أمير شريف.. شاب مصري ضمن قائمة أبرز القادة الشباب في العالم

‎- فريق صفحة الموقف المصري بتهني أمير شريف الرئيس التنفيذى لشركة «بشر سوفت» المالكة لموقعى وظف وفرصنا على اختياره ضمن قائمة ” صغار القادة العالميين ” ( Young Global Leaders) في المنتدى الاقتصادي العالمي. Ameer Sherif

‎- القائمة بيتم اختيارها كل سنة من أفضل الشباب المؤثرين على مستوى العالم، وشملت السنة دي بالمرحلة الأولى 128 شاب من مختلف مناطق وبلدان العالم الوحيد اللي نجح أنه يكون في القايمة النهائية من الشرق الأوسط هو أمير شريف، بعد ما اترشح مع 12 شاب تانين من الشرق الأوسط منهم المدير التنفيذي لمؤسسة ساويرس للتنمية الاجتماعية، لكن مكملوش للقائمة النهائية.
‎- بالتأكيد دا انجاز كبير لأمير ولفريق عمل وظف، الموقع المصري اللي يعتبر دلوقتي واحد من أهم منصات التوظيف في العالم العربي.

‎- علي مدار 9 سنين من تأسيس الشركة نجح أمير انه يوفر عن طريق الموقعين 350 ألف فرصة عمل، نجح منهم توظيف 150 ألف شخص، وقدر يكون وسيط بين مليون باحث عن العمل مسجلين بياناتهم على الموقع وبين أكتر من 15 ألف شركة شغالة في السوق المصري.
‎- الشركات اللي بيتم توفير فرص ليها تشمل مجالات كتير من أبرزها شركات اتصالات ومقاولات وادوية، وموقع فرصتك مخصص للتعليم الفني مش الجامعي بس، وده حاجات مهمة للغاية ومهملة كتير في مصر.
‎- بناءا على اختيار أمير في القائمة دي فهيكون ليه الحق أنه يحضر مجموعة من المحاضرات والتدريبات في أعرق جامعات العالم.
– شئ ايجابي ان وزير الاتصالات المصري في يونيو ٢٠١٨ كرم الشركة خلال الاحتفال السنوي لمنظمة اتصال.
*****
‎
‎- الشباب المصريين اللي زي أمير هي العقول المصرية اللي لازم نستثمر فيها مش نستني لما يهاجرو وبعدين يتقال ناخد نسبة منها، محتاجين نتكلم معاهم ونديلهم الفرصة ونسهل ليهم ولشركاتهم الناشئة المجال للتوسع ونتيح بيئة جيدة داعمة للنوع ده من الاستثمار.
‎- شركات تقديم الخدمات الإلكترونية هي سوق بيكبر كل يوم في مصر وبياخد صدى على المستوى العالمي والإقليمي، والشركات دي بتضخ استثمارات في الاقتصاد.
‎- مش بنقول انه النوع دا من الشركات والاستثمار لوحده هو اللي ممكن يخلي الاقتصاد المصري اقوى لكنه بالتأكيد مفيد جدا، والصعود السريع فيه بيحصل خصوصا ان عنصره الرئيسي بشري، وفي تجارب دولية كتير لدا في الهند وفي ايرلندا وفي غيرها واللي تحولت لمراكز عالمية للصناعات التكنولوجية.
‎- بالتوفيق لأمير شريف في حياته المهنية الجاية، ولشركته وغيرها من الشركات الناشئة في مصر أنها تكون أقوى وأقدر على التوسع مش بس على المستوى المحلي لكن كمان على المستوى العالمي، وتتشال العقبات اللي بتواجهها من بيروقراطية أو تعطيل دخول أجهزة حديث بالجمارك، أو تعطيل تحويلات وغيرها.. وهنفضل في صفحتنا داعمين لأمثاله من النماذج المصرية الناجحة .
*****