الموقف المصري | Egyptian Situation

إحنا عايزين نقول إن #شعبنا_شغيل .. عايزين من اعضاء الصفحة يبعتولنا هما بيشتغلوا ايه .. اكتبوا وابعتولنا قصصكم مع الشغل.

بسبب كارثة رشيد رجعنا نسمع تاني نغمة إن المصريين شعب كسول، والشغل كتير وهما اللي مش عايزين يشتغلوا!
الحقيقة إن نفس اللي بيقولوا الكلام ده بيناقضوا نفسهم.
– أصلاً بيقولوا دول سايبين مصر عشان يروحوا يغسلوا أطباق ويشتغلوا عمال نضافة وصنايعية في أوروبا .. جميل يعني بكلامكم نفسه هما (بيشتغلوا) هناك، وبيشتغلوا شغل شاق ولساعات عمل طويلة فعلاً، يبقى هما باعترافكم مش كسالى أصلاً، فكروا بقى ليه بيعملوا كده؟
– أو مثلاً يقولوا ده المدرس الكسول مش بيشرح في المدرسة عشان بيشتغل دروس خصوصية .. لكن حضرتك كلامك ده نفسه معناه إنه (بيشتغل) طول اليوم، نتناقش بقى حول الأسباب دي قصة تاني.
– نفس الوضع على الكل، من أول الدكتور اللي بيطلع من المستشفى الحكومي يلف على المستوصفات والمستشفيات الخاصة لحد نص الليل، لحد العامل اللي بيطلع من وردية المصنع يكمل شغل على التوك توك.
*****

روحو محطة قطار الجيزة شوفوا قطار الدرجة التالتة اللي بيسموه “المميز” اللي جاي من الأقاليم، أو روحوا موقف شبرا الخيمة أو عبود في أي يوم الصبح.
روحوا هناك اسمعوا قصص الناس .. اسمعوا ملايين الطلاب والعمال اللي بيصحوا من ٤ و ٥ الفجر كل يوم، جايين من قرى مجهولة في بني سويف والبحيرة والقليوبية والدقهلية، جايين من قليوب وشبين القناطر وكفر الدوار ودمنهور وإيتاي البارود وكفر الزيات وبركة السبع …الخ الخ. كل دول بيصحوا من قبل الفجر عشان يوصلوا جامعاتهم، أو يشتغلوا في مصانع 6 أكتوبر والعاشر، مواصلاتهم وشغلهم بتستغرق 12 ساعة على الأقل، وبأجور ممكن يصرفها اللي بيتنكوا عليهم في يوم!
ده غير ملايين الصعايدة اللي عايشين في شقق جماعية في عشوائيات الجيزة، وبينزلوا لعائلاتهم في سوهاج وقنا وأسيوط مرة كل كام شهر، شغالين في الفاعل و المحارة والنقاشة وعتالين وشيالين، وبعضهم خريجين جامعات، دول اللي بيتكدسوا في القطارات اللي بتتحرق، وبتشوفوهم “مسطحين” فوق الأسقف.
كل دول كُسالى؟!
*****