– خلال جلسة مجلس الأمن الأخيرة حوالين سد النهضة لاحظنا بوضوح موقف روسي ضد دول المصب مصر والسودان، ولغة جديدة مستخدمتهاش روسيا في المجلس قبل عام.
– الدعم الروسي للموقف الأثيوبي وضح أكثر بعدها بيومين بس بعد توقيع روسيا وأثيوبيا اتفاقية تعاون عسكري مشترك هدفها رفع كفاءة الجيش الأثيوبي، وحصل جدل حول مدى أهمية الاتفاقية دي.
– ايه أسباب الموقف الروسي؟ وده بيقولنا ايه عن طبيعة التحالفات اللي المفترض مصر تعملها علشان ملف السد وبشكل عام؟
إيه أهمية الاتفاقية الأخيرة بين روسيا وإثيوبيا؟
– الاتفاقية دي ملهاش أي أهمية خاصة، دي كانت ضمن المنتدي ال11 للتعاون الروسي الأثيوبي، يعني ده حدث بيحصل بقاله ١١ سنة بشكل دوري وروتيني، والاتفاقية عادية، ليست على مستوى رؤساء الدول مشفناش مثلا بوتن بيقابل آبي أحمد زي مقابلته بشار الأسد، والاتفاقية مش “اتفاقية دفاع مشترك” يعني مش رسالة موجهة أنه ضرب أثيوبيا يعني دخول مصر في خط مواجهة مع الروس.
– بالمناسبة أثيوبيا عبر تاريخها اشترت أسلحة من روسيا أكتر من مرة، بما فيها منظومات دفاع جوي، ده غير انها اتقفت مع روسيا من 2018 علي بناء مفاعل نووي برضه زي ما مصر عملت، بالتالي روسيا كانت علاقتها جيدة بأثيوبيا ومصر في الفترة اللي فاتت لكن بدون ما نقول انها بشكل كامل مع أحدهما.
****
إيه أسباب الموقف الروسي نحو مصر؟
– من 2013 ولحد وقت قريب كانت روسيا حليف مهم لمصر علي الساحة الدولية، بوتين كان أول رئيس زار مصر بعد انتخاب الرئيس السيسي، وكان من الداعمين الدوليين لترشحه في 2014.
– العلاقات المصرية الروسية فضلت جيدة والفترة دي شهدت بيع طائرات سوخوي 35 ب2 مليار دولار وصفقات سلاح كثير، وأهمها طبعا الاتفاق حول المفاعل النووي اللي ب25 مليار دولار حيتم تمويله من خلال قرض روسي.
– لكن مؤخرا مصر وروسيا اختلفوا في بعض الملفات، أهمها الملف الليبي واللي مصر كانت أكثر تعقلا فيه وطورت علاقتها مع الشرق الليبي ( السراج وحكومته ) بعد فشل حفتر بالدعم الروسي في الاستيلاء علي طرابلس.
– أيضا ملف الغاز في شرق المتوسط هو مهم جدا بالنسبة للروس لأنه التحركات الأوربية في تقليل الاعتماد علي الغاز الروسي من خلال تطوير البنية التحتية لانتاج وتوزيع الغاز في شرق المتوسط بيهدد وضع روسيا الاستراتيجي وعلاقتها بأوروبا لأنها أهم مصدر للغاز لأوروبا كلها وخاصة الدول المهمة زي ألمانيا.
– وجزء مهم من القصة هو أنه مصر في الفترة الأخيرة بقت أكثر تواصلا مع الأمريكان رغم كل المشاكل مع بايدن علشان ملف حقوق الانسان.
– أهم سلوك ممكن يكون استفز روسيا هوا مشاركة مصر في مناورات في البحر الأسود قبل أقل من شهر من جلسة مجلس الأمن، ضمن ٣٢ دولة بقيادة البحرية الأمريكية والأوكرانية، وروسيا أدانت المناورات دي ووصفتها “بالعدائية” وأنها استفزازية، واطلقت تدريبات في البحر الأسود للرد عليها.
– جانب تاني مهم هوا ان الموقف الروسي ببساطة بتعامل بمنطق مصلحته الاستراتيجية الخاصة، وجود روسيا في منطقة القرن الافريقي له عدة أهداف منها خدمة مشروع روسيا بوتين بالعودة للساحات الدولية المختلفة، شوفنا ده في سوريا سابقا روسيا اتدخلت لحماية مصالحها زي قاعدتها في طرسوس منفذها الوحيد للمياة الدافئة بالبحر المتوسط، ودعمت بشكل كامل حليفها النظام السوري وكانت سوريا بالنسبة لهم ساحة لاستعراض تطور الترسانة العسكرية الروسية، وبالتالي روسيا زي الصين مش عايزين يخسروا وجودهم في اثيوبيا اللي بيعتبروها بوابتهم لهذه المنطقة في ظل النفوذ الأمريكي والفرنسي في دول أفريقية أخرى.
– جانب مهم أيضا من القصة هو أنه روسيا بتعتمد بشكل كبير علي بيع الأسلحة للدول الفقيرة والغنية ، طبيعة النظام الروسي والنخب المحيطة به كلها مرتبطة بتجارة السلاح بشكل ما أو بأخر سواء بطرق رسمية أو غير رسمية.
– يعني روسيا معانا ولا مش معانا؟ الحقيقة هي مش معانا ولا علينا بشكل دائم، هي بس بتحاول تحقق مصالحها، واللي ترى ان مصر لا تلبيها بالشكل اللي عايزينه، بالتالي بتستخدم أوراق زي الضغط بمجلس الأمن للحصول على مكاسب في ملفات تانية.
– احنا في أمس الحاجة لبناء تحالف واسع أو على الأقل قدر من التأثير في كل واحد الأقطاب الأربعة اللي ممكن يضغطوا على موقف أثيوبيا وهم أمريكا – الاتحاد الأوروبي – روسيا – الصين.
– أمريكا احنا عندنا شراكة مستمرة وطويلة الأمد معاها ومفيش مشكلة واضحة في التحالف الاقتصادي والسياسي بين مصر والولايات المتحدة حاليا غير ملف حقوق الانسان، واللي النظام السياسي المصري مش بيقدم تحسينات كبيرة فيه رغم ان ده لصالح المواطنين المصريين ومش مفروض يكون بسبب ضغوط خارجية.
– الاتحاد الأوروبي مهم جدا بالنسبة له الاستقرار في مصر مش بس عشان هو أهم شريك تجاري لينا لكن لأنه انعدام الاستقرار في جنوب المتوسط بشكل عام وفي مصر بشكل خاص يعني تدفق أكبر للاجئين نحو الاتحاد الأوربي ودي مشكلة كبيرة بالتالي موقف الاتحاد الأوروبي من المتوقع أنه يكون ضاغط معانا علي أثيوبيا.
– الصين باستثماراتها الكبيرة في أثيوبيا ، ونجاح أثيوبيا في الفترة الأخيرة أنها تكون مرتكز للطموحات الصينية الاقتصادية في افريقيا بيخلي صعب جدا علي الصين أنها تاخد موقف مصر في ملف السد وخاصة أنها حتكون مستفيد مباشر من المشاريع المرتبطة بالزراعة والكهرباء في أثيوبيا. الصين نجحت في أنها تخلي أثيوبيا دولة معتمدة عليها في تحقيق نمو اقتصادي سواء عن طريق مشروعات البنية التحتية اللي الصين شغاله فيها في أثيوبيا من أكثر من عشر سنوات أو من خلال ربط تطور القطاع الصناعي والتكنولوجي في أثيوبيا بالصين بشكل مباشر، وده بيتطلب مننا تكثيف العمل مع الصين في الفترة الجاية علي الملف ده ومحاولة تقديم بديل لأثيوبيا كمرتكز للصناعات الصينية في افريقيا عن طريق شراكات استثمارية مع الشركات والحكومة الصينية.
– القطب الرابع وهو روسيا واللي رغم الصورة اللي بتقول أنه في تغير في الموقف الروسي لكن دي كلها لعبه سياسة وعلاقات دولية ومصر عندها ملفات مهمة متقاطعة مع الاهتمامات الروسية في المنطقة، وعندها حلفاء زي السعودية قادرين علي ممارسة ضغط علي روسيا في ملفات الغاز والبترول عبر منظمة أوبك، واللي روسيا بتعتمد علي صادراتهم بشكل كبير في توليد موارد للحكومة.
– وبالتالي الموقف الروسي الحالي يمكن تغييره بالمزيد من العمل مع الشركاء الدوليين والاقليمين.
– من المهم اننا نفهم كل خطوة ممكن يكون تمنها فيه مكسب وخسارة بنفس الوقت، لان القوى الدولية الكبرى مصالحها متناقضة برضه، بمعنى إن المشاركة في مناورات الناتو في البحر الأسود كان استفزاز لروسيا، لكنه ورقة إيجابية نحو أمريكا، لذلك المهم يكون محسوب بدقة موازنة المكاسب والخسائر ومين هيقدم شيء قصاد شيء.
– أثيوبيا مش دولة عظمي ولا احنا كذلك بالمناسبة، بالتالي استخدام كل أليات السياسة والعلاقات الدولية من خلال الأطراف الدوليين ممكن يجعل فيه آلية للضغط على اثيوبيا للتوقيع علي اتفاق قانوني ملزم، خاصة في ظل الأزمات الداخلية عندهم.
– قضية سد النهضة مش مجرد صراع علي المياة هي معركة مستمرة فيها أبعاد كثيرة مهمة سياسية واقتصادية وبتوضح قد ايه مهم يون عندك وزن كقوي إقليمية وتحالفات واسعة وعلاقات اقتصادية وسياسية مبنية علي المصالح والمبادئ مع الدول الكبرى، بالتالي استغلال علاقة مصر بالدول الكبيرة دي أو بالدول الإقليمية المهمة في المنطقة عشان الضغط علي أثيوبيا هي أهم ورقة في المفاوضات الحالية