الموقف المصري | Egyptian Situation

– في 3 سبتمبر الحالي أعلنت لجنة تحكيم معرض “بينالي لندن” للتصميم فوز الجناح المصري بالجائزة الأولي.
– المعرض ده واحد من أكبر المعارض العالمية للتصميم، شارك فيه السنة دي تصميمات من 40 دولة و6 قارات، وكون أن الجناح المصري يفوز بالجائزة الأولي ده حدث كبير.
– الجناح المصري صممه د. محمد الشاهد @mohamed Elshahed الخبير المعماري المصري.
*****

مين هوا د.محمد الشاهد مصمم الجناح المصري؟
– دكتور محمد بيدرس التاريخ المعماري لطلاب الجامعة الأمريكية في القاهرة، حصل على الدكتوراه من جامعة نيويورك 2014.
– حالياً هو أحد أهم اللي بيكتبوا عن تاريخ العمارة في مصر، ومن المتوقع صدور كتاب ليه السنة الجاية عن تاريخ العمارة في القاهرة.
– كمان عمل موقع ” مشاهد القاهرة ” (Cairo observer ) http://cairobserver.com/
وهو موقع خاص بالنقاش حوالين التخطيط المعماري في مصر وبالذات في مدينة القاهرة وبيتعرض لمواضيع تتعلق بالتخطيط العمراني ككل ومشكلة التخطيط العمراني في مصر وحلول ليها
– بالاضافة الى انه الشاهد هو المشرف على مشروع مصر الحديثة في المتحف البريطاني.
– معرض بينالي لندن السنادي كان مشارك فيه مؤسسات كبيرة جدا زي Cooper Hewitt Simthsonian Design Museum وهو أكبر متحف تصميم في العالم، وبالتالي الفوز ده فعلاً إنجاز كبير.
*****

ليه المشاركة المصرية كانت متميزة؟
– الجناح المصري كان عنوانه “سخط حداثي” بيقدم توثيق وتأريخ لمجلة “العمارة” أول مجلة معمارية في مصر بدأت الصدور سنة 1939، كان بيحررها المعماري المصري الشهير سيد كريم، اللي توفى سنة 2005.
– المجلة كانت واحدة من أهم المجلات للتراث المعماري بالذات في القاهرة في فترة الأربعينات والخمسينات، لكن ورغم أهميتها إلا أنها شملتها بلا مبرر واضح موجة التأميمات الناصرية في 1964، وتم وقف المجلة والحجز على أملاك المعماري سيد كريم.
– المهندس سيد كريم كان ليه شهرة عالمية، وكان أحد أشهر المصممين بالعالم العربي، رسم وصمم مباني كتيرة منها اللي لسة موجود ومنها اللي اتهدم بفعل الاهمال، منها مثلا برج الزمالك، وعمارة أوزوينان، عمارات وحديقة المريلاند، عمارة شركة الاسكندرية للتأمين في وسط البلد، عمارة مصر للتأمين في طلعت حرب، الغرفة التجارية في ميدان الفلكي.
– أيضا برة مصر كان للمهندس سيد كريم دور مهم في تخطيط عدد كبير من المدن العربية منها بغداد الجديدة عام 1946. ودمشق الجديدة عام 1947. وتخطيط مدينة جدة عام 1949 الرياض عام 1950. وكذلك تخطيط المدينة المنورة ومكة المكرمة عام 1952 وتخطيط وتعمير مدينة عمان عاصمة الأردن عام 1954. ونابلس عام 1955 والعقبة بالأردن عام 1956. والتخطيط السياحي لمدينة الجزائر عام 1963. وتخطيط مدينة الخالدية في أبو ظبي عام 1965. والتخطيط السياحي لمدينتي أغادير وطنجة بالمغرب عام 1967.
– شخصية معمارية بالأهمية دي كان تقريبا طواها النسيان، لولا تسليط الجناح المصري في المعرض للضوء علي تاريخ العمارة الحديثة في القاهرة، وعلي سيد كريم بالخصوص، وتميز الموضوع وأسلوب عرضه هوا اللي أدى للفوز بالجائزة.
*****

والتخطيط العمراني ده يفرق معانا ايه؟

– للأسف فيه ناس ممكن تتصور ان ده شيء من الرفاهيات، بينما في الواقع ده ينعكس على حياة كل مواطن في أي بلد، من أول شبكة الطرق والمواصلات في المدن وشبكات الصرف الصحي والمساحات الترفيهية، وحتى حفظ التراث المعماري لمدينة غنية بالتراث زي القاهرة.
ولو لاحظنا نمط المباني في بدايات القرن اللي فات في القاهرة والاسكندرية وقد ايه البيوت والمباني الحكومية بتتعمل بطريقة فنية راقية وبتصميم بيخلي المباني مريحة في الصيف والشتاء، ولو لاحظت أي بيت مبني على الطراز ده لازم هتلاقي كل غرفة فيه مطلة على الشارع وفي اهتمام بالبلكونات والشبابيك بشكل ملفت للنظر.
– عدم الاهتمام ده بيتضح في حاجات كتير، زي ان سفراء الدول المشاركة كلهم كانوا موجودين ماعدا السفير المصري! وده رغم ان المعارض اللي من النوع ده مهمة جدا كنع من القوة الناعمة، بلاد زي الدول الخليجية متواجدة بشكل واضح وبتمول بشكل كبير أنشطتها في المعارض دي كنوع من اعادة رسم صورتها في العالم.

– مصر مفيهاش متحف او أرشيف أو جهة حكومية توثق وتعرض وتهتم بالتصميم عامة أو المعماري خاصة .. أهم حدث للتصميم في الشرق الأوسط حاليا هوا أسبوع دبي للتصميم (اللي شارك فيه برضه الدكتور محمد الشاهد في معرض “القاهرة مدينة غير مكتملة” في 2016 ونال اعجال كبير واتمد شهرين زيادة، وبرضه بغياب أي تمثيل رسمي من الدولة. وده بيوصل للدولة نفسها لما نشوف ان كل سفراء الدول المشاركة في بينالي لندن كانو موجودين م
– في أي دولة تحترم مواطنيها في حاجة اسمها الحق في المدينة، ودا مفهوم كبير بيشمل مثلا إزاي يكون التخطيط العمراني بالتشارك مع الناس وإزاي يخدم متطلبات واحتياجات الناس اليومية، ودي مشكلة نعتقد أنها بتواجهنا لحد الآن في كل مشاريع تطوير العشوائيات اللي حصلت، وإن مكنتش سبب مباشر في ظهور العشوائيات نفسها.
– الحكومات عندنا من عشرات السنين غير مهتمة بالموضوع ده نهائي، وشفنا تصميمات لمدن ومباني مش بتراعي كل ده، وكمان فكرة حفظ التراث بالنسبالها غايبة والحفاظ علي التراث المعماري للقاهرة، واستثمار التراث دا لجذب السياحة هي حاجة بتقع دائما في شرك البيروقراطية والفساد.
– بنبارك للدكتور محمد الشاهد، ونتمنى مصر تستفيد بالقدر الكافي من المتخصصين والناجحين في مجالاتهم زيه، خاصة في ظل خطط التوسع العقاري الحالية، نتمنى هوا وغيره من المبدعين الحقيقيين ياخدوا حقهم في الظهور الاعلامي والاحتفاء الشعبي بدل ترويج الوهم زي “الطفل المخترع” وليد عبادي وغيره من المزيفين.
*****