، رئيس مجلس الوزراء بالاستئناف الجزئي لعملية البناء اليوم.”
– حتى الرئيس السيسي ألمح للمظاهرات اللي حصلت في كلمته في افتتاح مشاريع في مجمع مسطرد للبترول، وإن كان أشار لأن المظاهرات هي استغلال لموضوع التصالح علي مخالفات البناء وتسخين في الناس من جهات لم يسميها وإن كان واضح ان الاخوان هما المقصودين.
– بالتأكيد موضوع التصالح كان له دور، لكن كمان مهم يتحط في الحسبان حالة الفقر وخاصة في القرى واللي مطلوب من الناس فيها في ظل الظرف الاقتصادي الصعب بعد كورونا أنهم يدفعوا مخالفات التصالح.
– جزء مهم برضه من المظاهرات كان اللي حصل في غرب سهيل بأسوان، وده لأن بعض الأهالي تم نزع ملكية أراضيهم عشان مشروع بناء كوبري خزان أسوان، واتقالهم ملكوش تعويضات لأن مفيش اثبات بملكية الأرض، بينما هما من النوبة ودي الأرض اللي سكنوها بعد التهجير أيام السد العالي.
تم فض المظاهرة والقبض على أربعة من الأهالي، منهم طفلين، بعدها النائب العام قرر اخلاء سبيلهم.
– بالتالي الوقائع بتقول أنه مينفعش تتعلق كل حاجة على شماعة الإخوان، دي مظاهرات حقيقية من مواطنين لأسباب اقتصادية واجتماعية.
*****
هل المظاهرات مفبركة؟
– طبعا السؤال ده بعد كلام متحدث مجلس الوزراء والنائب العام ملوش مكان أصلا!
– لكن الشركة المتحدة للإعلام المملوكة للمخابرات العامة في محاولة منها لإظهار المظاهرات علي أنها مفبركة قامت بتصوير مظاهرة داخل مدينة الإنتاج الإعلامي وبعتتها لقناة الجزيرة علي أنها مظاهرة من نزلة السمان.
– وبعيدا عن أنه ليه الشركة تعمل كده؟ خاصة أنه الموقف الرسمي للدولة خلاص اعترف بوجودها، لكن في سؤال مهم عن دور الإعلام هل المفترض به أنه يقوم بالفبركة؟ ولا ينقل الصورة والواقع زي ما هو؟
وهل الإعلام المصري أتاح أي فرصة للمواطنين دول ينقلوا صوتهم ومشاكلهم مادام مش عايزينهم يتظاهروا؟
*****
– بشكل عام احنا في فريق الموقف المصري وإن كنا لا ندعو لهذه المظاهرات، لكن بندعم كامل الحق لأي مواطن في انه يمارس حقه الدستوري في التعبير عن رأيه بالوسائل السلمية بما فيها التظاهر.
– والأولى للنظام إنه يعتبر المظاهرات دي رسالة مهمة ايه اللي مفروض يتعمل عشان المواطنين يلاقوا وسائل تانية سياسية قانونية للتعبير عن مشاكلهم والمشاركة في اتخاذ القرارات اللي تمس حياتهم .. مفيش بديل عن حرية العمل للأحزاب السياسية السلمية، والانتخابات النزيهة للبرلمان والمحليات وزيادة صلاحياتها، وحرية الإعلام، بدون الخطوات دي هيفضل فيه مواطنين فجأة بينفجروا ومش لاقيين أي وسيلة يسمعوا الحكومة صوتهم إلا دي.
– أحزاب الدستور والعيش والحرية، واللي معروف مواقفها السياسية من الإخوان لم تدعو للمظاهرات، لكنها أصدرت بيانات بتؤكد على احترامها حق الناس في التظاهر، حزب العيش والحرية أدان العنف اللي تم استخدامه ضد المتظاهرين، وطالب بتحقيق في واقعة وفاة متظاهر بالعياط.
– المظاهرات دي بتقول رسالة مهمة جدا للنظام وهو أنه محتاج مراجعة لقراراته السياسية والاقتصادية.
– بشكل خاص بعيدا عن اتفاقنا أو اختلافنا علي تفاصيل قانون التصالح، لكن بالتأكيد القانون له أثر اجتماعي واسع جدا، خاصة في وقت اقتصادي صعب، وبدون أي تشاور وشراكة مع الناس، وبالتالي لازم الدولة تدرس طرق مختلفة للحد من الأثر، بعضها حصلت بوادر ليه زي مد الفترة وخفض الرسوم، لكن لسه مطلوب أكتر.
– حالة الإنكار للمشاكل اللي اعلام النظام بيحاول يقنع الناس بيها دي فقدت أي مبرر للاستمرار لأنه الناس بالفعل عايشة في المشاكل دي يوميا وبتراكم حالة من الغضب بالفعل بتهدد السلم المجتمعي لذلك دفن النظام لرأسه في الرمل هو شيء هيزيد من حالة الغضب دي، مش هيهدي الناس.
– الكلام الكتير طول الوقت على “الإنجازات” اللي بتحصل في ظل أنه نسبة كبيرة من المصريين تحت خط الفقر وبتزيد نسبتهم حتى بالأرقام الرسمية هو كلام ملوش معني، ومحتاج من الدولة مراجعته.
– نتمني الافراج عن كل المعتقلين في المظاهرات الأخيرة، وكل المعتقلين في السجون المصرية واللي بيدفعوا ضريبة رأيهم وتعبيرهم عنه سواء بالتظاهر السلمي أو بوسائل أخري.
– ونتمني من الدولة أنها فعلا تواجه المشاكل الأساسية للمصريين زي معدلات الفقر المرتفعة، تدني جودة الخدمات العامة زي التعليم والصحة، مش كل الإنجازات طرق وكباري، لازم الدولة تبدأ تفكر في إزاي توزع أرباح وأعباء النمو الاقتصادي بشكل متكافئ علي الناس عشان تهدي من حالة الغضب اللي موجودة وسط كتير من الناس حاليا.
*****