الموقف المصري | Egyptian Situation

– النهارده أول يوم رسمي لظهور نتيجة الثانوية العامة في المدارس. فريق صفحة الموقف المصري بيقدم التهاني، لكل الناجحين والمتفوقين في نتيجة الثانوية العامة، واللي بالتأكيد هي مرحلة مهمة في حياتهم العلمية، واللي لسّه بينتظرهم مسيرة تانية في الجامعة واللي بعدها.

– في امتحانات الثانوية العامة تحديداً وبسبب النظام التعليمي اللي عندنا فيه كتير من المشاكل الكبيرة سواء في طريقة التقييم أو الدروس الخصوصية أو نظم الامتحانات والتدريس وغيرها، فالأهالي بيعانوا مالياً ونفسياً مع ولادهم، وبتبقى الأسرة كلها في حالة طوارئ طول السنة، وللسبب ده فالتهنئة كمان للأهالي اللي بيتعبوا مع ولادهم، ومحاولة تأمين مستقبل ليهم.

– بين كل أوائل الثانوية العامة، فالسنة دي في وضع خاص ويفرح جداً، وهو إن الأول على علمي رياضة دمج، مروان وحيد عواد، من مركز “مشتول السوق” محافظة الشرقية، مصاب بالتوحد. وفي بلد زي مصر، وفي بيئة تعليمية مش مهيئة تماما للتعامل مع أصحاب القدرات الخاصة بشكل يساعدهم على التطور وتنمية مهاراتهم والتواصل مع الآخرين، ولكون أهله ناس بسطاء ومشكلة التوحد بتحتاج رعاية خاصة بشكل مستمر، فالموضوع بيحمل خصوصية كبيرة.

– بيحكي والد مروان عن معاناته مع الأطباء وإن فيه طبيبة قالتله من بدري إنه ميبذلش مجهود في تعليم ابنه لأن آخره دبلوم وتفكيره هيقف، عكس طبيب تاني قاله إنه هيكون زي “آينشتاين”، وبالتأكيد حدث زي ده المفروض يتم التعامل معاه بطريقة محترمة تعكس تقدير المجتمع لمروان وأهله، وكمان تجرم أي ممارسات عنصرية ضد أي طفل في منظومة التعليم بسبب إعاقة جسدية أو انخفاض الذكاء أو التنمر بسبب الشكل والبشرة، واللي هي للأسف ممارسات منتشرة في المدارس واللي المفروض إنه هدف التعليم غير كده خالص.

– السنادي نسبة نجاح طلاب الثانوي العامة وصلت 83.6%. ونسب الطلبة الحاصلين على 95%-100% وصلت لـ17% من دفعة الثانوية العامة، وعدد الأوائل وصل لـ40 طالب وطالبة. متقسمين: 34 بالتعليم العام، و2 من مدارس المتفوقين STEM، وطالب مكفوف، و3 طلاب دمج. دول 6 منح داخل مصر، ممكن كتير من ذوي المجاميع المرتفعة يستفادوا منهم:

١- منحة مصر الخير shorturl.at/ezDMO
٢- المنحة اليابانية shorturl.at/ru028
٣- منحة الجامعة الأمريكية بالقاهرة shorturl.at/cfwU6
٤- منحة الجامعة الألمانية shorturl.at/dvMW8
٥- منحة جامعة زويل shorturl.at/iowG6
٦- منحة جامعة النيل shorturl.at/lmCG
*****

– كلمة أخيرة لاخواتنا وأصدقائنا اللي خلصوا مرحلة الثانوية العامة، مجموعك سواء مرضي ليك أو لأ، فمش معناه بالضرورة نجاح أو فشل فاللي جي من حياتك، الثانوية مؤشر على أدائك التعليمي في المرحلة دي فقط، وأكيد ده مهم، لكن نخليه في حجمه ولسّه فيه مرحلة الكلية، وسوق العمل، وللأسف في بلدنا مفيش ترابط كامل بين المراحل. وبالتأكيد مفيش حاجة اسمها كلية قمة بشكل يحسم المستقبل، لإن القمة هي اللي بيعملها الإنسان نفسه بنجاحه واجتهاده وحبه للي بيدرسه وبيشتغله وإبداعه فيه، فأياً كانت النتيجة متشيلش هم طالما أديت واجبك وضميرك مرتاح إنك اجتهدت بأقصى ما تستطيع، وبالتوفيق في اللي جاي من حياتكم.