الحمد لله يا جماعة مصر ربنا كرمها واحتلت المركز الأول على مستوى العالم في …. ضحايا حوادث الطرق!
ده اللي قاله تقرير من الأمم المتحدة قال إن مصر خسرت ٨٠ ألف قتيل و ٣٨٠ ألف مصاب ومعاق.
http://bit.ly/1TXVJdTضحايا كل سنة بيزيدوا، وآخر تصريحات من وزارة النقل اتكلمت عن ١٣ ألف قتيل و ٦٠ ألف مصاب في سنة واحدة!
****
الفساد خسائره مش مجرد الفلوس، ده بيوصل للموت نفسه، ومش بس بيضر شخص واحد في حادثة، لكن بيضر عشرات وراه، أسرته وصحابه وجيرانه واللي بيحبوه.
الفساد مش معناه بس السرقة، بل إن المسئولين لا يقوموا بأداء واجباتهم.
دورنا كشعب مش الكلام العام من نوع “اتبرعوا” أو “الشباب لازم يتعب” أو “الشعب لازم يصبر”، بل دورنا إننا نجبر الحكومة تعمل شغلها اللي على أساسه بندفع الضرايب لها من دم قلبنا.
كمثال في موضوع الطرق فيه جهة مسئولة عن صيانة الطرق اللي بتتكسر، وجهة مسئولة عن أعمدة الإنارة اللي بنشوفها ضلمة على طرق سريعة خطرة، وجهة مسئولة عن وصول عربيات الإسعاف بسرعة لكل نقطة على الطريق، وجهة مسئولة عن أمن الطرق من البلطجية ..
كل دول لازم يشوفو شغلهم، ولازم يتم تقييم كل جهة منهم كل سنة، ولازم إحنا نطور طرق للرقابة الشعبية عشان نجبرهم أو على الأقل نفضحهم، وهنطور دا معاكم وهنعمله مع بعض في المستقبل، في صفحة الموقف المصري ان شاء الله..
وفي العالم كله الحكومة والرئيس اللي مش بيشوفو شغلهم ده بيقعدوا في البيت، والمواطن بيجرب غيرهم.
****
شوفوا معانا تجربة بسيطة لسكان مدينة روسية -إيكاترينبورغ- وازاي قدروا يجبروا المسؤولين انهم يشوفوا شغلهم ويصلحوا الطرق.