احنا النهارده كمصريين ادام تحدي كبير لأول مرة يواجهنا ويواجه الإنسانية، بعد تحول فيروس كورونا لوباء حصد أرواح الآلاف بيلزمنا نبدأ نفكر ونتصرف بشكل مختلف.
اللحظة الحالية مهمة جدا لمستقبلنا، لازم نبدأ بالالتزام بالتعليمات والإرشادات اللي بتنشرها مؤسسات زي منظمة الصحة العالمية ووزارة الصحة المصرية.
أهم التعليمات اللي العالم كله دلوقتي بيتبعها هيا: غسل الإيدين بدقة ٢٠ ثانية بشكل متكرر ودائم، وعدم لمس الوجه باليد غير المغسولة خاصة في مناطق الأنف والعينين والفم .. والحفاظ على التواجد في البيوت اكبر وقت ممكن وعدم الاختلاط بأعداد كبيرة وأماكن زحمة.
كلنا عارفين ان صعب كل الناس تقعد في بيوتها بشكل دائم لأن معظمنا وراه شغل وأكل عيش لكن لازم نحرص اننا نقلل خروجنا اكبر وقت ممكن ونستعد انه جايز تيجي لحظة في مصر محدش يقدر يخرج من بيته.
كأفراد ومجتمع لازم نكون عاملين دورنا .. احنا النهارده بنبدأ حملة طويلة ومستمرة حتى انتهاء الوباء علشان صحة المصريين وحياتهم هيا أهم أولوية لأي مصري دلوقتي، وبندعو كمان الحكومة انها تتحلى بالمسؤولية التاريخية في لحظة صعبة زي دي، وتكون حريصة على الشفافية والتفاعل الدائم مع المواطنين واتخاذ الاجراءات اللازمة لمواجهة الفيروس وطلب المشورة من الجهات المختصة محليا وعالميا.