– من النهاردة ولمدة أسبوع حنبدأ حملة للكتابة عن قضايا النساء في مصر، بندعوكم للمشاركة فيها علي هاشتاج #حقها، واللي هنحاول من خلالها نعرض معاناة النساء في مصر في ملفات مختلفة، وننشر قصصهم عن المشكلات اللي بتواجههم، خاصة التحرش والعنف الجنسي والختان والتمييز في الأجور والحرمان من الميراث ومعوقات العمل والتعليم وغيرها من المشكلات اللي لسه المجتمع المصري بيحطها علي عاتق النساء .
– أيضا خلال الأسبوع هننشر محتوى بيركز على العديد من المشاكل دي ورؤيتنا في الموقف المصري لحلها، ونعرض تجارب عالمية ممكن نستفيد منها للتفكير في دور الدولة والمجتمع في ده.
– خلال الفترة الأخيرة شفنا عدد من القضايا المهمة المختصة بالمرأة المصرية بقت موضع نقاش واسع في المجتمع، وبعضها أخد زخم كبير، لكن للأسف كله مكنش زخم إيجابي،لأنه في مقاومة من قطاعات عريضة للتغيير، سواء بحجج علمية خاطئة أو بحجج دينية زائفة أو مضللة رغم إن الأزهر ودار الإفتاء المصرية أصدروا فتاوى واضحة بأمور زي ختان الإناث مثلا، ده غير مشاهير على السوشيال ميديا عايزين للأسف يبقوا تريند وبيحفزوا وراهم ملايين من الأشخاص آنها تكون أكثر رجعية في التعامل مع النساء .
– ولكن علي الرغم من المقاومة المستمرة للتغيير إلا أنه في إنجازات حقيقية علي الأرض سواء علي المستوي القانوني بتغليظ عقوبة التحرش، أو علي مستوي البدء في تعيين النساء في مناصب مجلس الدولة والنيابة اللي شرحنا سابقا انها مش منحة حكومية مفاجئة بقدر ما هيا نتاج نضال لعشرات السنوات، وغيرها من الإنجازات، واللي أهمها في رأينا أنه قضايا النساء بقت محور نقاش وجدل مستمر في المجال العام في مصر.
– العالم كله بيتغير، وقضايا النساء المختلفة من أول التمييز في الأجور لحد التحرش والعنف الجنسي بقت علي أجندة النقاش في كل دول العالم تقريبا، وبيتنشر عنها بيانات واحصاءات، وشوفنا سقوط مسؤولين حكوميين ومليارديرات ونجوم ومشاهير في قضايا تحرش واعتداء جنسي، وبعضهم اتسجن أو دفع تعويضات ضخمة.
– بالتالي مفيش أي منطق يقول أننا نسكت علي ده ونخبي رأسنا في الرمل في مشاكل مهمة وحاضرة في مجتمعنا وبتأثر علينا كلنا وعلي كل أمهاتنا واخواتنا وزوجاتنا وكل ست في مصر.
– الكلام ده مش معناه طبعا إن مشاكل المراة مفصولة عن كل مشاكل المجتمع، الفقر أو البطالة أو عدم نزاهة الانتخابات وغيرها كتير كلها أزمات اقتصادية وسياسية تمس كل مواطن ذكر أو أنثي، وحلولها عامة، لكن جنبها كمان جانب إضافي يخص النساء، وفيه دور للمجتمع بايد كل واحد فينا بمحيطه جنب الدور المطلوب من الدولة.
*****
– شاركونا قصصكم مع العنف أو التحرش أو التمييز في العمل أو أي مشكلة شايفينها لازم يتم النقاش فيها فيما يتعلق بالستات، خبراتكم الشخصية وآرائكم مهمة.
– ممكن تبعتوا لنا علي ايميل الصفحة أو رسائل الصفحة وحننشر رسائلكم مجهلة حماية للخصوصية.
– ممكن تبعتوا لنا علي ايميل الصفحة أو رسائل الصفحة وحننشر رسائلكم مُجهلة حماية لخصوصيتكم.