– امبارح بدأ تطبيق قرار الإلزام بلبس الكمامات في الأماكن العامة، كإجراء احترازي لتقليل انتشار فيروس كورونا. شوفنا ناس كتير ملتزمة بالإجراء ده، والبعض بيستخدمها بشكل خاطئ.
– في البوست ده هنتكلم عن الطريقة الصحيحة لارتداء الكمامات، وهيتطبق على مين؟ وإيه الغرامات اللي هتطبق على المخالفين؟
*****
ازاي تستخدم الكمامة بطريقة تحميك؟
تعليمات الأطباء ووزارة الصحة ومنظمة الصحة العالمية بتقول التالي:
١- اغسل ايدك كويس بالمياه والصابون، أو استخدم مطهر كحولي لتنظيف اليدين قبل لبس الكمامة
٢- تجنب لمس الكمامة بايدك وانت لابسها
٣- لو لمست الكمامة، اغسل ايدك مرة تاني بنفس الطريقة
٤- ماتسيبش فراغات بين الكمامة والوجه قدر الامكان.
٥- بمجرد ما الكمامة تتبل، غيرها والبس واحدة جديدة
٦- شيل الكمامة من الرباط أو الأستك اللي عند الأذن أو الرأس، وليس الجزء اللي مغطي الوجه
٧- لو بتستخدم كمامة للاستعمال مرة، ماتستخدمهاش مرة تانية، وأرميها في سلة مهملات مقفولة
٨- اغسل ايدك مرة تانية بالمياه والصابون أو المطهر الكحولي.
*****
– رغم إن الأبحاث لسه جارية للوصول لنتايج دقيقة، لكن جهات صحية عديدة بالعالم بتوصي بيها من أهمها المركز الأمريكي لمكافحة الأوبئة والوقاية منها، وبيؤكدوا ان بلا شك لبسها أفضل من انك تخرج بدون كمامة.
– لو هتلبس كمامة قماش، تأكد من عدم وجود ثغرات في القماش، والأفضل انهت تكون أكتر من طبقة ومش خفيفة، لكن في نفس الوقت تكون مريحة وتقدر تتنفس كويس.
– النصائح لاستخدام الكمامة القماش هي نفسها للكمامة الطبية، لكن يضاف عليها غسل الكمامة القماش في الغسالة أو مية بمسحوق غسيل منظف زي باقي الملابس، وبعد ما تنشف تتكوي بالمكوى، بشرط إن درجة الحرارة ما تبوظش القماش أو تمطه او تخلي شكله يتغير.
*****
الكمامة لوحدها كفاية لمنع العدوى؟
– الكمامة مش بيمتنع العدوى بنسبة 100% ، لكنها بتقلل نسبة احتمالية الإصابة، وبالتالي عليك اتباع باقي الاجراءات زي التباعد واتخاذ مسافة آمنة بينك وبين أي حد.
– ضروري إن الكمامة تغطي الفم والأنف، لأنها بالشكل ده مش بتمنع عنهم أي رذاذ من شخص مصاب.
– أيضا الكمامة أيا كان نوعها أو خامتها، ماينفعش لاستخدام أكتر من شخص، لأنك لو لبست واحدة بعد شخص مصاب، هتنتقل لك العدوى بنسبة كبيرة.
*****
قرار الحكومة بيلزم مين بالكمامة؟
– العمال في الأسواق والمحلات، والزباين والمترددين عليها
– الموظفين في المنشآت الحكومية اللي بتستقبل الجمهور زي المرور والبنوك، والمترددين عليها من المواطنين
– الموظفين في المنشئات والشركات الخاصة والمترددين عليها من المواطنين
– ركاب المواصلات النقل الجماعية العامة والخاصة زي الأتوبيسات والميكروباص والمترو والقطارات.
– مسألة ركاب السيارات الملاكي الخاصة عملت لخبطة في البداية خاصة ان كماين الشرطة وقفت ناس مش لابساها جوا عربياتها، لكن متحدث مجلس الوزراء حسمها وقال رسميا انه غير الزامي للملاكي الخاص سواء سائقها أو اللي راكب معاه.
*****
– قرار مجلس الوزراء بالإلزام بارتداء الكمامة، نص على عقوبات مالية على المواطنين المخالفين، تترواح بين 100 جنيه و 4 آلاف جنيه، تحصل فوريا، وتتضاعف في حالة تكرار المخالفة.
– عقوبة بالحبس والغرامة بما لا يزيد عن 4 آلاف جنيه، أو بإحدى العقوبتين، على مخالفين باقي أحكام قرار رئيس الوزراء.
– نتمنى نلتزم كلنا بلبس الكمامة وباقي الإجراءات الاحترازية، وربنا يحفظ كل المصريين ويشفى كل مصاب بالفيروس.
*****