– امبارح النائب محمد فؤاد نشر على صفحته ملف كامل فيه محاضر فرز 129 لجنة من إجمالي 134 لجنة بدائرة العمرانية
والطالبية في الجيزة.
– النتائج دي بتقول إن عدد الحضور كان 55496 صوت، والإعادة كانت هتتم بين الأربعة الأعلى: المركز الأول كان للمرشح د.محمد علي باجمالي 12,327 صوت، وبعده النائب محمد فؤاد بإجمالي 10,876، وبعده علاء شلتوت 6,656 صوت، وبعده أشرف غبريال 5,627 صوت.
– المفاجأة إن القاضي ناجي شحاتة أعلن بشكل شفهي نتيجة مختلفة تماما، وبقى مرشحين حزب مستقبل وطن فايزين من الجولة الأولى، المرشح محمد علي بقى معاه 141,872 صوت ، والمرشح أحمد عاشور بقى 115,016 صوت، وبعدهم النائب محمد فؤاد64,549 وعلاء شلتوت 54,568 !!!
ملحوظة: الخمس لجان الناقصة القضاة رفضوا حضور مندوبين فيها، وحسب محاضر باقي اللجان متوسط أصوات اللجنة 400 صوت، يعني هامش خطأ 2000 صوت مش هيأثر على النتيجة النهائية.
– الحزب المصري الديمقراطي أصدر بيان قال فيه إنه قدم طعن ضد النتيجة، والنائب محمد فؤاد قال إنه بيتعامل ان النتيجة اللي تم إعلانها دي مش نهائية لحد ما نشوف هيتقال ايه رسميا في المؤتمر الصحفي للهيئة الوطنية للانتخابات، وده معاده يوم الأحد.
– المستشار ناجي شحاتة غير إنه صاحب مواقف سياسية معروفة وأكبر عدد من الأحكام اللي ألغتها محكمة النقض، ده كمان رسميا له موقف مشابه في انتخابات 2015!
وقتها كان ناجي شحاتة هوا رئيس اللجنة العامة لدائرة الدقي والعجوزة، واللي تم فيها إعلان نتائج خاطئة لصالح أحمد مرتضى منصور على حساب الدكتور عمرو الشوبكي.
– رسميا في 2016 محكمة النقض أعادت فرز الأصوات، وحكمت بأن النتيجة الحقيقية هيا فوز الشوبكي وإنه اللي مفروض يتصعد للبرلمان مكان أحمد مرتضى، لكن البرلمان رفض تنفيذ الحكم النهائي البات!!
– النائب محمد فؤاد له سجل طويل من العمل الخدمي لصالح أهالي دائرته، ومن المواقف السياسية الوطنية المعارضة، وواضح إن ده كان سبب تخصيص الجهات الحكومية أو الأمنية اللي بتحكم الانتخابات للقاضي ده بالذات للدائرة دي بالذات.
– لكن رغم كده مازلنا بنأمل إن اصوات الناس ودعمهم تعيد الحق لأصحابه، وحتى لو محصلش هيفضل الواقع إن الكل عارف الحقيقية، وشايفين قدامنا في المحاضر الرسمية المختومة وبامضاءات القضاة النتيجة الحقيقية، ولما يتعلن غيرها يبقى ده نموذج جديد لغياب حكم الدستور والقانون وده هوا أكتر شيء يسيء إلى “سمعة مصر” و”هيبة مؤسسات الدولة”.
– لولا التحرك الإيجابي المحترم من المرشح، ومن أهالي دائرته اللي صوتوله، ومن أفراد حملته المندوبين في اللجان، مكانش حد عرف اللي حصل، عشان كده لسه بنوجه الدعوة لأي حد شايف في دايرته مرشح يستحق الدعم يعمل اللي عليه واللي بإيده مهما كانت النتايج.
***
تفاصيل عن وقائع تلاعب بدوائر
أخرى: