الموقف المصري | Egyptian Situation

– امبارح أعلن اتحاد الكورة عن التعاقد مع المدرب المكسيكي خافيير أجيري عشان يدرب منتخبنا بعقد شهري قيمته 120 ألف دولار لمدة ٤ سنوات .. وبعيد عن النقاش عن كفاءته الفنية، أجيري ده تحديدا حالياً بيواجه تحقيق قضائي في أسبانيا ومتهم رسمياً من النيابة الأسبانية بالفساد، وده سبب اقالته من تدريب المنتخب الياباني، والقضية لسه منتهتش!
*****

ايه قصة قضية أجيري بالظبط؟

– الواقعة بتعود لنهاية موسم 2010 -2011 لما كان أجيري هوا المدير الفندي لريال سرقسطة والفريق كان مهدد بالهبوط لدوري الدرجة الثانية، وكان باقي له مباراة أخيرة مع ليفانتي، وحسب التحقيقات ادارة سرقسطة بتورط مباشر من اجيري دفعت حوالي 1.1 مليون دولار لفريق ليفانتي عشان يسيبهم يفوزو، وفعلا الماتش انتهي بفوز سرقسطة 2-1 واستمر فى الدوري.
– سنة 2013 بدأت الشكوك حول القصة، وسنة 2014 النيابة العامة الأسبانية فتحت تحقيق في القضية وظهر ساعتها اسم اجيري كأحد ابرز المتورطين.

– في 2015 اقال الاتحاد الياباني لكرة القدم خافيير أجيري من تدريب المنتخب هناك بسبب تهم الفساد دي وقال في بيان رسمي أنه الاتحاد بيعتقد أنه التهم دي ممكن تأثر على أداء المنتخب الياباني.
– القضية اتجمدت فترة لحد فبراير 2018 لما عادت القضية للظهور لأن النيابة الأسبانية شافت ادلة جديدة عن طريق تتبع التحويلات البنكية وسجلات الضرائب للعيبة في الفترة بتاعة المباراة.
– وجهت النيابة العامة تهم رسمية ل 41 لاعب وإداري في الفريقين .. القضية هزت الوسط الرياضي فى إسبانيا لأن المتهمين فيها لاعيبه كبار أشهرهم هو أندري هيريرا، لاعب وسط مانشستر يونايتد الحالي، وجابي لاعب اتيلتكو مدريد الحالي بالاضافة للمدرب أجيري طبعا.
– وبحسب التحقيقات فالرشاوي دي تم تمريرها عن طريق لاعيبه سرقسطة لزملائهم فى ليفانتي أو عن طريق إدرايين في الفريق وكان المدرب أجيري واحد منهم.
– لو ثبتت التهم دي على أجيري هيواجه عقوبة السجن لمدة سنتين والايقاف عن ممارسة أي نشاط متعلق بكرة القدم لمدة 6 سنين.
– حازم امام، عضو اتحاد الكورة، قال لما اتسأل عن القصة دي ان القضاء الاسباني برأ أجيري، لكن ده غير صحيح القضية لسه مفتوحة ومتحسمتش، وأجيري نفسه قال كده بعد الاعلان عن تدريبه للمنتخب المصري، لكن ركز على ان ده مش هيأثر عليه، وطبعا بيقول كده عشان مش عايز يحصل معاه اللي حصل في اليابان. قال “لا أعرف لماذا أعادت السلطات الاسبانية فتح القضية، لا يزال هناك تحقيق ولكن في النهاية في السنوات الست الأخيرة استغرق الأمر فقط 15 دقيقة من حياتي للتفكير والحديث عن الأمر!”
*****

طب وليه يعني نجيب حد عليه قضية فساد؟ وليه أول عقد يكون ٤ سنين؟
-فيه شبهات حوالين اختيار أجيري وعملية التفاوض معاه، خاصة ان انجازاته مش أقوى حاجة وحقق 40% بس نسب فوز في مبارياته، ووجود بدايل اتكلم عنها الاعلام زي تيري هنري ورينارد وغيرهم. مسؤولي الاتحاد قالوا اصل هينري غالي، لكن الصحف نقلت عن مصادر بالاتحاد انه كان غير موقفه وخفض أجره الى 90 الف يعني اقل بفرق معتبر من اجيري.
– بحسب الصحفي الرياضي أحمد عبدالباسط واللي طلع إمبارح في برنامج مع أخر النهار مع معتز الدمرداش وقال أنه التعاقد مع أجيري تم الاعلان عنه من مجدي عبدالغني قبل الرجوع لإتحاد الكورة اللى شبة اتورط في الراجل.
– أيضا طلع أنه مدير أعمال أجيري ممدوح عيد هو صديق لمجدي عبدالغني وهو اللى كان بيتفاوض للراجل يعني، لكن مجدي عبدالغني طلع نفي الكلام دا وقال أنه ممدوح عيد كان حاضر التفاوض بس لأنه صديق المدرب.
– النهاردة الخميس وقبل المؤتمر الصحفي للاعلان عن المدرب كان ممدوح عيد وكيل الأعمال حاضر فى اتحاد الكرة واجتمع مع مسئولين الاتحاد ودا بيخلي علامات استفهام كبيرة جدا حوالين دور وكيل الأعمال ممدوح عيد صديق مجدي عبدالغني واللى مجدي بيقول أنه صديق المدرب كمان.
*****

– القصة دي هي واحدة من القصص الكتيرة لفساد منظومة كرة القدم في مصر واللي كانت سبب أساسي فى تدهور المنظومة ككل وسوء نتائج منتخبنا اللى شوفناه في كاس العالم.
– قصص زي سرقة ملابس اللاعبين، أو التعاقد مع شركة ملابس جديدة غريبة، أو أزمة الطيارة وصورة صلاح، أو بيع أحد أعضاء الاتحاد لتذاكر المباريات في السوق السوداء واللي اتكلمنا عنها قبل كدا في بوست طويل حوالين أسباب فشل منتخبنا كاس العالم .
– ممكن يحصل فساد، دا شيء وارد وبيحصل في كل دول العالم، لكن المهم هو رد فعلك على الفساد دا هي هيكون فى أليات للمحاسبة والمراقبة على الناس دي؟ هل هيكون في رد فعل تجاه اللي بيحصل فى اتحاد الكورة مثلا؟
– ولسة نفس الأسئلة اللى طرحناها سابقا وبنكررها، ليه متتمش مراجعة مدققة للأموال الكبيرة اللي بتتم في التعاقدات بالكرة المصرية لنتأكد تماما من عدم وجود سمسرة في صفقات وعقود؟ وليه مفيش تحقق عن مصادر كل الأموال اللي بيتم إنفاقها في المنظومة الرياضية المصرية؟ مش وارد يكون فيها غسيل أموال زي ما تم اكتشافه في دول تانية؟
– إزاي اتحاد الكورة والشركة الراعية “بريزنتيشن” والقنوات المملوكة للشركة كلهم في منظومة واحدة بنفس الأفراد رغم تضارب المصالح؟! ازاي اعضاء باتحاد الكورة يطلعوا على القنوات ويقبضو منها ويتكلمو عن اثر قرارتهم؟
– وطبعاً وده مهم جداً: لحد امتى هيفضل الدوري المصري دوري بلا جمهور؟! وأسباب ده كلها سياسية وأمنية من وقت مذبحة بورسعيد ومرورا باللي حصل في استاد الدفاع الجوي..الخ.
*****