الموقف المصري | Egyptian Situation

– من ساعات قليلة، بعد منتصف الليل، حصل انفجار كبير في معهد الأورام القومي. الانفجار سمع صداه أغلب المقيمين في وسط القاهرة، وهز بيوت وكسر ازاز شبابيك بعض بيوت حي المنيل من قوته.
– عدد الضحايا وصل لـ19 قتيل على الأقل، وأكثر من 30 مصاب منهم حالات شديدة الخطورة، وللأسف في أشلاء جثث لحد دلوقتي مجهولة الهوية.

– صفحة الموقف المصري بتقدم كل العزاء والتضامن للمتوفين والمصابين وأسرهم، وبتتمنى الشفاء العاجل لكل المصابين.

– بحسب التصريحات الرسمية، الانفجار تم خارج المعهد نتيجة تصادم عربية ماشية في اتجاه عكسي بـ3 عربيات تانيين، اتقال ان منها عربية أنابيب بوتاجاز. وده اللي أدى للانفجار، فيه أقاويل تانية عن إن الانفجار تم داخل المعهد في خزان الأكسجين، لكن رئيس جامعة القاهرة ووزيرة الصحة والمصادر الأمنية نفت الخبر ده.

– للأسف التغطية الاعلامية لحدث بالحجم ده اتأخرت جدا وسابت الناس تتناقل روايات مختلفة ومرعبة كتير.
– فيه إجراءات حكومية كتير اتاخدت خلال الساعات اللي فاتت، منها نقل مرضى المعهد، والمصابين نتيجة الانفجار لمستشفيات مختلفة: معهد الأورام فرع التجمع – القصر العيني – معهد ناصر، وغيرهم من المستشفيات.

-الجهات المختصة فتحت تحقيق، نتمنى بأسرع وقت يقدم رواية شفافة ومقنعة ترد على أسئلة كتير متعلقة بسبب الانفجار وقوته، وكمان عن توافر وسائل الحماية المدنية وسرعة وكفاءة إدارة الأزمة.

– معهد الأورام بيستفيد منه عشرات الآلاف من المرضى الغلابة، غير القادرين على كلفة العلاج أو الأشعة أو جلسات الكيماوي. وحتى مع نقل كل مرضى المعهد لمستشفيات مختلفة، هيفضل مرضى السرطان المترددين بشكل يومي على المعهد من أجل الكشوفات والفحوصات وجلسات الكيماوي في ورطة حقيقية، تحتاج تضافر كل الجهود لحين تجاوز الأزمة.

– خالص تضامنا مع الأطباء، وخاصة أطباء الرعاية والطوارئ اللي تم استدعائهم من بيوتهم فجر اليوم، واللي هيقع عليهم عبء كبير الأيام القادمة لحين إصلاح المعهد والاطمئنان على المصابين. وكل الشكر على تضافر جهود المصريين في إطلاق دعوات التبرع بالدم بكل المستشفيات المحيطة بالمعهد، بمجرد ما انتشر خبر الانفجار.

– مش محتاجين نأكد على كل مصري قادر يتبرع بالدم، وكمان ده رقم حساب معهد الأورام: 777. للي يحب يقدم تبرع مادي، متاح خلال كل البنوك المصرية والبريد المصري ومكنة فوري.

– بنقدم خالص التعازي مرة تانية لأهالي المتوفين، وبنتمنى الشفاء للمصابين، وبنتمنى حزمة الإجراءات العاجلة اللي هتكون لصالح المرضى اللي بيترددوا يوميا على المعهد يتم إعلانها وبسرعة، وعلى رأسها سرعة الانتهاء من اصلاح خسائر المعهد نفسه.